ໃນວັນທີ 25 ນິ້ກອງບັນຊາການທະຫານແຂວງຜົ້ງສາລີ ໄດ້ຈັດກອງປະຊຸມສະຫຼຸບວຽກງານພະລາທິການປະຈໍາປີ 2024 ແລະ ວາງທິດທາງແຜນການປະຈໍາປີ 2025, ໂດຍການເປັນປະທານຂອງ ສະຫາຍ ພົນຈັດຕະວາ ຊຽງເພັງ ບົວລະວົງ ເລຂາຄະນະພັກ ຫົວໜ້າການເມືອງ ກອງບັນຊາການທະຫານແຂວງຜົ້ງສາລີ, ເຂົ້າຮ່ວມມີ ສະຫາຍ ພັນເອກ ວິໄລ ແພງສົມເຮືອງ ຮັກສາການຫົວໜ້າການທະຫານກອງບັນຊາການທະຫານແຂວງ, ມີຄະນະພັກ-ຄະນະບັນຊາອົງການ 05 ຫ້ອງ, ກອງບັນຊາການທະຫານເມືອງ 07 ເມືອງ ແລະ ກົມກອງທີ່ຂຶ້ນກັບເຂົ້າຮ່ວມ.

ສະຫາຍ ພັນເອກ ບຸນຈັນ ທອງອ່ອນປະເສີດ ຄະນະພັກກອງບັນຊາການທະຫານແຂວງ ຫົວໜ້າຫ້ອງພະລາທິການ, ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານພະລາທິການປະຈໍາປີ 2024 ແລະທິດທາງແຜນການປີ 2025, ວຽກງານປັບປຸງກໍ່ສ້າງກໍາລັງໄດ້ສຶກສາອົບການເມືອງແນວຄິດໃຫ້ພະນັກງານນັກຮົບທີ່ເຮັດວຽກງານພະລາທິການຕິດພັນກັບໜ້າທີ່ການເມືອງຕົວຈິງມີການຫັນປ່ຽນຢ່າງຕັ້ງໜ້າ, ວຽກງານຮັບປະກັນຊິວິດການເປັນຢູ່, ຮັບປະກັນໃຫ້ພະນັກງານ-ນັກຮົບຢູ່ບັນດາກົມກອງໄດ້ກິນເຂົ້າ 3 ຄາບ, ການຈັດຕັ້ງລ້ຽງດູກອງທັບສາມາດເກັບຊື້ເຂົ້າກິນໃນທົ່ວທະຫານແຂວງ 874.658 ກິໂລກຼາມ, ທຽບໃສ່ປີຜ່ານມາເພີ່ມຂຶ້ນ 318.159 ກິໂລກຼາມ, ດ້ານຊີ້ນ ແລະຜັກກິນສາມາດປະຕິບັດໄດ້ ຊີ້ນກິນ 112.216 ກິໂລກຼາມ, ຜັກກິນ 172.796 ກິໂລກຼາມ, ເຄື່ອງນຸ່ງຫົ່ມໄດ້ເບີກຈ່າຍຕາມລະບົບອັດຕາທີ່ໄດ້ກໍານົດໄວ້, ວຽກງານການເງິນສາມາດປະຕິບັດລາຍຮັບທັງໝົດ 119,938,100,000 ກີບ, ລາຍຈ່າຍ 119,937,600,000 ກີບ, ວຽກງານນໍ້າມັນເຊື້ອໄຟຮັບ-ຈ່າຍນໍ້າມັນເພື່ອເຄື່ອນໄຫວປະຕິບັດວຽກງານຮອບດ້ານຕາມແຜນການທີ່ໄດ້ກໍານົດໄວ້ໃນແຕ່ລະໄລຍະ, ວຽກງານຂົນສົ່ງການເຄື່ອນຍ້າຍວັດຖຸ, ຂົນສົ່ງກໍາລັງໄດ້ 127 ຖ້ຽວ, ບໍລິມາດຂົນສົ່ງ 444,3 ໂຕນ, ວຽກງານເສນາຮັກ ທົ່ວກົມກອງໃນທົ່ວທະຫານແຂວງມີພະນັກງານ-ນັກຮົບແຂງແຮງສະເລ່ຍ 98%, ໂຮງໝໍທະຫານແຂວງຮັບຄົນເຈັບເຂດນອກ 2.322 ເທື່ອຄົນ, ເຂົ້ານອນໂຮງໝໍ 215 ເທື່ອຄົນ, ວຽກງານກໍ່ສ້າງ-ຄຸ້ມຄອງຊັບສິນ, ມີສິ່ງປູກສ້າງທັງໝົດ 445 ຫຼັງ, ເຮືອນຖາວອນ 184 ຫຼັງ, ເຄິ່ງຖາວອນ 151 ຫຼັງ, ວຽກງານຜະລິດກະສິກໍາ ປູກຝັງ-ລ້ຽງສັດ ຕາມທິດ 4 ປູກ 4 ລ້ຽງ, ປູກພືດຜັກໄດ້ 33.610 ກິໂລກຼາມ, ພືດທີ່ເປັນສິນຄ້າ 13.572 ກິໂລກຼາມ, ໄມ້ອຸດສາຫະກໍາ 14.564 ກິໂລກຼາມ, ລາຍຮັບຈາກການປູກ-ການລ້ຽງສັດທັງໝົດ 3,704,324,500 ກີບ, ວຽກງານພົວພັນຮ່ວມມືກັບຕ່າງປະເທດ, ໄດ້ພົວພັນກັບເພື່ອນມິດຍຸດທະສາດເປັນຕົ້ນແມ່ນ ສສ ຫວຽດນາມ ແລະ ສປ ຈີນ ໃນການແລກປ່ຽນບົດຮຽນຂໍ້ມູນຂ່າວສານຕ່າງໆ, ທິດທາງແຜນການລວມ ປີ 2025 ສືບຕໍ່ປະຕິບັດຕາມມະຕິຂອງກອງປະຊຸມໃຫຍ່ ຄັ້ງທີ XI ຂອງພັກ, ມະຕິ V ຂອງອົງຄະນະພັກກະຊວງປ້ອງກັນປະເທດ ວ່າດ້ວຍ 4 ໜ້າທີ່ໃຫຍ່ 26 ແຜນງານ, ໂດຍສຸມໃສ່ທ່າແຮງບົ່ມຊ້ອນຂອງວຽກງານພະລາທິການທີ່ມີຢູ່ຂອງກົມກອງໃຫ້ມີຄວາມຟົດຟື້ນ ແລະ ເຂັ້ມແຂງ, ໃນກອງປະຊຸມຄະນະຜູ້ແທນໄດ້ພັດປ່ຽນກັນປະກອບຄໍາຄິດຄໍາເຫັນໃສ່ບົດສະຫຼຸບ ແລະ ທິດທາງແຜນການຢ່າງກົງໄປກົງມາ ໃຫ້ມີເນື້ອໃນຄົບຖ້ວນ, ສົມບູນ ພ້ອມກັນແກ້ໄຂດ້ານອ່ອນຂໍ້ຄົງຄ້າງ, ປັບປຸງແບບແຜນວິທີເຮັດວຽກ ເພື່ອຈັດຕັ້ງປະຕິບັດໃຫ້ມີຜົນສໍາເລັດ ແລະ ປະກົດຜົນເປັນຈິງເທື່ອລະກ້າວ.

ໂອກາດດຽວກັນນີ້, ສະຫາຍ ພົນຈັດຕະວາ ຊຽງເພັງ ບົວລະວົງ ປະທານກອງປະຊຸມໄດ້ໂອ້ລົມ, ເຊິ່ງໄດ້ຍ້ອງຍໍຊົມເຊີຍຕໍ່ຜົນສໍາເລັດທີ່ຫ້ອງພະລາທິການ ແລະ ບັນດາກົມກອງໃນທົ່ວທະຫານແຂວງຍາດມາໄດ້ໃນໜຶ່ງປີຜ່ານມາ, ພ້ອມທັງໄດ້ເນັ້ນໜັກຫຼາຍບັນຫາ ເປັນຕົ້ນແມ່ນຕ້ອງໄດ້ເອົາໃຈໃສ່ສືບຕໍ່ສຶກສາອົບຮົມການເມືອງແນວຄິດໃຫ້ພະນັກງານ, ນາຍ ແລະ ພົນທະຫານຜູ້ທີ່ເຮັດວຽກງານພະລາທິການ ແລະ ການເງິນໃຫ້ມີແນວຄິດອຸ່ນອ່ຽນທຸນທ່ຽງປະຕິບັດໜ້າທີ່ວິຊາສະເພາະຂອງຕົນ, ມີຄວາມບໍລິສຸດສັດຊື່, ໂປ່ງໃສ, ຈັດຕັ້ງປະຕິບັດໃຫ້ຖືກຕ້ອງຕາມຫຼັກການ, ລະບຽບການທີ່ໄດ້ກໍານົດໄວ້ ເພື່ອເຮັດສໍາເລັດໜ້າທີ່ວິຊາສະເພາະທີ່ໄດ້ຮັບມອບໝາຍ, ເອົາໃຈໃສ່ຄຸ້ມຄອງ, ຊຸກຍູ້ສົ່ງເສີມການສ້າງພະລາທິການກັບທີ່, ການບໍລິການຕ່າງໆ, ເພື່ອສ້າງລາຍຮັບໃຫ້ກົມກອງ ແລະ ວຽກງານ 4 ປູກ 4 ລ້ຽງ, ຕາມທ່າແຮງບົ່ມຊ້ອນຂອງກົມກອງ ຕາມທິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ພ້ອມນີ້ ໄດ້ຮຽກຮ້ອງໃຫ້ຄະນະຜູ້ແທນກອງປະຊຸມຈົ່ງນໍາເອົາເນື້ອໃນຈິດໃຈຂອງກອງປະຊຸມໃນນີ້ໄປຈັດຕັ້ງປະຕິບັດໃຫ້ເກີດດອກອອກຜົນ ແລະ ມີຜົນສໍາເລັດເປັນກ້າວໆ.

ຂ່າວ-ພາບ: ທອງສຸກ ຈັນຖະໜອມ.