ຕອນເຊົ້າວັນທີ 19 ມີນາ 2025 ທີ່ສະໂມສອນ ເມືອງບຸນເໜືອ ແຂວງຜົ້ງສາລີ ໄດ້ຈັດກອງປະຊຸມເສວະນາກ່ຽວກັບການດໍາເນີນທຸລະກິດຂອງລັດວິສາຫະກິດໄຟຟ້າລາວທີ່ຕິດພັນກັບການປັງປຸງໂຄງສ້າງລາຄາໄຟຟ້າໃໝ່ ປີ 2025 - 2029.ພາຍໃຕ້ເປັນປະທານຮ່ວມຂອງທ່ານ ອຸ່ນເນື້ອ ສີວັນເພັງ ຫົວໜ້າສາຂາໄຟຟ້າລາວ ປະຈໍາແຂວງຜົ້ງສາລີ, ທ່ານ ວິສັນ ວົງນະຄອນ ຮອງເລຂາພັກເມືອງບຸນເໜືອ, ທ່ານ
ຄໍາຈັນ ຫຼ້າ ຮອງຫົວໜ້າພະແນກພະລັງງານແລະບໍ່ແຮ່ ແຂວງຜົ້ງສາລີ ເຂົ້າຮ່ວມມີຜູ້ຕາງໜ້າຈາກພະແນກການທີ່ກ່ຽວຂ້ອງ ຕະຫຼອດຮອດຄະນະນໍາບັນດາຫ້ອງການເມືອງບຸນເໜືອ ພ້ອມດ້ວຍອົງການປົກຄອງບ້ານພາຍໃນເທສະບານເຂົ້າຮ່ວມ.
ໃນກອງປະຊຸມ ທ່ານ ອຸ່ນເນື້ອ ສີວັນເພັງ ຫົວໜ້າສາຂາໄຟຟ້າລາວ ປະຈໍາແຂວງຜົ້ງສາລີ ໄດ້ຂຶ້ນນໍາສະເໜີການດໍາເນີນທຸລະກິດຂອງລັດວິສາຫະກິດໄຟຟ້າລາວເຊິ່ງໄດ້ຍົກໃຫ້ເຫັນການຂະຫຍາຍຕົວ ຂອງ ໄຟຟ້າລາວ ຄ່ຽງຄູ່ກັບສັງຄົມ; ສະພາບລວມ ການດໍາເນີນທຸລະກິດ; ການປະຕິຮູບໄຟຟ້າລາວ ໄລຍະຜ່ານມາ ແລະ ແຜນໃນ ຕໍ່ໜ້າ.ທ່ານໃຫ້ຮູ້ວ່າກອງປະຊຸມຄັ້ງນີ້ແມ່ນເພື່ອທໍາຄວາມເຂົ້າໃຈຢ່າງເລິກເຊິ່ງຂຶ້ນຕື່ມ ກ່ຽວກັບການດໍາເນີນທຸລະກິດ ຂອງລັດວິສາຫະກິດໄຟຟ້າລາວ ໂດຍພາຍໃຕ້ການຊີ້ນໍາ ຂອງລັດຖະບານທີ່ຖືກມອບໝາຍໃຫ້ປະຕິບັດ 2 ໜ້າທີ່ສໍາຄັນຄື: ໃຫ້ບໍລິການ ແລະ ສະໜອງໄຟຟ້າ ແກ່ສັງຄົມຢ່າງທົ່ວເຖິງ ແລະ ພຽງພໍ.ດໍາເນີນທຸລະກິດ ຊື້-ຂາຍ ໄຟຟ້າ ເພື່ອເປັນຖານລາຍຮັບທີ່ໝັ້ນຄົງ ໃຫ້ກັບລັດຖະບານ.ນອກຈາກນັ້ນ, ກໍ່ຍັງໄດ້ຮັບຊົມວິດີໂອ ກ່ຽວກັບການເດີນທາງຂອງໄຟຟ້າລາວ ຈາກຕົ້ນກຳເນີດຫາຜູ້ຊົມໃຊ້ໄຟຟ້າ, ເຊິ່ງປັດຈຸບັນ ແຂວງຜົ້ງສາລີ ແມ່ນມີໄຟຟ້າຊົມໃຊ້ທົ່ວທຸກເມືອງ ( 07 ເມືອງ ) ສຳລັບ ເມືອງບຸນເໜືອ ມີຈຳນວນບ້ານ ທັງໝົດ 65 ບ້ານ 4,984 ຄອບຄົວ ເທົ່າກັບ 93.85%, ຄອບຄົວທີ່ໄດ້ຊົມໃຊ້ໄຟຟ້າ 61 ບ້ານ 4,651 ຄອບຄົວ ເທົ່າກັບ 88,10% ແລະ ຍັງບໍ່ໄດ້ໃຊ້ໄຟຟ້າ 04 ບ້ານ 333 ຄອບຄົວ ເທົ່າກັບ 6,68%.ຫຼັງຈາກນັ້ນ, ຜູ້ເຂົ້າຮ່ວມໄດ້ປະກອບຄວາມຄິດເຫັນໂດຍແນໃສບັນດາບັນຫາ, ຂໍ້ຫຍຸ້ງຍາກຕ່າງໆທີ່ເກີດຈາກການນໍາໃຊ້ໄຟຟ້າໄລຍະຜ່ານມາ.
