ໜ້າຫຼັກ / ການເຄື່ອນໄຫວ / ຂ່າວ: ພິທີປະກາດກົງຈັກການຈັດຕັ້ງສ່ວຍສາອາກອນ ປະຈຳແຂວງຜົ້ງສາລີ.
ໃນຕອນເຊົ້າຂອງວັນທີ 25 ກຸມພາ 2025 ນີ້, ຢູ່ທີ່ຫ້ອງປະຊຸມພະແນກການເງິນແຂວງຜົ້ງສາລີ ໄດ້ຈັດພິທີປະກາດກົງຈັກການຈັດຕັ້ງສ່ວຍສາອາກອນ ປະຈຳແຂວງຜົ້ງສາລີ ຂຶ້ນຢ່າງເປັນທາງການ. ເປັນກຽດເຂົ້າຮ່ວມຂອງ ທ່ານ ວີສອນ ລາວເມົາ ຮອງເຈົ້າແຂວງ ຜູ້ຊີ້ນຳຂົງເຂດເສດຖະກິດຂັ້ນແຂວງ, ມີ ທ່ານ ອຸໄທ ອິນທິລາດ ຮອງຫົວໜ້າກົມຈັດຕັ້ງ ແລະ ພະນັກງານກະຊວງການເງິນ, ມີຮອງຫົວໜ້າກົມສ່ວຍສາອາກອນ, ມີຫົວໜ້າພະແນກ-ຮອງພະແນກການເງິນແຂວງ, ຫົວໜ້າພະແນກ-ຮອງພະແນກການອ້ອມຂ້າງແຂວງ, ພະນັກງານກົມສ່ວຍສາອາກອນ, ຕະຫຼອດຮອດພະນັກງານພາຍໃນພະແນກການເງິນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ອຸໄທ ອິນທິລາດ ຮອງຫົວໜ້າກົມຈັດຕັ້ງ ແລະ ພະນັກງານ ກະຊວງການເງິນ, ໄດ້ຂຶ້ນຜ່ານຂໍ້ຕົກລົງເລກທີ 0124/ກງ, ລົງວັນທີ 21 ມັງກອນ 2025 ວ່າດ້ວຍການແຕ່ງຕັ້ງພະນັກງານຮັບໜ້າທີ່ໃໝ່ຢູ່ສ່ວຍສາອາກອນ ປະຈຳແຂວງຜົ້ງສາລີ, ຂໍ້ຕົກລົງເລກທີ 0397/ກງ, ລົງວັນທີ 13 ກຸມພາ 2025 ວ່າດ້ວຍການຍົກຍ້າຍ ແລະ ແຕ່ງຕັ້ງພະນັກງານຮັບໜ້າທີ່ໃໝ່ຢູ່ສ່ວຍສາອາກອນ ປະຈຳແຂວງຜົ້ງສາລີ, ໃນນີ້ລັດຖະມົນຕີກະຊວງການເງິນຕົກລົງແຕ່ງຕັ້ງ ທ່ານ ໄຊຍະພົງ ໄຊຍະເສນສຸກ ວ່າການແທນຫົວໜ້າສ່ວຍສາອາກອນ ປະຈຳແຂວງຜົ້ງສາລີ ເປັນ ຫົວໜ້າສ່ວຍສາອາກອນ ປະຈຳແຂວງຜົ້ງສາລີ, ຍົກຍ້າຍ ແລະ ແຕ່ງຕັ້ງ ທ່ານ ນາງບົວເຕດ ແສນຕະຈິດ ຫົວໜ້າຂະແໜງຈັດຕັ້ງບໍລິຫານ ແລະ ກວດກາພາຍໃນ ເປັນ ຮອງຫົວໜ້າສ່ວຍສາອາກອນ ປະຈຳແຂວງຜົ້ງສາລີ, ແຕ່ງຕັ້ງ ທ່ານ ຄອນເພັດ ແກ້ວພູມສີ ຮອງຫົວໜ້າຂະແໜງຄຸ້ມຄອງລາຍຮັບ ເປັນຫົວໜ້າຂະແໜງຈັດຕັ້ງ, ບໍລິຫານ, ການເງິນ ແລະ ກວດກາພາຍໃນ, ແຕ່ງຕັ້ງ ທ່ານ ສີສະໄໝ ສຸກສັນ ຮອງຫົວໜ້າຂະແໜງຄຸ້ມຄອງລາຍຮັບ ເປັນຫົວໜ້າຂະແໜງຄຸ້ມຄອງອາກອນມູນຄ່າເພີ່ມ, ອາກອນຊົມໃຊ້ ແລະ ໃບເກັບເງິນ, ແຕ່ງຕັ້ງ ທ່ານ ເສີດ ສຸລິສັກ ເປັນຮອງຫົວໜ້າຂະແໜງຄຸ້ມຄອງອາກອນມູນຄ່າເພີ່ມ, ອາກອນຊົມໃຊ້ ແລະ ໃບເກັບເງິນ, ແຕ່ງຕັ້ງ ທ່ານ ນາງ ແວ່ນແກ້ວ ຈາຍຄຳ ເປັນຮອງຫົວໜ້າຂະແໜງຄຸ້ມຄອງອາກອນມູນຄ່າເພີ່ມ, ອາກອນຊົມໃຊ້ ແລະ ໃບເກັບເງິນ, ແຕ່ງຕັ້ງ ທ່ານ ນາງ ມະນີວັນ ລາວລີ ເປັນຮອງຫົວໜ້າຂະແໜງກວດກາໄລ່ລຽງອາກອນ, ແຕ່ງຕັ້ງ ທ່ານ ຄຳສາລີ ເຈັ່ນຄຳເຫຼັກ ເປັນຮອງຫົວໜ້າຂະແໜງຄຸ້ມຄອງລາຍຮັບ ແລະ ບໍລິການຜູ້ເສຍອາກອນ ແລະ ແຕ່ງຕັ້ງ ທ່ານ ນາງ ເກສອນ ນາມວົງ ເປັນຮອງຫົວໜ້າຂະແໜງຄຸ້ມຄອງລາຍຮັບ ແລະ ບໍລິການຜູ້ເສຍອາກອນ.
ໃນໂອກາດທີ່ມີຄວາມໝາຍ-ຄວາມສຳຄັນດັ່ງກ່າວ, ທ່ານ ວີສອນ ລາວເມົາ ຮອງເຈົ້າແຂວງ ຜູ້ຊີ້ນຳຂົງເຂດເສດຖະກິດ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ບັນດາ ສະຫາຍ ທີ່ໄດ້ຮັບການຍົກຍ້າຍ ແຕ່ງຕັ້ງ ທີ່ຍາດໄດ້ຜົນງານໃນຫຼາຍດ້ານຈົນສາມາດໄດ້ຮັບການແຕ່ງຕັ້ງໜ້າທີ່ໃໝ່, ພ້ອມທັງຮຽກຮ້ອງໃຫ້ສືບຕໍ່ເອົາໃຈໃສ່ກຳແໜ້ນແນວທາງນະໂຍບາຍຂອງພັກ-ລະບຽບກົດໝາຍຂອງລັດຢ່າງເປັນປົກກະຕິ, ຝຶກຝົນຫຼໍ່ຫຼອມຕົນເອງໃຫ້ມີຄຸນທາດການເມືອງຢ່າງໜັກແໜ້ນ, ມີຄຸນສົມບັດ-ສິນທຳປະຕິວັດ, ມີຄວາມສາມັກຄີເປັນປຶກແຜ່ນ, ຍົກສູງຄວາມຮັບຜິດຊອບຂອງຕົນ, ພ້ອມທັງປັບປຸງແບບແຜນວິທີການເຮັດວຽກໃຫ້ໄປຕາມຫຼັກການ ແລະ ເງື່ອນໄຂສະພາບຕົວຈິງ, ເພື່ອເຮັດໃຫ້ວຽກງານມີຄວາມວ່ອງໄວ ແລະ ທັນສະໄໝຂຶ້ນກ່ວາເກົ່າ.
