ປະກາດແຕ່ງຕັ້ງຫົວໜ້າການທະຫານກອງບັນຊາການທະຫານແຂວງຜົ້ງສາລີ ແລະ ມອບ-ຮັບວຽກລະຫວ່າງຫົວໜ້າການທະຫານຜູ້ເກົ່າ ແລະ ຜູ້ໃໝ່.
14 Mar 2025 | ທອງສຸກ ຈັນຖະໜອມ |
ໂດຍອີງໃສ່ກົດໝາຍນາຍທະຫານກອງທັບປະຊາຊົນລາວສະບັບເລກທີ 43/ສພຊ ລົງວັນທີ 14 ມິຖຸນາ 2018 ວ່າດ້ວຍການແຕ່ງຕັ້ງ ແລະຍົກຍ້າຍນາຍທະຫານ. ວັນທີ 14 ມີນາ 2025 ນີ້, ຢູ່ທີ່ສະໂມສອນກອງບັນຊາການທະຫານແຂວງຜົ້ງສາລີ ໄດ້ເປີດພິທີປະກາດແຕ່ງຕັ້ງຫົວໜ້າການທະຫານກອງບັນຊາການທະຫານແຂວງຜົ້ງສາລີ ແລະ ມອບ-ຮັບໜ້າທີ່ລະຫວ່າງຫົວໜ້າການທະຫານຜູ້ເກົ່າ ແລະ ຜູ້ໃໝ່, ໂດຍການເປັນທານຂອງ ສະຫາຍ ຄໍາຜອຍ ວັນນະສານ
ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຜົ້ງສາລີ ປະທານຄະນະກໍາການປ້ອງກັນຊາດ-ປ້ອງກັນຄວາມສະຫງົບແຂວງ, ສະຫາຍ ພົນຈັດຕະວາ ຊຽງເພັງ ບົວລະວົງ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງຜົ້ງສາລີ ຮອງປະທານຄະນະກໍາການປ້ອງກັນຊາດ-ປ້ອງກັນຄວາມສະຫງົບແຂວງ ຜູ້ປະຈໍາການ, ມີຄະນະຈັດຕັ້ງແຂວງ, ຫ້ອງວ່າການແຂວງ, ຫ້ອງການຄະນະກໍາມະການປ້ອງກັນຊາດ-ປ້ອງກັນຄວາມສະຫງົບແຂວງ, ຄະນະກອງບັນຊາການປ້ອງກັນຄວາມສະຫງົບແຂວງ, ຄະນະພັກ-ຄະນະບັນຊາກອງບັນຊາການທະຫານແຂວງ, ພະນັກງານຫຼັກແຫຼ່ງອົງການ 5 ຫ້ອງ, ບັນດາກົມກອງໃນທົ່ວທະຫານແຂວງ, ນາຍ ແລະ ພົນທະຫານເຂົ້າຮ່ວມ.
ສະຫາຍ ໂນ ດວງສີປະເສີດ ຫົວໜ້າຂະແໜງພະນັກງານ ຄະນະຈັດຕັ້ງແຂວງຜົ້ງສາລີ ໄດ້ຜ່ານດໍາລັດຂອງນາຍົກລັດຖະມົນຕີແຫ່ງ ສປປ ລາວ ສະບັບເລກທີ 81/ນຍ ນະຄອນຫຼວງວຽງຈັນ ວັນທີ 05 ກຸມພາ 2025 ວ່າດ້ວຍການແຕ່ງຕັ້ງຫົວໜ້າການທະຫານກອງບັນຊາການທະຫານແຂວງຜົ້ງສາລີ, ນາຍົກລັດຖະມົນຕີອອກດໍາລັດ: ແຕ່ງຕັ້ງ ສະຫາຍ ພັນເອກ ວິໄລ ແພງສົມເຮືອງ ເປັນຫົວໜ້າການທະຫານກອງບັນຊາການທະຫານແຂວງຜົ້ງສາລີ, ຈາກນັ້ນ ສະຫາຍ ພັນເອກ ຄໍາພອນ ແສນສີວົງສາ ຫົວໜ້າການທະຫານກອງບັນຊາການທະຫານແຂວງຜົ້ງສາລີ ຜູ້ເກົ່າໄດ້ຜ່ານບົດບັນທຶກມອບ-ຮັບວຽກ ພ້ອມທັງເຊັນບົດບັນທຶກມອບ-ຮັບວຽກດັ່ງກ່າວໂດຍສ່ອງໜ້າພາກສ່ວນທີ່ກ່ຽວຂ້ອງເປັນສັກຂີພິຍານ.
