ໜ້າຫຼັກ / ການເຄື່ອນໄຫວ / ເມືອງບຸນເໜືອ ມີຄວາມພ້ອມຫຼາຍດ້ານເພື່ອກຽມໃສ່ກອງປະຊຸມໃຫຍ່ອົງຄະນພັກເມືອງຄັ້ງທີ9.
ໃນວັນທີ 6 ກຸມພາ 2025 ນີ້ ທ່ານ ສົມພາບ ດາລາຈັກ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງບຸນເໜືອ ໄດ້ໃຫ້ສຳພາດຕໍ່ຜູ້ສື່ຂ່າວຂອງພວກເຮົາວ່າ: ເພື່ອການກະກຽມກອງປະຊຸມໃຫຍ່ 3 ຂັ້ນ ຂອງພັກ,ເມືອງບຸນເໜືອ ແມ່ນມີການສ້າງຂະບວນການແຂ່ງຂັນຮັກຊາດພັດທະນາຢ່າງຕໍ່ເນື່ອງເປັນຕົ້ນ:ໄດ້ຍູ້ແຮງຂະບວນການສຶກສາອົບຮົມການເມືອງ-ແນວຄິດ ດ້ວຍຫຼາຍຮູບການ, ຫຼາຍວິທີໃຫ້ແກ່ພະນັກງານ ສະມາຊິກພັກ, ທະຫານ, ຕຳຫຼວດ ໃນທົ່ວເມືອງ ແລະ ຮາກຖານບ້ານ ໂດຍຈັດຕັ້ງເຜີຍແຜ່ເຊື່ອມຊຶມ ເອກະສານຕ່າງໆ ເຊັ່ນ: ມະຕິ, ຄໍາສັ່ງ, ຄໍາແນະນໍາທັງໄດ້ຈັດຕັ້ງປາຖະກາຖາ ເລົ່າມູນເຊື້ອວັນສໍາຄັນຕ່າງໆ ຂອງຊາດ, ຂອງພັກ ແລະ ສາກົນໄດ້ເອົາໃຈໃສ່ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ, ຮັບປະກັນໃນທົ່ວເມືອງມີຄວາມສະຫງົບ, ເປັນລະບຽບຮຽບຮ້ອຍ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ທີ່ເກີດຂື້ນ ເພື່ອສ້າງເງື່ອນໄຂສະດວກໃຫ້ແກ່ການພັດທະນາເສດຖະກິດ-ສັງຄົມ ໂດຍຖືເອົາຂະບວນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການ ແກ້ໄຂຢາເສບຕິດເປັນຂະບວນການໃນດ້ານວຽກງານພັກ-ພະນັກງານ: ໄດ້ເອົາໃຈໃສ່ຕໍ່ການກໍ່ສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ ຮັບປະກັນດ້ານຄຸນນະພາບ, ສ້າງໃຫ້ມີສະມາຊິກພັກດີເດັ່ນ ແລະ ເປັນແບບຢ່າງນຳໜ້າໃຫ້ແກ່ມະຫາຊົນ ມີ ໜ່ວຍພັກປອດໃສເຂັ້ມແຂງໜັກແໜ້ນໂດຍໄດ້ເປີດກອງປະຊຸມປຶກສາຫາລືຮ່ວມກັບຄະນະປະຈຳພັກເມືອງ, ກຳມະການພັກເມືອງ, ຄະນະຫ້ອງການເພື່ອປະກອບເຂົ້າໃນ 6 ອານຸກຳມະການ, ພ້ອມທັງອອກມະຕິຕົກລົງ ເລກທີ 09/ຄພມ ລົງວັນທີ 13 ມັງກອນ 2025 ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນຳລວມ, ບັນດາອານຸກຳມະການກະກຽມກອງປະຊຸມໃຫຍ່ 3 ຂັ້ນຂອງພັກ, ອົງການຈັດຕັ້ງມະຫາຊົນ ແລະ ອົງການແນວລາວສ້າງຊາດ. ໄດ້ນຳພາ-ຊີ້ນຳແຕ່ລະອະນຸກຳມະການກະກຽມຄວາມພ້ອມ, ດຳເນີນກອງປະຊຸມສະເພາະ ເພື່ອແບ່ງໜ້າທີ່ຄວາມຮັບຜິດຊອບ ພາຍໃນ 6 ອະນຸກຳມະການໂດຍສຸມໃສ່ບັນດາໜ້າວຽກເປັນຕົ້ນ: ອະນຸກໍາມະການເນຶ້ອໃນ, ອະນຸກຳມະການບຸກຄະລາກອນ,ອະນຸກໍາມະການຂະບວນການ, ອະນຸກຳມະການປ້ອງກັນຊາດ-ປ້ອງກັນຄວາມສະຫງົບ, ອະນຸກຳມະການເສດຖະກິດ ແລະ ບໍລິຫານ, ອະນຸກຳມະການພິທິການ ແລະ ປະດັບປະດາ. ໃນແຕ່ລະອະນຸກຳມະການນີ້ໄດ້ປະຕິບັດຕາມແຜນດຳເນີນງານຂອງຄະນະອະນຸກຳມະການແຕ່ເດືອນ ເມສາ 2024 ຫາ ເດືອນ ກຸມພາ 2025;ຈັດກອງປະຊຸມແບ່ງວຽກຂອງອະນຸກຳມະການ ໂດຍແບ່ງອອກເປັນ 3 ໜ້າວຽກໃຫ່ຍຄື: (1) ຄະນະຮັບຜິດຊອບກະກຽມຂຽນຮ່າງບົດລາຍການເມືອງ 2 ພາກ; (2) ຄະນະຮັບຜິດຊອບກະກຽມຂຽນຮ່າງແຜນພັດທະນາເສດຖະກິດ-ສັງຄົມ ແລະ (3) ຄະນະຮັບຜິດຊອບຂຽນບົດຍ່ອຍຕ່າງໆ.
ອັນພົ້ນເດັ່ນໃນການຈັດຕັ້ງປະຕິບັດໃນໄລຍະຜ່ານມາ ດ້ານເສດຖະກິດຂອງເມືອງບຸນເໜືອ ແມ່ນໄດ້ອີງໃສ່ແຜນພັດທະນາເສດຖະກິດ-ສັງຄົມ 5 ປີ, ຄັ້ງທີ III ຂອງເມືອງ ເປັນຕົ້ນ: ແມ່ນສຸມໃສ່ຊຸກຍູ້ສົ່ງເສີມການປຸກ, ການລ້ຽງ ແລະ ການບໍລິການ ແລະ ສົ່ງອອກຕິດພັດກັບການພັດທະນາພື້ນຖານໂຄງລ່າງຕ່າງໆ:ການປູກແມ່ນ: ການປູກອ້ອຍເຖີງຈະໃຊ້ແຮງງານຫຼາຍກໍສາມາດເຮັດໃຫ້ປະຊາຊົນມີລາຍຮັບ ແລະ ສາມາດແກ້ໄຊຄວາມທຸກຍາກຂອງປະຊາຊົນບ້ານປູກອ້ອຍໄດ້ໂດຍສະເລ່ຍດ້ານ GDP ກວມເອົາ 42,06% ຂອງບ້ານປູກອ້ອຍ 42 ບ້ານໃນທົ່ວເມືອງ; ການລ້ຽງ: ມີຟາມງົວ, ຟາມໝູ, ໜອງປາ, ຟາມໄກ່ພັນໄຂ ແລະ ອື່ນໆ.ການບໍລິການມີໂຮງແຮມ, ເຮືອນພັກ, ຕະຫຼາດສົດ 4 ແຫ່ງ, ຮ້ານອາຫານ, ການບໍລິການຂົນສົ່ງ ແລະ ອື່ນໆ.ທັງໝົດນີ້ແມ່ນພື້ນຖານຂອງເມືອງຈື່ງສາມາດເຮັດໃຫ້ເສດຖະກິດມີການຂະຫຍາຍຕົວສະເລ່ຍເທົ່າກັບ 8.03% ທຽບໃສ່ແຜນປະຕິບັດໄດ້ 72.77% ໃນນັ້ນສິ່ງທີ່ພົ້ນເດັ່ນ: ກະສິກຳ-ປ່າໄມ້ ມີອັດຕາການຂະຫຍາຍຕົວ 3.89%, ອຸດສາຫະກໍາ-ຫັດຖະກຳ ມີອັດຕາການຂະຫຍາຍຕົວ 9.06% ແລະ ບໍລິການ ມີອັດຕາການຂະຫຍາຍຕົວ 17.01% ມີລວມຍອດລາຍຮັບຜົນຜະລິດໃນ 5 ປີ ບັນລຸ 2,139.20 ຕື້ກີບ ສະເລ່ຍຫົວຄົນ 1,349 ໂດລາສະຫລັດ/ຄົນ/ປີ ເທົ່າກັບ 29,685 ລ້ານກີບ/ຄົນ/ປີ.ລວມຍອດຜົນຜະລິດຕະພັນກະສິກຳ-ປ່າໄມ້ ຮອດປີ 2024 ບັນລຸ 1,086.36 ຕື້ກີບ ກວມ 50.75% ທຽບໃສປີ 2019 ລຸດລົງ 10.74 % ທຽບໃສ່ແຜນ 5 ປີ ປະຕິບັດໄດ້ 90.82% (ແຜນການຮອດປີ 2024, 1.273 ຕື້ກີບ).ລວມຍອດຜົນຜະລິດຕະພັນອຸດສາຫະກຳ-ຫັດຖະກຳ ຮອດປີ 2024 ບັນລຸ 383.48 ຕື້ກີບ ກວມ 17.93% ທຽບໃສປີ 2019 ເພີ່ມຂຶ້ນ 5.80% ທຽບໃສ່ແຜນ 5 ປີ ປະຕິບັດໄດ້ລື່ນແຜນ 11.68% (ແຜນການຮອດປີ 2024, 365.56 ຕື້ກີບ).ລວມຍອດຜົນຜະລິດຕະພັນບໍລິການ ຮອດປີ2024 ບັນລຸ 673.79 ຕື້ກວ່າກີບ, ກວມ 31.50% ທຽບໃສປີ 2019 ເພີ່ມຂຶ້ນ 20.40% ທຽບໃສ່ແຜນ 5 ປີ ປະຕິບັດໄດ້ລື່ນແຜນ 12.37% (ແຜນການຮອດປີ 2024, 638.4 ຕື້ກີບ). ນອກຈາກການກະກຽມໃຫ້ແກ່ກອງປະຊຸມໃຫຍ່ຂອງເມືອງແລ້ວ ທາງຄະນະພັກ-ອົງການປົກຄອງເມືອງ ໄດ້ຫ້າງຫາກະກຽມດ້ານຂະບວນການຕ່າງໆເປັນຕົ້ນ:ໄດ້ນໍາພາຂະບວນການສຶກສາອົບຮົມການເມືອງ-ແນວຄິດ ດ້ວຍຫຼາຍຮູບການ, ຫຼາຍວິທີ ໃຫ້ແກ່ ພະນັກງານສະມາຊິກພັກ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ, ດ້ານປ້ອງກັນຊາດ-ປ້ອງກັນຄວາມສະຫງົບ, ກໍ່ໄດ້ເອົາໃຈໃສ່ຊີ້ນໍາໃນການປ້ອງກັນເວນຍາມສຳນັກງານ ຫ້ອງການ ແລະ ຈຸດສຸມກຸ່ມບ້ານຕ່າງໆໃນທົ່ວເມືອງໃຫ້ ຮັບປະກັນໃນທົ່ວເມືອງມີຄວາມສະຫງົບ, ເປັນລະບຽບຮຽບຮ້ອຍໂດຍພື້ນຖານ. ຊຸກຍູ້ການສ້າງເສດຖະກິດຄອບຄົວ, ຍົກລະດັບຄຸນນະພາບຊີວິດການເປັນຢູ່ຂອງສະມາຊິກພັກ, ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ດ້ວຍການຜະລິດກະສິກຳ ເພື່ອຫຼຸດຜ່ອນ ລາຍຈ່າຍ ແລະ ຜະລິດເປັນສິນຄ້າ ສ້າງລາຍຮັບເຂົ້າຄອບຄົວບົນຈິດໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ.
ຕະຫລອດໄລຍະຫລາຍ 5 ປີຜ່ານມາ ພາຍໃຕ້ການນໍາພາຂອງພັກປະຊາຊົນ ປະຕິວັດລາວ ກໍ່ ຄືການນໍາພາ-ຊີ້ນໍາ ຂອງຄະນະບໍລິຫານງານພັກເມືອງບຸນເໜືອພວກເຮົາ ໄດ້ເຮັດໃຫ້ ເສດຖະກິດຂອງເມືອງ ໄດ້ຂະຫຍາຍຕົວສະເລ່ຍ ໃນລະດັບ 8.03% ຕໍ່ປີ, ດ້ານພື້ນຖານໂຄງລ່າງໄດ້ຮັບການພັດທະນາດີຂຶ້ນເປັນກ້າວໆ. ການສັນຈອນໄປມາຫາສູ່ ຂອງພໍ່ແມ່ປະຊາຊົນ ແລະ ແລກປ່ຽນຊື້-ຂາຍສິນຄ້າ ແມ່ນມີຄວາມສະດວກສະບາຍການຮຽນ-ການສອນໄດ້ຮັບການຍົກລະດັບດີຂຶ້ນເປັນກ້າວໆ, ຕາໜ່າງສາທາລະນະສຸກໄດ້ປົກຄຸມໃນທົ່ວ ທຸກເຂດຂອງເມືອງ, ຄອບຄົວ ແລະ ບ້ານທຸກຍາກໄດ້ຫຼຸດລົງ, ສາມາດສ້າງ ແລະ ຮັບຮອງເປັນເມືອງພົ້ນທຸກໄດ້ສຳເລັດ.
ມາຮອດປະຈຸບັນທາງເມືອງຂອງພວກເຮົາມີຄວາມພ້ອມໃນການກະກຽມດຳເນີນກອງປະຊຸມໃຫຍ່ຂັ້ນຂອງຕົນແລ້ວ 98% ແລະ ພ້ອມທີ່ຈະເປີດກອງປະຊຸມໃຫຍ່ໃນວັນທີ 10-11 ກຸມພາ 2025 ແລະ ຄາດວ່າຈະໃຫ້ສຳເລັດ 100% ໃນເດືອນກຸມພາ 2025 ນິ້.
