ກອງປະຊຸມໃຫຍ່ຜູ້ແທນອົງຄະນະພັກເມືອງຂວາ ຄັ້ງທີ XVI ໄດ້ເປີດຂຶ້ນຢ່າງເປັນທາງການໃນຕອນເຊົ້າວັນທີ 20 ມີນາ 2025 ທີ່ສະໂມສອນເມືອງຂວາ, ແຂວງຜົ້ງສາລີ. ໂດຍພາຍໃຕ້ການ ເປັນປະທານ ຂອງສະຫາຍ ສອນສະໜຸກ ສີສຸລາດ ເລຂາຄະນະບໍລິຫານງານພັກເມືອງເຈົ້າເມືອງໆຂວາ,ໃຫ້ກຽດເຂົ້າຮ່ວມຂອງ ສະຫາຍ ຄໍາຜອຍ ວັນນະສານ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຜົ້ງສາລີ, ມີບັນດາສະຫາຍຮອງເລຂາພັກ, ຄະນະປະຈໍາພັກແຂວງ, ຄະນະນໍາກ່ຽວຂ້ອງຂັ້ນແຂວງ, ບັນດາສະຫາຍໃນອົງຄະນະພັກເມືອງ ພ້ອມດ້ວຍແຂກຖືກເຊີນ ແລະ ບັນດາສະຫາຍຜູ້ແທນສົມບູນຈໍານວນ 189 ສະຫາຍ, ຍິງ 25 ສະຫາຍ ທີ່ເປັນຕົວແທນໃຫ້ສະມາຊິກໃນທົ່ວເມືອງ 2,101 ສະຫາຍ, ຍິງ 554 ສະຫາຍ ເຂົ້າຮ່ວມ.

ສະຫາຍ ສອນສະໜຸກ ສີສຸລາດ ເລຂາຄະນະບໍລິຫານງານພັກເມືອງເຈົ້າເມືອງໆຂວາ ໄດ້ກ່າວເປີດກອງປະຊຸມຢ່າງເປັນທາງການພ້ອມທັງຜ່ານຮ່າງບົດລາຍງານການເມືອງສອງພາກ ເຊິ່ງມີບາງຕອນສະຫາຍ ໄດ້ກ່າວວ່າ: ພາຍໃຕ້ການຊີ້ນຳຈາກຄະນະບໍລິຫານງານພັກແຂວງ ແລະ ການນຳພາຂອງຄະນະບໍລິຫານງານພັກເມືອງໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກຂັ້ນຕ່າງໆ ໂດຍສະເພາະແມ່ນ ມະຕິກອງປະຊຸມໃຫຍ່ຄັ້ງທີ XV ຂອງອົງຄະນະພັກເມືອງຂວາ ຕະຫຼອດໄລຍະ 5 ປີຜ່ານມາເຫັນວ່າມີຜົນສໍາເລັດຫຼາຍດ້ານ ເປັນຕົ້ນ ທົ່ວເມືອງຂວາ ແມ່ນມີສະຖຽນລະພາບທາງດ້ານການເມືອງອັນໜັກແໜ້ນ, ທົ່ວສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດ-ສັງຄົມ ມີການພັດທະນາດ້ວຍບາດກ້າວ ແລະ ທ່ວງທ່າໃໝ່, ປະຊາຊົນບັນດາເຜົ່າມີຄວາມສາມັກຄີປອງດອງ, ພື້ນຖານໂຄງລ່າງຂອງເມືອງໄດ້ຮັບການປັບປຸງ, ຊີວິດການເປັນຢູ່ຂອງປະຊາຊົນດີຂຶ້ນເປັນກ້າວໆ, ອັດຕາສ່ວນຄວາມທຸກຍາກໄດ້ຫຼຸດໜ້ອຍຖອຍລົງເທື່ອລະກ້າວ. ເຊິ່ງສະແດງອອກດ້ານເສດຖະກິດມີການຂະຫຍາຍຕົວຢ່າງຕໍ່ເນື່ອງ ແລະ ມີຖ່ວງທ່າດີຂຶ້ນຈາກການຄິດໄລ່ຂໍ້ມູນເສດຖະກິດຂອງເມືອງມີການຂະຫຍາຍຕົວສະເລ່ຍເທົ່າກັບ 5.98%; ໃນນີ້: ຂະແໜງກະສິກໍາ ແລະ ປ່າໄມ້ ຂະຫຍາຍຕົວສະເລ່ຍ 5.83%, ຂະແໜງອຸດສາຫະກໍາ ແລະ ຫັດຖະກໍາ ຂະຫຍາຍຕົວສະເລ່ຍ 6.24% ແລະ ຂະແໜງການບໍລິການ ຂະຫຍາຍຕົວສະເລ່ຍ 5.67%; ລວມຍອດຜະລິດຕະພັນພາຍໃນ ບັນລຸໄດ້ 1,351 ຕື້ກ່ວາກີບ ທຽບແຜນການ 5 ປີປະຕິ ບັດໄດ້ລື່ນແຜນ 10.43%, ລາຍຮັບສະເລ່ຍຕໍ່ຫົວຄົນໄດ້ 13.36 ລ້ານກີບ, ທຽບໃສ່ປີ 2019 ເພີ່ມຂຶ້ນ 6.54 ລ້ານກີບ, ສະເລ່ຍຕໍ່ຫົວຄົນໜຶ່ງໄດ້ 611.36 ໂດລາສະຫະລັດ. ຍາດແຍ່ງແຫຼ່ງທຶນເຂົ້າມາຈັດຕັ້ງປະຕິບັດຢູ່ພາຍໃນເມືອງໄດ້ 221ໂຄງການ ທຽບແຜນການ 5 ປີປະຕິບັດໄດ້ລື່ນແຜນ 22.09%, ມູນຄ່າຈັດຕັ້ງປະຕິບັດ 108 ຕື້ກ່ວາກີບ ທຽບແຜນການ 5 ປີປະຕິບັດໄດ້ 26.39%. ໃນນີ້, ໂຄງການລົງທຶນຂອງລັດ ມີມູນຄ່າ 44 ຕື້ກ່ວາກີບ, ໂຄງການຊ່ວຍເຫຼື່ອທາງການເພື່ອການພັດທະນາ (ODA) ມີມູນຄ່າ 64 ຕື້ກ່ວາກີບ, ການລົງທຶນພາກເອກະຊົນພາຍໃນ ແລະ ຕ່າງປະເທດ ມີມູນຄ່າ 133 ຕື້ກ່ວາກີບ ແລະ ທຶນສິນເຊື່ອຕ່າງໆ ມີມູນຄ່າ 182 ຕື້ກ່ວາກີບ; ຈາກແຫຼ່ງທຶນຕ່າງໆ ໄດ້ເຮັດໃຫ້ແຜນພັດທະນາເສດຖະກິດ - ສັງຄົມ ທີ່ໄດ້ກໍານົດໄວ້ໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ III ຂອງເມືອງ (2020-2024) ໄດ້ຮັບການຈັດຕັ້ງປະຕິບັດ ແລະ ມີຫຼາຍຄາດໝາຍສາມາດບັນລຸໄດ້;