ໃນພິທີທີ່ມີຄວາມໝາຍສໍາຄັນດັ່ງກ່າວ ສະຫາຍ ຄໍາຜອຍ ວັນນະສານ ປະທານພິທີໄດ້ໂອ້ລົມ ເຊິ່ງໄດ້ຍ້ອງຍໍຊົມເຊີຍຕໍ່ໝາກຜົນທີ່ຍາດມາໄດ້ຕະຫຼອດໄລຍະທີ່ຜ່ານມາ, ພ້ອມທັງໄດ້ເນັ້ນໜັກໃຫ້ຜູ້ທີ່ໄດ້ຮັບໜ້າທີ່ໃໝ່ຕ້ອງເຊື່ອມຊຶມກໍາແໜ້ນຢ່າງເລິກເຊິ່ງ ຕໍ່ແນວທາງກໍ່ຄືວຽກງານປ້ອງກັນຊາດ, ປ້ອງກັນຄວາມສະຫງົບ ພາຍໃຕ້ການນໍາພາ-ຊີ້ນໍາເດັດຂາດ ໂດຍກົງຮອບດ້ານຂອງພັກ, ຄະນະບັນຊາແຕ່ລະຂັ້ນ ຕ້ອງຮູ້ນໍາພາ-ຊີ້ນໍາ ເຮັດໃຫ້ວຽກງານ ປກຊ-ປກສ ກາຍເປັນໜ້າທີ່ຂອງທົ່ວປວງຊົນ ແລະ ເຂົ້າຮ່ວມຈັດຕັ້ງປະຕິບັດຢ່າງເຂັ້ມງວດ. ເພີ່ມທະວີຄວາມສາມັກຄີ, ຄວາມເປັນເອກະພາບ ພາຍໃນຄະນະພັກ, ຄະນະບັນຊາໃຫ້ໜັກແໜ້ນ, ຍົກສູງຄວາມຮັບຜິດຊອບຕໍ່ການປະຕິບັດໜ້າທີ່, ເຊີດຊູຈິດໃຈຮັບໃຊ້ຊາດ, ຮັບໃຫ້ປະຊາຊົນ, ເຮັດແທ້ທຳຈິງ ນຳຜົນປະໂຫຽດຕົວຈິງມາສູ່ປະຊາຊົນ ແລະ ຍົກສູງຄວາມເປັນແບບຢ່າງນຳໜ້າ, ປັບປຸງແບບແຜນນໍາພາ, ແບບແຜນວິທີເຮັດວຽກ ໃຫ້ສອດຄ່ອງກັບສະພາບຕົວຈິງ, ມີລັກສະນະວິທະຍາສາດ; ກຳ ແໜ້ນທີ່ຕັ້ງພາລະບົດບາດ, ສິດໜ້າທີ່ຂອງຕົນ ເປັນຕົ້ນແມ່ນປະຕິບັດ 7 ລະບອບ, 18 ໃຫ້ຖືກຕ້ອງ ແລະ ເຂັ້ມງວດ ເພື່ອສ້າງຄວາມເຂັ້ມແຂງທາງດ້ານວິຊາສະເພາະ, ເອົາໃຈໃສ່ສ້າງຄວາມເຂັ້ມແຂງດ້ານພາລາທິການກັບທີ່ ຕິດພັນກັບການສ້າງວຽກດີຄົນເດັ່ນເພື່ອລາຍງານ ຕໍ່ກອງປະຊຸມໃຫ່ຍອົງຄະນະພັກຂອງຕົນ ໃຫ້ມີເນື້ອໃນເລິກເຊິ່ງ ແລະ ມີບັນຍາກາດຟົດຟື້ນ, ສືບຕໍ່ສຸມໃສ່ສະກັດກັ້ນ, ແກ້ ແລະ ມ້າງ 9 ໜໍ່ແໜ່ງທີ່ກໍ່ໃຫ້ເກີດປະກົດການຫຍໍ້ທໍ້ໃນສັງຄົມ, ໃຫ້ແຂງແຮງ ແລະ ເຂັ້ມງວດກ່ວາເກົ່າ.
Share:
