ໃນວັນທີ 9 ມີນາ 2025, ທ່ານ ສອນສະໜຸກ ສີສຸລາດ ເຈົ້າເມືອງ - ເມືອງຂວາ, ທ່ານ ຫວຽດເຮືອງ ປະທານບໍລິສັດ ຢ່າຮຶງ ການຄ້າຂາເຂົ້າ-ຂາອອກຈຳກັດຜູ້ດຽວ ປະຈຳບ້ານ ນາຕຸ່ນ ເມືອງຂວາ ແຂວງຜົ້ງສາລີ, ທ່ານ ພົມມີ ອິນມະສອນ ຮອງເລຂາພັກເມືອງ ປະທານກວດກາພັກ - ລັດ, ສະມາຊິກສະພາປະຊາຊົນແຂວງ, ທ່ານ ວົງເດືອນ ພູມມີທໍາ ຄະນະປະຈໍາພັກເມືອງ, ຮອງເຈົ້າເມືອງ, ຜູ້ຊີ້ນໍາຂົງເຂດເສດຖະກິດຂັ້ນເມືອງ, ທ່ານ ສົມນຶກ ໄຊຍະຈິດ ຄະນະປະຈໍາພັກເມືອງ ຮອງເຈົ້າເມືອງ, ຜູ້ຊີ້ນໍາຂົງເຂດວັດທະນະທໍາ - ສັງຄົມຂັ້ນເມືອງ ພ້ອມດ້ວຍຄະນະທິມງານຂັ້ນເມືອງ ເລຂາຄະນະພັກຮາກຖານກຸ່ມບ້ານ ດັບກະຈອກໄດ້ລົງມອບເຄື່ອງຊ່ວຍເຫຼືອໃຫ້ຄອບຄົວທີ່ທຸກຍາກຈໍານວນ 05 ບ້ານທີ່ຂຶ້ນກັບກຸ່ມດັບກະຈອກ ຈໍານວນ 41 ຄອບຄົວ, ເຄື່ອງທີ່ນໍາມາມອບໃນຄັ້ງນີ້ປະກອບມີເຄື່ອງນຸ່ງ, ອາຫານແຫ້ງ. ລວມມູນຄ່າ 27,770,000 ກີບ. ທ່ານ ອຸດອນ ວິລະຈິດໄດ້ ກ່າວວ່າ: ເຄື່ອງດັ່ງກ່າວແມ່ນໄດ້ຮັບການຊ່ວຍເຫຼືອຈາກ ທ່ານ ຫວຽດເຮືອງ ປະທານບໍລິສັດ ບໍລິສັດ ຢ່າຮຶງ ການຄ້າ ຂາເຂົ້າ - ຂາອອກຈຳກັດຜູ້ດຽວ ປະຈຳບ້ານນາຕຸ່ນເມືອງ ຂວາ ແຂວງຜົ້ງສາລີ ເພື່ອບັນເທົ່າທຸກຂອງປະຊາຊົນທີ່ຢູ່ເຂດຫ່າງໄກຊອກຫຼີກ ເວົ້າລວມ, ເວົ້າສະເພາະແມ່ນຄອບຄົວຜູ້ທຸກຍາກ ຂາດເຂີນ, ໂອກາດດັ່ງກ່າວ ທ່ານ ສອນສະໜຸກ ສີສຸລາດ ເຈົ້າເມືອງ - ເມືອງຂວາ ໄດ້ກ່າວວ່າ: ດ້ວຍຄວາມເປັນຫ່ວງເປັນໄຍຂອງພັກ - ລັດຂັ້ນເທິງ ກໍຄືບໍລິສັດຢ່າຮຶງ ການຄ້າຂາເຂົ້າ - ຂາອອກຈຳກັດຜູ້ດຽວ ທີ່ມີຕໍ່ພໍ່ແມ່ປະຊາຊົນ ຄອບຄົວຜູ້ທຸກຍາກ ຈິ່ງໄດ້ນໍາເອົາເຄື່ອງອຸປະໂພກ ແລະ ບໍລິໂພກມາມອບໃຫ້ ເຖິງວ່າຈະມີມູນຄ່າບໍ່ຫຼາຍກໍ່ຕາມ ແລະ ໄດ້ແນະນໍາໃຫ້ອົງການປົກຄອງບ້ານ, ພໍ່ແມ່ປະຊາຊົນ ນໍາໃຊ້ເຄື່ອງດັ່ງກ່າວໃຫ້ເກີດປະໂຫຍດສູງສຸດ, ໃນໂອກາດໜ້າ ຖ້າຫາກໄດ້ຮັບການຊ່ວຍເຫຼືອຈາກຂັ້ນເທິງ ຫຼື ພາກສ່ວນອື່ນກໍ່ຈະນໍາມາມອບໃຫ້ບັນດາຄອບຄົວຕື່ມອີກ.

ໂອກາດນີ້. ທາງອົງປົກຄອງບ້ານແຕ່ລະບ້ານຕາງໜ້າພໍ່ແມ່ ປະຊາຊົນ ກ່າວສະແດງຄວາມຍ້ອງຍໍຊົມເຊີຍ ແລະ ຂອບໃຈເປັນຢ່າງຍິງຕໍ່ບໍລິສັດ ແລະ ທ່ານ ເຈົ້າເມືອງພ້ອມ ດ້ວຍຄະນະທິມງານ ທີ່ໄດ້ປະກອບສ່ວນເຄື່ອງຊ່ວຍເຫຼືອໃຫ້ ພໍ່ແມ່ປະຊາຊົນໃນຄັ້ງນີ້ ແລະ ຫວັງວ່າໂອກາດໜ້າຈະໄດ້ ຮັບການຊ່ວຍເຫຼືອຕື່ມອີກ.