ຫົວໜ້າກົງສູນໃຫຍ່ຫວຽດນາມ ປະຈໍາຫຼວງພະບາງ ພ້ອມດ້ວຍຄະນະທິມງານ ເຄື່ອນໄຫວເຮັດວຽກຢູ່ເມືອງບຸນເໜືອ
16 Mar 2025 | ພາບ-ຂ່າວ: ນາງ ຈັນສະໝອ |
ເພື່ອເປັນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫ່ຍ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດ ນາມ ເວົ້າລວມ,ເວົ້າສະເພາະເມືອງບຸນເໜືອ ກັບ ສະຖານກົງສຸນໃຫຍ່ ແຫ່ງ ສສ ຫວຽດນາມ ປະຈຳພາກເໜືອລາວ ທີ່ຫຼວງພະບາງ ໃຫ້ເຂົ້າສູ່ລວງເລິກຢ່າງບໍ່ຍຸດຢັ້ງ ແລະ ຕິດພັນກັບການ ກະກຽມສະເຫຼີມສະຫຼອງ 3ວັນປະຫວັດສາດຄື:
ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ; ວັນຊາດທີ 2ທັນວາ ຄົບຮອບ 50ປີ ແລະ ວັນຄ້າຍວັນເກີດ ຂອງປະທານ ໄກສອນ ພົມວີຫານ ຄົບຮອບ 105ປີນັ້ນ. ໃນວັນທີ 16 ມີນາ 2025,ທ່ານ ນາງ ກ່ຽວ ທີຮັງຟຸກ ຫົວໜ້າກົງສູນໃຫຍ່ຫວຽດນາມ ປະຈໍາຫຼວງພະບາງ ພ້ອມດ້ວຍຄະນະທິມງານ ເຄື່ອນໄຫວເຮັດວຽກຢູ່ເມືອງບຸນເໜືອ, ໂດຍມີ ທ່ານ ສົມພາບ ດາລາຈັກ ກຳມະການພັັກແຂວງ ເລຂາພັກເມືອງ ເຈົ້າເມືອງໆ ບຸນເໜືອ ພ້ອມດ້ວຍຄະນະນຳຂອງເມືອງ, ອົງການຂັ້ນແຂວງ, ເມືອງ ຕະຫຼອດຮອດ ປະຊາຊົນບັນດາບ້ານເປົ້າໝາຍໃນເທດສະບານເມືອງເຂົ້າຮ່ວມ.
ໂອກາດດັ່ງກ່າວທ່ານ ຫົວໜ້າກົງສູນໃຫຍ່ຫວຽດນາມ ປະຈໍາຫຼວງພະບາງ ພ້ອມດ້ວຍຄະນະທິມງານ ເຄື່ອນໄຫວເຮັດວຽກ ໄດ້ກ່າວວ່າໂດຍປະຕິບັດຕາມແນວທາງການຕ່າງປະເທດ ຂອງສູນກາງພັກ-ລັດຖະບານວາງອອກ ແຂວງກໍ່ໄດ້ພົວພັນຮ່ວມມືກັບ ແຂວງ, ນະຄອນ,ເມືອງໃກ້ຄຽງຂອງ ສສຫວຽດ ນາມ ແລະ ສປຈີນ ດ້ວຍການພົວພັນຮ່ວມມືແລກປ່ຽນຄະນະຜູ້ແທນ, ການຊ່ວຍເຫຼືອເປັນໂຄງການສະເພາະ; ການສ້າງຊັບພະຍາກອນມະນຸດ ແລະ ອື່ນໆ; ພ້ອມກັນນັ້ນ ກໍ່ໄດ້ເອົາໃຈຮ່ວມມືກັບບັນດາອົງການຈັດຕັ້ງສາກົນ ທີ່ຂຶ້ນກັບລັດຖະບານ ແລະ ບໍ່ຂຶ້ນກັບລັດຖະບານ ໂດຍຜ່ານໂຄງການຊ່ວຍເຫຼືອຕ່າງໆ ເປັນຢ່າງດີ ແລະ ເຫັນວ່າການພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງປະຊາຊົນ ໄດ້ສຸມໃສ່ການກໍ່ສ້າງ ແລະ ຍົກລະດັບພື້ນຖານໂຄງລ່າງ ຮັບໃຊ້ແກ່ການພັດທະນາ, ການດໍາລົງຊີວິດ ແລະ ການແກ້ໄຂຄວາມທຸກຍາກ ຂອງປະຊາຊົນ ເປັນຕົ້ນແມ່ນ ການຍົກລະດັບໂຄງລ່າງດ້ານໂຮງຮຽນ,ໂຮງໝໍ ແລະ ອື່ນໆ ໄດ້ຫັນພະນັກງານລົງນໍາພາປະຊາຊົນເຮັດຕົວຈິງ ຍັງມີບາງບ້ານ , ບາງຄອບຄົວ, ຍັງບໍ່ພົ້ນທຸກ. ຄະນະຜູ້ແທນສສ ຫວຽດນາມ ເຄື່ອນໄຫວ ຄັ້ງນີ້ຊຽວຊານແພດໄດ້ກວດພະຍາດໃຫ້ຄອບຄົວຜູ້ທຸກຍາກບັນດາບ້ານໃນທົ່ວເມືອງບຸນເໜືອ ພ້ອມຊ່ວຍອຸປະກອນຈຳນວນໜຶ່ງເຊັ່ນ ປະເພດຢາປົວພະຍາດ, ເຂົ້າສານ ລວມມີ 321 ຄົນ ລວມມູນຄ່າທັງໝົດ 330.900.000 ດົງ ຊຶ່ງທັງໝົດນັ້ນ ໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງເມືອງ ແລະ ການແກ້ໄຂຄວາມທຸກຍາກຂອງປະຊາຊົນໃຫ້ຫຼຸດລົງເທື່ອລະກ້າວ.
ໂອກາດທີ່ມີຄວາມໝາຍ ຄວາມສຳຄັນນີ້ ທ່ານ ສົມພາບ ດາລາຈັກ ກຳມະການພັກແຂວງ ເລຂາພັກເມືອງ ເຈົ້າເມືອງບຸນເໜືອ ຕາງໜ້າຄະນະນຳຂັ້ນເມືອງ ໄດ້ສະແດງ ຄວາມຮູ້ບຸນຄຸນ ກ່າວຂອບໃຈພ້ອມອວຍພອນອັນປະເສີດໃຫ້ ທ່ານ ນາງ ກ່ຽວ ທີຮັງຟຸກ ພ້ອມດ້ວຍ ຄະນະທິມງານ ທີ່ໄດ້ເຫັນຄວາມສໍາຄັນ ຕໍ່ມິດຕະພາບລະຫວ່າງເມືອງບຸນເໜືອ ແຂວງຜົ້ງສາລີ ແຫ່ງ ສປປ ລາວ ແລະ ສະຖານກົງສູນໃຫຍ່ ແຫ່ງ ສສ ຫວຽດນາມ ປະຈໍາແຂວງຫຼວງພະບາງ ພ້ອມດ້ວຍ ຄະນະທິມງານຊ່ຽວຊານແພດຫວຽດນາມ ທີ່ໄດ້ນໍາເອົາຄວາມອົບອຸ່ນ ແລະ ນະໂຍບາຍກໍ່ຄືວັດຖຸປັດໃຈມາຊ່ວຍເຫຼືອ ພ້ອມທັງກວດພະຍາດ ແລະ ແຈກຢາປົວພະຍາດ ໃຫ້ແກ່ພໍ່ແມ່ປະຊາຊົນບັນດາເຜົ່າຜູ້ທີ່ທຸກຍາກ ຢູ່ເມືອງບຸນເໜືອ ແຂວງຜົ້ງສາລີຄັ້ງນີ້ ຖືວ່າເປັນເຫດການປະຫວັດສາດສຳຄັນສຳລັບເມືອງບຸນເໜືອ ໃນການເປີດກວ້າງການພົວພັນຮ່ວມມືກັບຕ່າງປະເທດ ແລະ ມີຄວາມໝາຍສຳຄັນໃຫ້ແກ່ການເຊີດຊູສາຍພົວພັນແບບພິເສດ ແລະ ການຮ່ວມມືຮອບດ້ານອີກດ້ວຍ ແລະ ມີຜົນສໍາເລັດສູງ ທີ່ເຕັມໄປດ້ວຍບັນຍາກາດຟົດຟື້ນ ທ່ານມິດສະຫາຍອ້າຍນ້ອງດຽວກັນ.ສະນັ້ນຕາງໜ້າ ຄະນະນໍາຂັ້ນເມືອງ ແລະ ປະຊາຊົນພາຍໃນເມືອງ ຂໍສະແດງຄວາມຂອບອົກຂອບໃຈອັນຈິງໃຈ ແລະ ຄວາມຮູ້ບຸນຄູນຢ່າງລົ້ນເຫຼືອ ມາຍັງສະຫາຍ ກຽວທີ່ຮັ່ງຟຸກ ພ້ອມດ້ວຍຄະນະທິມງານໃນຄັ້ງນີ້ ຢ່າງສຸດອົກສຸດໃຈ. ພວກຂ້າພະເຈົ້າ ພ້ອມແລ້ວທີ່ຈະນຳເອົາວັດຖຸປັດໃຈຕ່າງໆດັ່ງກ່າວໄປນໍາໃຊ້ໃຫ້ເກີດປະໂຫຍດສູງສຸດ; ຫວັງວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງລາວ-ຫວຽດນາມ, ບຸນເໜືອ- ກົງສູນໃຫຍ່ປະຈໍາຫຼວງພະບາງ ຈົ່ງສວຍສົດງົດງາມ ແລະ ໝັ້ນຄົງທະນົງແກ່ນຕະຫຼອດໄປ.
Share:
