ໜ້າຫຼັກ / ການເຄື່ອນໄຫວ / : ທາບທາມຮ່າງລາຍງານການເມືອງ, ຮ່າງແຜນພັດທະນາ ເສດຖະກິດ-ສັງຄົມ ຄັ້ງທີ XVI ຂອງອົງຄະນະພັກເມືອງຂວາ ແລະ ຂອງອົງຄະນະພັກແຂວງ
ກອງປະຊຸມທາບທາມຮ່າງລາຍງານການເມືອງ, ຮ່າງ ແຜນພັດທະນາເສດຖະກິດ-ສັງຄົມຄັ້ງທີ ຄັ້ງທີ XVI ຂອງອົງຄະນະພັກເມືອງຂວາ ແລະ ຂອງອົງຄະນະພັກແຂວງໄດ້ຈັດຂຶ້ນໃນວັນທີ 04 ກຸມພາ2025 ນີ້ ຢູ່ທີ່ສະໂມສອນຂອງເມືອງ ໂດຍ ການເປັນປະທານຊີ້ນໍາກອງປະຊຸມຂອງທ່ານອູ່ຄໍາ ຕຸລາພັນ ກໍາມະການພັກແຂວງ ຫົວໜ້າຫ້ອງວ່າການແຂວງ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2 ແຂວງຜົ້ງສາລີ, ມີທ່ານ ສອນສະໜຸກ ສີສຸລາດ ເລຂາຄະນະບໍລິຫານງານພັກເມືອງ ເຈົ້າເມືອງ, ມີຄະນະຊີ້ນໍາກອງປະຊຸມໃຫຍ່ຂັ້ນແຂວງ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ສອງກໍາລັງ ປະກອບອາວຸດເຂົ້າຮ່ວມ.
ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງການຜ່ານຮ່າງບົດ ລາຍງານການເມືອງສອງພາກ ໂດຍທ່ານ ຄໍາໄລ ສຸທິພອນ ຮອງເລຂາພັກເມືອງ ປະທານແນວລາວສ້າງຊາດ, ຜ່ານແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 3 (2020-2024) ໂດຍທ່ານ ວົງເດືອນ ພູມມີທໍາ ຮອງເຈົ້າເມືອງ ຜູ້ຊີ້ນໍາຂົງເຂດເສດຖະກິດ. ໃນໄລຍະ 5 ປີຜ່ານມາ ການຂະຫຍາຍຕົວທາງດ້ານເສດຖະກິດ ແມ່ນຢູ່ໃນລະດັບ 5,87% (ແຜນການ 8,87%) ໃນນີ້: ຂະແໜງກະສິກໍາ ແລະ ປ່າໄມ້ ຂະຫຍາຍຕົວ ສະເລ່ຍ 5,83%, ຂະແໜງອຸດສາຫະກຳ ແລະ ຫັດຖະກຳ ຂະຫຍາຍຕົວສະເລ່ຍ 6,24%, ແລະ ຂະແໜງການບໍລິການ ຂະຫຍາຍຕົວສະເລຍ 5,67%; ລວມຍອດຜະລິດຕະພັນພາຍໃນບັນລຸໄດ້ 1.348,93 ຕື້ກີບ ເທົ່າກັບ 110,18% ຂອງແຜນການ 5 ປີ, ສະເລ່ຍຕໍ່ຫົວຄົນໄດ້ 13,44 ລ້ານກີບ ຫຼື ເທົ່າກັບ 651,11 ໂດລາ ສະຫະລັດ (ຕາມອັດຕາແລກປ່ຽນປັດຈຸບັນ 21.978 ກີບ/1 ໂດລາສະຫະລັດ. ເປົ້າໝາຍ ຂອງແຜນພັດທະນາເສດຖະກິດ - ສັງຄົມ 5 ປີຄັ້ງທີ IV ແຕ່ 2025-2029. ພັດທະນາເສດຖະກິດ-ສັງຄົມ ຂອງເມືອງ ໃຫ້ມີການຂະຫຍາຍຕົວຢ່າງຕໍ່ເນື່ອງ, ມີຄວາມເຂັ້ມແຂງ, ໜັ້ນທ່ຽງ ແລະ ຍືນຍົງ ຕິດພັນກັບການຫັນປ່ຽນໂຄງປະກອບເສດຖະກິດ ຕາມທິດຫັນເປັນອຸດສາຫະກຳ ແລະ ທັນສະໄໝ ເທື່ອລະກ້າວ, ຮັບປະກັນຄວາມເຂັ້ມແຂງທາງດ້ານງົບປະມານ ໂດຍສະເພາະການເກັບລາຍຮັບເຂົ້າງົບປະມານ ແລະ ການຈັດສັນລາຍຈ່າຍງົບປະມານໃຫ້ມີປະສິດທິຜົນສູງ, ສອດຄ່ອງກັບສະພາບຕົວຈິງ. ໂດຍການສູ້ຊົນໃຫ້ເສດຖະກິດຂອງເມືອງ ຂະຫຍາຍຕົວຢ່າງຕໍ່ເນື່ອງ ແລະ ຍືນຍົງ ໂດຍສະເລ່ຍ 6,40% ຕໍ່ປີ, ລວມຍອດຜົນຜະລິດໃນ 5 ປີ ໃຫ້ບັນລຸ 2.605,49 ຕື້ກີບ, ໃນນັ້ນ, ຂະແໜງກະສິກຳ-ປ່າໄມ້ ໃຫ້ຂະຫຍາຍຕົວ 6%, ຂະແໜງອຸດສາຫະກຳ-ຫັດຖະກຳ ໃຫ້ຂະຫຍາຍຕົວ 7% ແລະ ຂະແໜງການບໍລິການໃຫ້ ຂະຫຍາຍຕົວ 7,80%. ໃນປີ 2029 ຕ້ອງສູ້ຊົນເຮັດໃຫ້ມູນຄ່າລວມຍອດຜະລິດ ໃຫ້ບັນລຸ 603,91 ຕື້ກີບ, ສະເລ່ຍໃສ່ຫົວຄົນ ໃຫ້ໄດ້ 18,58 ລ້ານກີບ ຫຼື ເທົ່າກັບ 850 ໂດລາສະຫະລັດ ( ໃນອັດຕາແລກປ່ຽນ 21.864 ກີບ ຕໍ່ 1 ໂດລາສະຫະລັດ); ພ້ອມດຽວກັນນັ້ນ, ທ່ານ ທັນວາ ມະໄລສິນ ຮອງຫົວໜ້າພະແນກແຜນການ ແລະ ການລົງທຶນແຂວງ ໄດ້ຜ່ານຮ່າງລາຍງານແຜນພັດທະນາເສດຖະກິດ-ສັງຄົມຂອງແຂວງ ແລະ ຮ່າງລາຍງານການເມືອງ. ຈາກນັ້ນ ປະທານ ກອງປະຊຸມ ກໍໄດ້ມີຄໍາເຫັນເຈາະຈິ້ມ, ຜູ້ເຂົ້າຮ່ວມ ກໍໄດ້ ມີການປະກອບຄໍາຄິດ-ຄໍາເຫັນ ຕໍ່ຮ່າງລາຍການເມືອງ, ຮ່າງແຜນພັດທະນາເສດຖະກິດ-ສັງຄົມ, ຂອງຄະນະບໍລິຫານງານພັກເມືອງ ແລະ ຂອງອົງຄະນະພັກແຂວງ ເພື່ອປັບປຸງເນື້ອໃນບົດລາຍງານດັ່ງກ່າວ ໃຫ້ ອຸດົມສົມບູນຂຶ້ນກວ່າເກົ່າ.
