ໜ້າຫຼັກ / ການເຄື່ອນໄຫວ / ກອງປະຊຸມຊຸກຍູ້ ແລະ ຊີ້ນໍາການກະກຽມດ້ານເນື້ອໃນເພື່ອດໍາເນີນກອງປະຊຸມໃຫຍ່ຂອງອົງຄະນະພັກເມືອງ ຍອດອູ ຄັ້ງທີ X.
ເພື່ອເຮັດໃຫ້ການກະກຽມດ້ານເນື້ອໃນ ແລະ ແຜນພັດທະນາເສດຖະກິດ-ສັງຄົມຂອງເມືອງ ສຳເລັດຕາມແຜນການທີ່ວາງໄວ້ ໃນຕອນເຊົ້າວັນທີ 3 ກຸມພາ 2025 ຢູ່ທີ່ສະໂມສອນຂອງເມືອງ ຍອດອູ ແຂວງຜົ້ງສາລີ ອະນຸກຳມະການເນື້ອໃນຂັ້ນແຂວງ ໄດ້ລົງຕິດຕາມ, ຊຸກຍູ້ ແລະ ຊີ້ນໍາການກະກຽມດ້ານເນື້ອໃນເພື່ອດໍາເນີນກອງປະຊຸມໃຫຍ່ຂອງອົງຄະນະພັກເມືອງ ຍອດອູ ຄັ້ງທີ X ໂດຍພາຍໃຕ້ການເປັນປະທານຂອງທ່ານ ທອງສຸກ ເປົາສຸລີ ກໍາມະການພັກແຂວງ ຫົວໜ້າພະແນກແຜນການ ແລະ ການລົງທຶນແຂວງຜົ້ງສາລີ ທັງເປັນຫົວໜ້າອະນຸກຳມະການດ້ານເນື້ອໃນຂັ້ນແຂວງ ພ້ອມດ້ວຍທິມງານ, ເຂົ້າຮ່ວມມີບັນດາທ່ານ ເລຂາ, ຮອງເລຂາພັກເມືອງ ຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫ້ອງການ ຕະຫຼອດຮອດຄະນະຮັບຜິດຊອບວຽກງານເນື້ອໃນຂັ້ນເມືອງເຂົ້າຮ່ວມ.
ໃນກອງປະຊຸມທ່ານທອງສຸກ ເປົາສຸລີ ກໍາມະການພັກແຂວງ ຫົວໜ້າພະແນກແຜນການ ແລະ ການລົງທຶນແຂວງຜົ້ງສາລີ ຫົວໜ້າອະນຸກຳມະການດ້ານເນື້ອໃນຂັ້ນແຂວງ ໄດ້ມີຄຳເຫັນກ່າວເປີດກອງປະຊຸມ ແລະ ໄດ້ຮັບຟັງ ການຜ່ານຮ່າງບົດລາຍງານການເມືອງ ແລະ ຮ່າງແຜນພັດທະນາເສດຖະກິດ-ສັງຄົມ 5 ປີຂອງເມືອງ, ຂອງແຂວງໂດຍຫຍໍ້ ຈາກນັ້ນ ບັນດາທ່ານຜູ້ເຂົ້າຮ່ວມກໍ່ໄດ້ພ້ອມກັນຄົ້ນຄວ້າ ແລະ ປະກອບຄໍາຄິດເຫັນໃສ່ຮ່າງລາຍງານການເມືອງ ແລະ ແຜນພັດທະນາເສດຖະກິດ-ສັງຄົມ ຂອງເມືອງ, ຂອງແຂວງຢ່າງກົງໄປກົງມາ ເພື່ອເຮັດໃຫ້ມີເນື້ອໃນຄົບຖ້ວນສົມບູນ ແລະ ມີຄວາມພ້ອມຢ່າງຮອບດ້ານທຸກໜ້າທີ່ວຽກງານ. ການລົງເຄື່ອນໄຫວຊຸກຍູ້, ຕິດຕາມໃນຄັ້ງນີ້ປະທານກອງປະຊຸມໄດ້ມີຄຳເຫັນເພື່ອເປັນການປະເມີນ, ການກະກຽມດ້ານເນື້ອໃນ ແລະ ເນັ້ນບາງຈຸດຕື່ມໃຫ້ສືບຕໍ່ປະຕິບັດຕາມແຜນການທີ່ວາງໄວ້ພ້ອມທັງຮັບປະກັນຄຸນນະພາບເພື່ອໃຫ້ມີປະສິດທິຜົນສູງ