ກອງປະຊຸມໃຫຍ່ຄັ້ງທີ XVI ຂອງຜູ້ແທນອົງຄະນະພັກເມືອງຂວາຄັ້ງນີ້ ຜູ້ແທນຈະໄດ້ພ້ອມກັນຄົ້ນຄ້ວາ,ປະກອບຄໍາເຫັນໃສ່ຮ່າງບົດລາຍງານການເມືອງ, ແຜນພັດທະນາ ເສດຖະກິດ - ສັງຄົມ 5 ປີ ພ້ອມທັງທົບທວນຕີລາຄາຄືນກ່ຽວກັບການຈັດຕັ້ງປະຕິບັດແນວທາງການປ່ຽນແປງໃໝ່ທີ່ມີຫຼັກການຂອງພັກກໍ່ຄືການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ XV ຂອງອົງຄະນະພັກເມືອງກ່ຽວກັບດ້ານຕັ້ງໜ້າ, ຂໍ້ຂາດຕົກບົກຜ່ອງ ແລະ ຖອດຖອນບົດຮຽນຢ່າງພາວະວິໄສ ພ້ອມດຽວກັນນັ້ນຈະໄດ້ພ້ອມກັນກຳນົດທິດທາງໜ້າທີ່ແຕ່ນີ້ຮອດປີ 2029. ຈາກນັ້ນ ຜູ້ແທນຈະໄດ້ພ້ອມກັນໃຊ້ສິດປະຊາທິປະໄຕຂອງການເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ຜູ້ທີ່ມີຄວາມຮູ້, ຄວາມສາມາດ, ຄຸນສົມບັດສິນທຳປະຕິວັດ, ມີລັກສະນະສືບທອດຕໍ່ເນື່ອງ, ມີຄວາມຮັບຜິດຊອບສູງຕໍ່ໜ້າທີ່ການເມືອງເພື່ອແບກຫາບ ແລະ ເຮັດຫຼ້ອນໜ້າທີ່ ທີ່ກອງປະຊຸມໃຫ່ຍມອບໝາຍໃຫ້. ພ້ອມກັນນັ້ນໃນກອງປະຊຸມຍັງຈະໄດ້ຮັບຟັງການໂອ້ລົມຈາກຄະນະພັກຂັ້ນເທິງເພື່ອເປັນບ່ອນອີງ ແລະ ຈັດຕັ້ງປະຕິບັດວຽກງານໃນຕໍ່ໜ້າໃຫ້ມີຜົນສຳເລັດຕາມແຜນການທີ່ວ່າງໄວ້.

ກອງປະຊຸມໃຫຍ່ຜູ້ແທນອົງຄະນະພັກເມືອງຂວາ ຄັ້ງທີ XVI ຈະສືບຕໍ່ດໍາເນີນເປັນເວລາ 2 ວັນ ຮອດວັນທີ 21 ມີນາ 2025 ຈຶ່ງຈະສໍາເລັດ.