ໜ້າຫຼັກ / ການເຄື່ອນໄຫວ / ພິທີປະກາດຮັບຮອງຄອບຄົວ ແລະ ບ້ານວັດທະນະທຳ ບ້ານ ນາລວງ, ບ ຫ້ວຍກາງ, ບ ຫ້ວຍພຸກ ແລະ ບ ເພຍລໍເກົົ່າ
ພິທີດັ່ງກ່າວໄດ້ຈັດຂື້ນໃນລະຫວ່າງວັນທີ່ 4-5 ກຸມພາ 2025 ນີ້ ໂດຍການເປັນທານຂອງທ່ານ ນ ຄຳຫຼ້າ ອິນທະວົງ ຫົວໜ້າຫ້ອງການ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເປັນກຽດເຂົ້າຮ່ວມຂອງ ທ່ານ ດຣ ພອນສະຫວັນ ມະນີວົງສີ ກຳມະການພັກເມືອງ ຮອງເຈົ້າເມືອງ ຜູ້ຊີ້ນຳຂົງເຂດວັດທະນະທຳ-ສັງຄົມ ມີ ເລຂາຄະນະພັກຮາກຖານກຸ່ມບ້ານ, ເລຂາພັກບ້ານ, ພະນັກງານຫ້ອງການກ່ຽວຂອງ ອົງການຈັດຕັ້ງບ້ານ ເຖົ້າແກ່ແນວໂຮມ ພ້ອມດ້ວຍພໍ່ແມ່ປະຊາຊົນເຂົ້າຮ່ວມ.
ໃນພິທີດັ່ງກ່າວທ່ານ ນ ຄຳຫຼ້າ ອິນທະວົງ ໄດ້ຂື້ນກ່າວຈຸດປະສົງ ພ້ອມທັງກ່າວເປີດພິທີຢ່າງທາງການ ຫຼັງຈາກນັ້ນຮັບຟັງເລຂາພັກບ້ານ ຂື້ນຜ່ານບົດສະຫຼຸບການສ້າງຄອບຄົວ ແລະ ບ້ານວັດທະນະທຳ ເຊິ່ງໃຫ້ຮູ້ວ່າ: ຜ່ານການປະເມີນ ຕາມ 5 ມາດຖານເງືອນໄຂ ຂອງການສ້າງຄອບຄົວ ແລະ ບ້ານວັດທະນະທຳໃໝ່ວ່າ: ບ້ານ ນາລວງ ມີທັງໝົດ 71 ຄອບຄົວ ພົນລະເມືອງໝົດ 338 ຄົນ ຍິງ 164 ຄົນ ປະເມີນໄດ້ຄອບຄົວວັດທະນະທຳ 63 ຄອບຄົວ ສະເລ່ຍໄດ້ 88,73%, ບ້ານ ຫ້ວຍກາງ ມີທັງໝົດ 28 ຄອບຄົວ ພົນລະເມືອງໝົດ 142 ຄົນ ຍິງ 73 ຄົນ ປະເມີນໄດ້ຄອບຄົວວັດທະນະທຳ 28 ຄອບຄົວ ສະເລ່ຍໄດ້ 100%, ບ້ານ ຫ້ວຍພຸກ ມີທັງໝົດ 30 ຄອບຄົວ ພົນລະເມືອງໝົດ 227 ຄົນ ຍິງ 77 ຄົນ ປະເມີນໄດ້ຄອບຄົວວັດທະນະທຳ 26 ຄອບຄົວ ສະເລ່ຍໄດ້ 86,60% ແລະ ບ້ານ ເພຍລໍເກົ່າ ມີທັງໝົດ 86 ຄອບຄົວ ພົນລະເມືອງໝົດ 466 ຄົນ ຍິງ 229 ຄົນ ປະເມີນໄດ້ຄອບຄົວວັດທະນະທຳ 77 ຄອບຄົວ ສະເລ່ຍໄດ້ 89,50% ປະຊາຊົນຍຶດຖືເອົາອາຊີບທຳການຜະລິດ ເຮັດໄຮ່, ເຮັດນາ, ປູກຟັງ-ລ້ຽງສັດ ເປັນອາຊີບຕົ້ນຕໍ ດ້ານເສດຖະກິດພື້ນຖານໂຄງລ່າງຂອງບ້ານໄດ້ຮັບການພັດທະນາດີຂື້ນ ຕະຫຼອດໄລຍະຜ່ານມາ ອົງການຈັດຕັ້ງບ້ານ ທຸກຂັ້ນໄດ້ຖືເອົາວຽກງານ ສຶກສາອົບຮົມ-ການເມືອງແນວຄິດ ໃຫ້ພໍ່ແມ່ປະຊາຊົນ ນຳເອົາແນວທາງນະໂຍບາຍຂອງພັກ-ລັດໂດຍສະເພາະແມ່ນເອກະສານການສ້າງ ຄອບຄົວ ແລະ ບ້ານວັດທະນະທຳ ລົງເຜີຍແຜ່ເຊື່ອມຊືມ ປຸກລະດົມຊຸກຍູ້ ໃຫ້ພໍ່ແມ່ປະຊາຊົນມີຄວາມສາມັກຄີເປັນປຶກແຜ່ນ, ມີຄວາມດຸໜັ່ນຫ້າວຫັນທຳການຜະລິດ ເພື່ອເຮັດໃຫ້ເສດຖະກິດຄອບຄົວມີການພັດທະນາດີຂື້ນ ແລະ ເອົາໃຈໃສ່ປົກປັກຮັກສາຮີດຄອງປະເພນີອັນດີງາມໃຫ້ໝັ້ນຄົງ. ພ້ອມນັ້ນຄະນະຈັດຕັ້ງພິທີໄດ້ຂື້ນຜ່ານມະຕິຕົກລົງຂອງທ່ານເຈົ້າເມືອງ ແລະ ເຈົ້າແຂວງ ວ່າດ້ວຍການຮັບຮອງເອົາ ຄອບຄົວ ແລະ ບ້ານວັດທະນະທຳໃໝ່ ຈາກນັ້ນກໍໄດ້ຈັດພິທີມອບຮັບໃບຢັ້ງຢືນຢ່າງສົມກຽດ.
ໃນໂອກາດດຽວກັນນີ້ ທ່ານ ດຣ ພອນສະຫວັນ ມະນີວົງສີ ໄດ້ຂື້ນມີຄຳເຫັນໂອ້ລົມ ກ່ອນອື່ນໝົດທ່ານ ກໍໄດ້ສະແດງຄວາມຍ້ອງຍໍຊົມເຊີຍເຖິງຜົນງານ,ໄຊຊະນະທີ່ຍາດມາໄດ້ ແລະ ໃຫ້ຮັກສາມູນເຊືອນີ້ໄວ້ ພ້ອມທັງເນັ້ນໜັກໃຫ້ອົງການປົກຄອງບ້ານ ນຳເອົາແນວທາງນະໂຍບາຍຂອງພັກ-ລັດ ລົງເຜີຍແຜ່ເຊື່ອມຊືມໃຫ້ພໍ່ແມ່ປະຊາຊົນ, ຕ້ານ ແລະ ສະກັດກັ້ນບັນຫາຢ່າເສບຕິດ, ຖືເອົາການປູກຝັງ-ລ້ຽງສັດ ເປັນອາຊີຕົ້ນຕໍ່ ສືບຕໍ່ປົກປັກຮັກສາຮີດຄອງປະເພນີອັນດີງາມຂອງຊາດ-ຂອງເຜົ່າໃຫ້ຢືນຍົງຕະຫຼອດໄປ
