ໜ້າຫຼັກ / ການເຄື່ອນໄຫວ / ມອບ-ຮັບລະບົບໂທລະໂຄ່ງ ແລະ ມອບເຄື່ອງຊ່ວຍເຫຼືອນັກຮຽນທຸກຍາກ ໂຮງຮຽນ ມສ ສົບຮຸນ
ໃນວັນທີ່ 05 ກຸມພາ 2025 ນີ້ ທ່ານ ອິກ ເພັງສະໝຸດ ຮັກສາການປະທານສານ ແຂວງຜົ້ງສາລີ ພ້ອມດ້ວຍທີມງານສານປະຈຳແຂວງ ແລະ ທ່ານ ພອນທະວີ ໄຊມົນຕີ ກຳມະການພັກແຂວງ ເລຂາພັກເມືອງ ເຈົ້າເມືອງໆໃໝ່ ພ້ອມດ້ວຍທີມງານຂັ້ນເມືອງ, ມີເລຂາພັກບ້ານ, ອົງການຈັດຕັ້ງບ້ານ, ຜູ້ອໍານວຍການໂຮງຮຽນ, ຄູ-ອາຈານ ຕະຫຼອດຮອດນັກຮຽນຜູ້ທຸກຍາກເຂົ້າຮ່ວມ ໃນການລົງມາໃນຄັ້ງນີ້ ທ່ານ ອິກ ເພັງສະໝຸດ ໄດ້ນຳເອົາລະບົບໂທລະໂຄ່ງຈຳນວນ 1 ຊຸດ ມູນຄ່າ 8,000,000 ກີບ ມາມອບໃຫ້ອົງການຈັດຕັ້ງບ້ານສົບຮຸນ, ເມືອງໃໝ່, ແຂວງຜົ້ງສາລີ ເພື່ອໃຫ້ອົງການຈັດຕັ້ງບ້ານ ນຳໃຊ້ເຂົ້າໃນການໂຄສະນາ ປະຊາສຳພັນວຽກງານ ຂ່າວສານຕ່າງໆ ພາຍໃນບ້ານ ແລະ ທັງເປັນການເພີມທະວີ ເປັນກະບອກສຽງ ໃນການໂຄສະນາ ເຜີຍແຜ່ແນວທາງນະໂຍບາຍຂອງພັກ-ລັດ ເປັນຕົ້ນແມ່ນການກະຈ່າຍຂໍ້ມູນ, ຂ່າວສານ ໃຫ້ປະຊາຊົນພາຍໃນບ້ານໄດ້ຮັບຟັງ ແລະ ຮັບຮູ້ວຽກງານໃຫ້ທັນກັບສະພາບການ ເປັນຕົ້ນແມ່ນການເຝົ້າລະວັງການແຜ່ລະບາດຂອງພະຍາດ ແລະ ເນື້ອໃນແຈ້ງການແຕ່ລະໄລຍະທີຂັ້ນເທິງໃຫ້ທົ່ວເຖິງ ນອກນັ້ນ ທ່ານ ພອນທະວີ ໄຊມົນຕີ ກຳມະການພັກແຂວງ ເລຂາພັກເມືອງ ເຈົ້າເມືອງໆໃໝ່ ຍັງໄດ້ນຳເອົາ ເຄື່ອງມາຊ່ວຍເຫຼືອນັກຮຽນທີ່ທຸກຍາກຂາດເຂີນຈຳນວນ 25 ນ້ອງ, ຍິງ 15 ນ້ອງ ເຄື່ອງທີ່ນໍາມາມອບໃນຄັ້ງນີ້: ມີ ເຄື່ອງນຸ່ງ, ຜ້າຮົ່ມ ແລະ ອຸປະກອນການຮຽນຈຳນວນໜຶ່ງ ລວມມູນຄ່າທັງໝົດ 14,250,000 ກີບ ໃນໂອກາດທີ່ໄດ້ລົງມາໃນຄັ້ງນີ້ ທ່ານໄດ້ມີຄຳເຫັນໂອ້ລົມ ເຊິ່ງທ່ານໄດ້ຍົກໃຫ້ເຫັນບາງບັນຫາທີ່ສຳຄັນ ໂດຍສະເພາແມ່ນ ວຽກງານການສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດວ່າ: ວຽກງານຂົງເຂດ, ຕົວຊີ້ວັດ, ມາດຖານເງື່ອນໄຂທີ່ຍັງຄົງຄ້າງທີ່ຈະຕ້ອງເອົາໃຈໃສ່ສືບຕໍ່ປັບປຸງແກ້ໄຂ ເພື່ອໃຫ້ໄດ້ປະກາດເປັນເມືອງຕົວເມືອງຕາມແຜນຂັ້ນເທິງວາງອອກ ແລະ ເນັ້ນຕື່ມວຽກງານຮັກສາອະນາໄມຂອບເຂດບ້ານໃຫ້ມີຄວາມສະອາດຈົບງານ ເປັນລະບຽບຮຽບຮ້ອຍ ພ້ອມທັງສ້າງຄວາມສາມັກຄີພາຍໃນ, ພາຍນອກໃຫ້ມີຄວາມໜັກແໜ້ນ ແລະ ໃຫ້ທຸກພາກສ່ວນພ້ອມກັນເປັນເຈົ້າການໃນການຈັດຕັ້ງປະຕິບັດວຽກງານໃຫ້ມີຜົນສຳເລັດ ເອົາໃຈໃສ່ສ້າງເສດຖະກິດຄອບຄົວ, ຂອງບ້ານ ກໍຄືຂອງຊາດ ໃຫ້ໄດ້ຮັບການພັດທະນາ ຮຸ່ງເຮືອງສີວິໄລຂື້ນເລື້ອຍໆ.
