ແຂວງຜົ້ງສາລີສະຫຼູບໂຄງການຈົດທະບຽນ ແລະ ສະຖິຕິພົນລະເມືອງປີ 2024
18 Mar 2025 | ສົມຄິດ |
ເພື່ອເຮັດໃຫ້ພົນລະເມືອງລາວທຸກຄົນ ຕ້ອງໄດ້ຊົມໃຊ້ການບໍລິການຂອງລະບົບຈົດທະບຽນ ແລະ ສະຖິຕິພົນລະເມືອງແບບອອນລາຍ ຫຼື ເອເລັກໂຕຣນິກ ຢ່າງທົ່ວເຖິງ ແລະ ມີປະສິດທິພາບ, ຊຶ່ງເປັນການອໍານວຍຄວາມສະດວກໃຫ້ແກ່ການປະຕິບັດສິດ ແລະ ຜົນປະໂຫຍດຂອງພົນລະເມືອງ, ການສະໜັບສະໜູນການປົກຄອງທີ່ດີ ແລະ ເປົ້າໝາຍການພັດທະນາແບບຍືນຍົງນັ້ນ.ໃນວັນທີ 18 ມີນາ 2025 ນີ້ ທີ່ຫ້ອງປະຊຸມຊັ້ນ 3 ສໍານັກງານປົກຄອງແຂວງ
ໄດ້ຈັດກອງປະຊຸມສະຫຼູບການຈັດຕັ້ງປະຕິບັດກິດຈະກໍາຂອງໂຄງການຈົດທະບຽນ ແລະ ສະຖິຕິພົນລະເມືອງປະຈໍາປີ 2024 ແລະ ວາງທິດທາງແຜນການປະຈໍາປີ 2025 ຂື້ນ ໂດຍການເປັນປະທານຂອງ ທ່ານ ພອນປະດິດ ທິບມະນີວົງ ຫົວໜ້າພະແນກພາຍໃນແຂວງຜົ້ງສາລີ; ເຂົ້າຮ່ວມກອງປະຊຸມມີບັນດາທ່ານຄະນະພະແນກການ, ອົງການທຽບເທົ່າອ້ອມຂ້າງແຂວງ ແລະ ຫ້ອງການພາຍໃນ 7 ເມືອງ.
ໂຄງການຈົດທະບຽນ ແລະ ສະຖິຕິພົນລະເມືອງ ແມ່ນເພື່ອເປັນການປັບປຸງອັດຕາການຈົດທະບຽນ ເຫດການສໍາຄັນໃນຊີວິດຂອງພົນລະເມືອງ ໂດຍສະເພາະການເກີດ ແລະ ການເສຍຊີວິດ ຢູ່ ສປປ ລາວ ໃຫ້ສູງຂື້ນ ເວົ້າລວມ, ເວົ້າສະເພາະປັບປຸງອັດຕາການຈົດທະບຽນການເກີດ ແລະ ການເສຍຊີວິດຢູ່ແຂວງຜົ້ງສາລີໃຫ້ສູງຂື້ນ ໂດຍການໃຊ້ລະບົບຂໍ້ມູນພົນລະເມືອງ ເອເລັກໂຕຣນິກ(ECRVS)ທີທັນສະໄໝ ສະດວກ ແລະ ວອງໄວ. ເຊີງມາຮອດປະຈຸບັນທົ່ວແຂວງຜົ້ງສາລີ ມີຈໍານວນ 46,961 ຄອບຄົວ, ມີຈໍານວນພົນລະເມືອງລວມ 201,412 ຄົນ; ຍິງ100,755 ຄົນ.
Share:
