ໜ້າຫຼັກ / ການເຄື່ອນໄຫວ / ມອບ-ຮັບ ໜ້າທີ່ ລະຫວ່າງ ປະທານສະຫະພັນແມ່ຍິງເມືອງ ຍອດອູ ຜູ້ເກົ່າ ແລະ ຜູ້ໃໝ່.
ພິທີມອບ-ຮັບ ໜ້າທີ່ລະຫວ່າງ ທ່ານນາງ ຈັນຄຳ ເພັດຊະວົງ ກຳມະການພັກເມືອງ, ຄະນະບໍລິຫານງານສະຫະພັນແມ່ຍິງແຂວງ ປະທານສະຫະພັນແມ່ຍິງເມືອງ ຍອດອູ (ຜູ້ເກົ່າ) ແລະ ທ່ານນາງ ແກ່ນຈັນ ບຸນຄຳປະເສີດ ຄະນະບໍລິຫານງານສະຫະພັນແມ່ຍິງເມືອງ, ປະທານສະຫະພັນແມ່ຍິງເມືອງ (ຜູ້ໃໝ່) ໄດ້ຈັດຂຶ້ນໃນຕອນບ່າຍຂອງວັນທີ 30 ມັງກອນ 2025 ນີ້, ຢູ່ທີ່ຫ້ອງປະຊຸມສະໂມສອນຂອງເມືອງ ໂດຍການເປັນປະທານ ຂອງທ່ານນາງ ຈັນຄຳ ເພັດຊະວົງ ກຳມະການພັກເມືອງ, ຄະນະບໍລິຫານງານສະຫະພັນແມ່ຍິງແຂວງ ປະທານສະຫະພັນແມ່ຍິງເມືອງ ຍອດອູ (ຜູ້ເກົ່າ) ແລະ ເປັນກຽດເຂົ້າຮ່ວມຂອງທ່ານ ທອງສີ ອິນຈັກ ກຳມະການປະຈຳພັກເມືອງ, ຮອງເລຂາ, ປະທານກວດກາພັກ-ລັດ ຜູ້ຊີ້ນຳວຽກງານປົກປ້ອງກົດໝາຍ, ມີທ່ານນາງ ແສງລອດ ຈັນດາ ກຳມະການປະຈຳພັກເມືອງ, ປະທານແນວລາວສ້າງຊາດ, ຜູ້ຊີ້ນຳວຽກງານອົງການຈັດຕັ້ງມະຫາຊົນ, ມີບັນດາທ່ານຮອງປະທານ, ຄະນະບໍລິຫານງານສະຫະພັນແມ່ຍິງອ້ອມຂ້າງ ພ້ອມດ້ວຍພາກສ່ວນທີ່ກ່ຽວຂ້ອງຂັ້ນເມືອງເຂົ້າຮ່ວມ.
ໃນພິທີທ່ານນາງ ຈັນຄຳ ເພັດຊະວົງ ກຳມະການພັກເມືອງ, ຄະນະບໍລິຫານງານສະຫະພັນແມ່ຍິງແຂວງ ປະທານສະຫະພັນແມ່ຍິງເມືອງ ຍອດອູ (ຜູ້ເກົ່າ) ໄດ້ຂື້ນຜ່ານບົດສະຫຼຸບການນຳພາວຽກງານຮອບດ້ານຂອງສະຫະພັນແມ່ຍິງເມືອງ ຍອດອູ ໃນໄລຍະຜ່ານມາ ເຊິ່ງຕະຫຼອດໄລຍະການຊີ້ນຳໆພາຂອງຕົນເອງ ພ້ອມດ້ວຍໝູ່ຄະນະ, ພະນັກງານສະມາຊິກພັກ, ລັດຖະກອນ ກໍ່ໄດ້ທຸ້ມເທເຫື່ອແຮງ, ສະຕິປັນຍາ, ຄວາມຮູ້, ຄວາມສາມາດ, ຫົວຄິດປະດິດສ້າງຂອງຕົນເພື່ອປະກອບສ່ວນເຂົ້າໃນການພັດທະນາແມ່ຍິງແຕ່ລະຂັ້ນ, ພະນັກງານລັດຖະກອນ ແລະ ເອື້ອຍນ້ອງແມ່ຍິງບັນດາເຜົ່າໃນທົ່ວເມືອງ ຈົນມີຜົນສຳເລັດໃນຫຼາຍດ້ານ ພ້ອມທັງໄດ້ລາຍງານການປະຕິບັດວຽກງານຮອບດ້ານ ທີ່ມີທັງດ້ານຕັ້ງໜ້າ, ຂໍ້ຄົງຄ້າງ ແລະ ວຽກງານທີ່ຈະສືບຕໍ່ຈັດຕັ້ງປະຕິບັດໃນຕໍ່ໜ້າ ເປັນຕົ້ນແມ່ນ ວຽກງານການຈັດຕັ້ງ, ວຽກງານພັກ-ພະນັກງານ, ອົງການຈັດຕັ້ງມະຫາຊົນ, ວຽກງານບໍລິຫານ, ການຄຸ້ມຄອງພາຫະນະ, ອຸປະກອນຮັບໃຊ້ ແລະ ດ້ານງົບປະມານຕ່າງໆ ເພື່ອມອບໃຫ້ຜູ້ໃໝ່ສືບຕໍ່ຈັດຕັ້ງປະຕິບັດໃນຕໍ່ໜ້າ. ໃນພິທີ ກໍ່ໄດ້ເຊັນບົດບັນທຶກມອບ-ຮັບໜ້າທີ່ຢ່າງເປັນທາງການລະຫ່ວາງ ປະທານສະຫະພັນແມ່ຍິງເມືອງ ຜູ້ເກົ່າ ແລະ ຜູ້ໃໝ່ ໂດຍຊ່ອງໜ້າທ່ານ ທອງສີ ອິນຈັກ ກຳມະການປະຈຳພັກເມືອງ, ຮອງເລຂາ, ປະທານກວດກາພັກ-ລັດ ຜູ້ຊີ້ນຳວຽກງານປົກປ້ອງກົດໝາຍພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ ຈາກນັ້ນ ກໍ່ໄດ້ຜ່ານຂໍ້ຕົກລົງ ວ່າດ້ວຍການຍ້ອງຍໍໃຫ້ແກ່ພະນັກງານຜູ້ທີ່ມີຜົນງານດີເດັ່ນໃນການປະກອບສ່ວນເຂົ້າໃນໜ້າທີ່ວຽກງານ ເປັນກຽດມອບໃບຍ້ອງຍໍດັ່ງກ່າວໂດຍແມ່ນ ທ່ານ ທອງສີ ອິນຈັກ ກຳມະການປະຈຳພັກເມືອງ, ຮອງເລຂາ, ປະທານກວດກາພັກ-ລັດ ຜູ້ຊີ້ນຳວຽກງານປົກປ້ອງກົດໝາຍ.
ໃນໂອກາດທີ່ມີຄວາມໝາຍ, ຄວາມສໍາຄັນນີ້ທ່ານ ທອງສີ ອິນຈັກ ກໍາມະການປະຈໍາພັກເມືອງ, ຮອງເລຂາ, ປະທານກວດກາພັກ-ລັດ ຜູ້ຊີ້ນຳວຽກງານປົກປ້ອງກົດໝາຍ ໄດ້ມີຄຳເຫັນໂອ້ລົມຕໍ່ພິທີ ເຊີ່ງກ່ອນອືນທ່ານກໍ່ໄດ້ກ່າວ ສະແດງຄວາມຍ້ອງຍໍຊົມເຊີຍ ຕໍ່ຜົນງານກໍ່ຄືຜົນສໍາເລັດທີ່ທາງປະທານສະຫະພັນແມ່ຍິງເມືອງຜູ້ເກົ່າ ໄດ້ນໍາພາສ້າງສາໃນໄລຍະຜ່ານມາ ພ້ອມທັງ, ເນັ້ນໜັກບາງບັນຫາທີ່ສໍາຄັນໃຫ້ປະທານສະຫະພັນແມ່ຍິງເມືອງ ຜູ້ໃໝ່ ສືບຕໍ່ຍົກສູງຄວາມຮັບຜິດຊອບຕໍ່ໜ້າທີ່ການເມືອງ ໃນການນໍາພາ-ຊີ້ນໍາຂົງເຂດວຽກງານຂອງຕົນຕາມພາລະບົດບາດຂອງຕົນ ດ້ວຍຄວາມຮັບຜິດຊອບສູງ ທັງເອົາໃຈໃສ່ປັບປຸງກໍ່ສ້າງສຳນັກງານກົມກອງໃຫ້ມີຄວາມປອດໃສ ເຂັ້ມແຂງ ໜັກແໜ້ນ, ມີຄຸນນະພາບ ແລະ ມີໃບໜ້າອັນໃໝ່ ແລະ ທ່ານນາງ ແກ່ນຈັນ ບຸນຄຳປະເສີດ ຄະນະບໍລິຫານງານສະຫະພັນແມ່ຍິງເມືອງ, ປະທານສະຫະພັນແມ່ຍິງເມືອງ (ຜູ້ໃໝ່) ໄດ້ກ່າວວ່າ: ຈະໃຊ້ທຸກຄວາມຮູ້, ຄວາມສາມາດເຂົ້າໃນການຈັດຕັ້ງປະຕິບັດໜ້າທີ່ໃຫ້ດີທີ່ສຸດ ຕາມທິດຊີ້ນໍາຂອງຂັ້ນເທິງໃຫ້ມີຜົນສໍາເລັດ ເພື່ອນໍາພາ-ຊີ້ນໍາວຽກງານຂອງສະຫະພັນແມ່ຍິງເມືອງ ໃຫ້ມີການພັດທະນາ ແລະ ເຕີບໃຫຍ່ຂະຫຍາຍຕົວຍິ່ງໆຂຶ້ນ.
