ຮອງເຈົ້າແຂວງຜົ້ງສາລີ ເນັ້ນໜັກ 5 ປະເດັ່ນຕໍ່ຜູ້ເຂົ້າຮ່ວມກອງປະຊຸມຮັບຮອງຜົນການປະເມີນເຂດຫ່າງໄກສອກຫຼີກ ແລະ ທຸລະກັນດານ ໃນທົ່ວແຂວງ ປະຈໍາປີ 2025
02 Apr 2025 | ຂ່າວ, ພາບ: ສົມຄິດ |
ໃນໂອກາດທີທ່ານ ຄໍາເຫຼັກ ໃຈອີສານ ຮອງເຈົ້າແຂວງຜົ້ງສາລີ ໄດ້ເຂົ້າຮ່ວມເປັນປະທານ ໃນກອງປະຊຸມຮັບຮອງຜົນການປະເມີນເຂດຫ່າງໄກສອກຫຼີກ ແລະ ທຸລະກັນດານ ໃນທົ່ວແຂວງ ປະຈໍາປີ 2025 ທີຈັດຂື້ນໃນວັນທີ 2 ເມສາ 2025 ນີ້ ທີ່ຫ້ອງປະຊຸມຊັ້ນ 3 ສໍານັກງານປົກຄອງແຂວງນັ້ນ, ເພື່ອແນ່ໃສ່ເຮັດໃຫ້ການປະເມີນເຂດຫ່າງໄກສອກຫຼີກ ແລະ ທຸລະກັນດານ ໄດ້ຮັບຜົນດີ, ບັນລຸຕາມລະດັບຄາດໝາຍ, ຮັບປະກັນໃຫ້ຖືກຕ້ອງສອດຄ່ອງຕາມ ດໍາລັດ, ຄໍາແນະນໍາຂອງສູນກາງນັ້ນ, ທ່ານ ຄຳເຫຼັກ ໃຈອີສານ ໄດ້ເນັ້ນໜັກ 5 ປະເດັ່ນຫຼັກ ຕໍ່ຜູ້ທີເຂົ້າຮ່ວມກອງປະຊຸມວ່າ:
1) ເພີ່ມທະວີໃນການຄົ້ນຄວ້າ, ເຊື່ອມຊຶມ ແລະ ກຳແໜ້ນ ມະຕິ, ຄຳສັ່ງ ແລະ ບັນດານິຕິກຳທີ່ກ່ຽວຂ້ອງ ໂດຍສະເພາະ ດໍາລັດ ຂອງລັດຖະບານ ສະບັບເລກທີ 292/ລບ, ຄໍາແນະນໍາ ຂອງກະຊວງພາຍໃນ ສະບັບເລກທີ 07/ພນ ໃຫ້ລະອຽດເລິກເຊິ່ງ ເພື່ອເປັນບ່ອນອີງໃນການປະເມີນ ແລະ ການປະຕິບັດນະໂຍບາຍຕໍ່ພະນັກງານ-ລັດຖະກອນທີ່ໄປປະຕິບັດໜ້າທີ່ ຢູ່ເຂດຫ່າງໄກສອກຫຼີກ ແລະ ທຸລະກັນດານ ໃຫ້ຖືກຕ້ອງ ແລະ ແທດເຖິງ;
2) ການປະເມີນທຸກຄັ້ງ, ຄະນະຮັບຜິດຊອບການປະເມີນກໍ່ຄືຂະແໜງການກ່ຽວຂ້ອງຂັ້ນເມືອງ ຕ້ອງໄດ້ລົງເກັບກໍາສໍາຫຼວດຂໍ້ມູນຕົວຈິງໃຫ້ລະອຽດ ແລະ ດໍາເນີນການປະເມີນ, ຈັດລະດັບເຂດບ້ານໃຫ້ຖືກຕ້ອງສອດຄ່ອງຕາມນິຕິກໍາທີ່ໄດ້ວາງອອກ ເນື່ອງຈາກວຽກດັ່ງກ່າວເປັນວຽກທີ່ຕິດພັນກັບການໃຊ້ຈ່າຍງົບປະມານຂອງລັດ ແລະ ຕິດພັນກັບການປະຕິບັດນະໂຍ ບາຍຊຸກຍູ້ໃຫ້ພະນັກງານ-ລັດຖະກອນ ໄປປະຕິບັດໜ້າທີ່ຢູ່ເຂດດັ່ງກ່າວໃຫ້ໄດ້ຮັບຜົນສຳເລັດ ແລະ ດີຂຶ້ນກວ່າເກົ່າ;
3) ມອບໃຫ້ພາກສ່ວນກ່ຽວຂ້ອງຂັ້ນແຂວງ ແລະ ຂັ້ນເມືອງ ຕ້ອງໄດ້ຖືເອົາວຽກງານດັ່ງກ່າວ ເປັນວຽກງານໜຶ່ງທີ່ມີຄວາມສໍາຄັນ ແລະ ເປັນຄວາມຮັບຜິດຊອບໂດຍກົງໃນການຊີ້ນໍາ-ນໍາພາຈັດຕັ້ງປະຕິບັດໃຫ້ໄດ້ຮັບຜົນດີ;
4) ຄະນະຮັບຜິດຊອບແຕ່ລະຂັ້ນ ຕ້ອງສ້າງແຜນການ, ແຜນງານ ແລະ ງົບປະມານຂອງຕົນ ເພື່ອຮັບໃຊ້ການເຄື່ອນໄຫວວຽກງານ ແລະ ສະເໜີຂັ້ນເທິງອະນຸມັດ ຕາມຄວາມເໝາະສົມ;
5) ພາຍສໍາເລັດກອງປະຊຸມຄັ້ງນີ້ ມອບໃຫ້ພະແນກພາຍໃນແຂວງ ເຮັດບົດລາຍງານເຖີງແຂວງ ເພື່ອພິຈາລະນາ ແລະ ນໍາສະເໜີຫາສະພາປະຊາຊົນແຂວງພິຈາລະນາຮັບຮອງລາຍຊື່ບ້ານເຂດຫ່າງໄກສອກຫຼີກ ແລະ ທຸລະກັນດານໃນທົ່ວແຂວງ, ຫຼັງຈາກນັ້ນໃຫ້ເຮັດບົດລາຍງານເຖີງກະຊວງພາຍໃນ ຕາມວັນເວລາທີ່ໄດ້ກໍານົດໃນດໍາລັດດັ່ງກ່າວ
Share:
