ໜ້າຫຼັກ / ການເຄື່ອນໄຫວ / ເຜີຍແຜ່ເອກະສານວຽກງານແຈ້ງຊັບສິນ ແລະ ລາຍຮັບຂອງນາຍຕໍາຫຼວດ ປກສ ແຂວງຜົ້ງສາລີ
ໃນວັນທີ 25 ກຸມພາ 2025 ກອງບັນຊາການ ປກສ ແຂວງຜົ້ງສາລີ ໄດ້ຈັດພິທີເຜີຍແຜ່ເອກະສານກ່ຽວກັບວຽກງານແຈ້ງຊັບສິນ ຂອງກໍາລັງປ້ອງກັນຄວາມສະຫງົບຂື້ນຢູ່ທີ່ສະໂມສອນ ກອງບັນຊາການ ປກສ ແຂວງຜົ້ງສາລີ. ໂດຍການເປັນກຽດເຂົ້າຮ່ວມຂອງ ພົຈວ ຄຳຈັນ ແສງລາວົງ ກຳມະການປະຈຳພັກແຂວງ, ຫົວໜ້າກອງບັນຊາການ ປກສ ແຂວງ, ມີພັອ ວົງພັນ ຄຳພະຈັນ ຮອງຫົວໜ້າກົມກວດກາ-ກວດການ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ ພ້ອມທີມງານ, ມີບັນດາຄະນະພັກ-ຄະນະກອງບັນຊາການ, ຄະນະຫ້ອງ 7 ຫ້ອງ 1 ກອງ, ຫົວໜ້າ-ຮອງພະແນກ, ປກສ ເມືອງ ຕະຫຼອດຮອດພະນັກງານ-ຫຼັກແຫຼ່ງ ປກສ ແຂວງຜົ້ງສາລີເຂົ້າຮ່ວມ.
ພັອ ວົງພັນ ຄຳພະຈັນ ຮອງຫົວໜ້າກົມກວດກາ-ກວດການ ກົມໃຫຍ່ການເມືອງກະຊວງປ້ອງກັນຄວາມສະຫງົບ ໄດ້ຜ່ານເອກະສານກ່ຽວກັບ ແຜນການແຈ້ງຊັບສິນ ແລະ ລາຍຮັບຂອງນາຍຕໍາຫຼວດ ປະຈໍາປີ 2024 ຂອງກົມກວດກາ-ກວດການ ກົມໃຫຍ່ກະຊວງປ້ອງກັນຄວາມສະຫງົບ ສະບັບເລກທີ 132/ກກ, ລົງວັນທີ 11 ກຸມພາ 2025 ໂດຍຜ່ານການຈັດຕັ້ງປະຕິບັດຕາມດໍາລັດຂອງລັດຖະບານ ສະບັບເລກທີ 159/ລບ ແລະ ຄໍາສັ່ງແນະນໍາເລກທີ 24/ປກສ ກ່ຽວກັບການແຈ້ງຊັບສິນ ແລະ ລາຍຮັບຜ່ານມາຄະນະພັກ-ຄະນະບັນຊາແຕ່ລະຂັ້ນກໍ່ໄດ້ເອົາໃຈໃສ່ຈັດຕັ້ງປະຕິບັດຕໍ່ວຽກງານແຈ້ງຊັບສິນ ແລະ ລາຍຮັບຢູ່ໃນການຄຸ້ມຄອງຂອງຕົນຢ່າງມີຜົນສໍາເລັດໂດຍພື້ນຖານ, ແຕ່ຍັງມີບາງເນື້ອໃນທີ່ຍັງບໍ່ທັນໄດ້ຈັດຕັ້ງປະຕິບັດການແຈ້ງຊັບສິນຂອງນາຍຕໍາຫຼວດ ໃນໄລຍະຜ່ານມາທີ່ໄດ້ກໍານົດໄວ້ ໃນບົດແນະນໍາ (ສະບັບປັບປຸງ) ເລກທີ 46/ອກລ, ລົງວັນທີ 20 ກຸມພາ 2017 ວ່າດ້ວຍການຄຸ້ມຄອງ ແລະ ນໍາໃຊ້ສໍານວນເອກະສານແຈ້ງຊັບສິນ, ເພື່ອຜັນຂະຫຍາຍດໍາລັດ, ບົດແນະນໍາ, ຄໍາສັ່ງຕ່າງໆໃຫ້ຖືກຕ້ອງ, ມີປະສິດທິພາບ, ປະສິດທິຜົນ ແລະ ມີຄວາມເປັນເອກະພາບໃນການຈັດຕັ້ງປະຕິບັດໃນຂອບເຂດທົ່ວກໍາລັງປ້ອງກັນຄວາມສະຫງົບ ເພື່ອເປັນບ່ອນອີງໃນການສະກັດກັ້ນ ແລະ ຕ້ານການສໍ້ລາດບັງຫຼວງທຸກຮູບແບບ ລວມທັງປະກົດການຫຍໍ້ທໍ້ຕ່າງໆທີ່ຈະເກີດຂື້ນ, ການແຈ້ງຊັບສິນ ແລະ ລາຍຮັບແຕ່ລະຂັ້ນແຕ່ສູນກາງລົງຮອດທ້ອງຖິ່ນ ເຂົ້າໃຈເປັນເອກະພາບໃນການຈັດຕັ້ງປະຕິບັດວຽກງານການແຈ້ງຊັບສິນ, ສອດຄ່ອງກັບບົດແນະນໍາ, ຕາມເນື້ອໃນຈິດໃຈຂອງອົງການກວດກາແຫ່ງລັດກໍ່ຄື ຄໍາສັ່ງແນະນໍາຂອງລັດຖະມົນຕີ ກະຊວງປ້ອງກັນຄວາມສະຫງົບ ໃຫ້ດໍາເນີນໄປຢ່າງຖືກຕ້ອງຕາມລະບຽບຫຼັກການ, ມີຄວາມເປັນເອກະພາບ, ມີຄວາມຮັບຜິດຊອບສູງ, ໂປ່ງໃສ ແລະ ໃຫ້ສໍາເລັດຕາມລະດັບຄາດໝາຍ, ນາຍຕໍາຫຼວດທີ່ຕ້ອງແຈ້ງຊັບສິນ ແລະ ລາຍຮັບຄື: ຂັ້ນສູນກາງຄຸ້ມຄອງ, ຜູ້ທີ່ເລື່ອນຊັ້ນໃໝ່(ຊັ້ນ ພັທ, ຂື້ນ ພັອ, ພົຈວ, ພົຕ, ພົທ) ແລະ ຮັບໜ້າທີ່ດໍາລົງຕໍາແໜ່ງໃໝ່ ຫຼື ຖືກບົງຕົວແຕ່ງຕັ້ງໄປຮັບໜ້າທີ່ໃໝ່ຢູ່ກົມກອງອື່ນ, ວິທີການແຈ້ງຊັບສິນ ຜູ້ແຈ້ງຕ້ອງໄດ້ຂຽນໃຫ້ລະອຽດຕາມຮ່າງເອກະສານເຊັ່ນ: ດ້ານຊີວະປະຫວັດ ແລະ ການພົວພັນໃນຄອບຄົວຂອງຜູ້ແຈ້ງຊັບສິນ, ບັນຊີປະເພດສິ່ງປຸກສ້າງ, ກົນຈັກການຜະລິດ ແລະ ອື່ນໆທີ່ມີມູນຄ່າ 20 ລ້ານກີບຂື້ນໄປ. ຈາກນັ້ນຄະນະຮັບຜິດຊອບກໍ່ໄດ້ອະທິບາຍຕົວຢ່າງໃນການຂຽນເອກະສານແຈ້ງຊັບສິນ ແລະ ລາຍຮັບຕື່ມອີກ.
