ເມືອງບຸນເໜືອ ແຂວງຜົ້ງສາລີ ຈັດພິທີປາຖະກະຖາ ເລົ່າມູນເຊື້ອ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ
20 Mar 2025 | ນັກຂ່າວ ຖວທ ເມືອງບຸນເໜືອ |
ພິທີປາຖະກະຖາ ເລົ່າມູນເຊື້ອ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ( 22 ມີນາ 1955 – 22 ມີນາ 2025 )ຄັ້ງນີ້ໄດ້ຈັດຂຶ້ນຢູ່ສະໂມສອນຂອງເມືອງ ໃນຕອນບ່າຍ ວັນທີ 20 ມີນາ 2025 ນີ້. ໂດຍເປັນປະທານຂອງ ສະຫາຍ ວິສັນ ວົງນະຄອນ ຮອງເລຂາພັກເມືອງ.ເຂົ້າຮ່ວມມີຄະນະກຳມະການປະຈຳພັກເມືອງ, ກຳມະການພັກເມືອງ, ຄະນະນໍາ-ພະນັກງານສະມາຊິກພັກແຕ່ລະຫ້ອງການ, ສອງກຳລັງປະກອບອາວຸດອ້ອມຂ້າງເມືອງເຂົ້າຮ່ວມ.
ໃນພິທີ
ສະຫາຍ ວິສັນ ວົງນະຄອນ ຮອງເລຂາພັກເມືອງເປັນກຽດເລົ່າຄືນມູນເຊື້ອວັນສ້າງຕັ້ງພັກປະຊາຊົນປະຕິວັດລາວ ໃນຕະຫຼອດໄລຍະ 70 ປີທີ່ຜ່ານມາ (ວັນທີ 22 ມີນາ 1955 - 22 ມີນາ 2025) ເຊິ່ງໄດ້ຍົກໃຫ້ເຫັນກ່ຽວກັບຄວາມເປັນມາ, ການກຳເນີດ ແລະ ການເຕີບໃຫ່ຍຂະຫຍາຍຕົວຂອງພັກ, ມູນເຊື້ອ ແລະ ຜົນງານຂອງການຊີ້ນໍາ, ນໍາພາຂອງພັກປະຊາຊົນ ປະຕິວັດລາວໃນແຕ່ລະໄລຍະ, ບັນດາມະຕິຂອງພັກໃນການຊີ້ນໍາ, ນໍາພາວຽກງານຕ່າງໆໂດຍສະເພາະແມ່ນ ການນຳພາພັດທະນາປະເທດຊາດຕາມແນວທາງການປ່ຽນແປງໃໝ່ຮອບດ້ານ ແລະ ມີຫຼັກການ; ດ້ວຍຄວາມສະດຸ້ງໄວຂອງພັກ ເຮັດໃຫ້ຂົງເຂດການເມືອງໄດ້ຮັບການປັບປຸງໄປສູ່ລະບົບການເມືອງປະຊາທິປະໄຕ, ເສດຖະກິດພາຍໃນປະເທດໄດ້ມີຜົນສຳເລັດ ແລະ ມີບາດກ້າວຂະຫຍາຍຕົວຕໍ່ເນື່ອງ, ໝັ້ນທ່ຽງ. ພ້ອມດຽວກັນນັ້ນ, ເສີມຂະຫຍາຍມູນເຊື້ອທາດແທ້ຂອງພັກປະຊາຊົນປະຕິວັດລາວ ຕະຫຼອດໄລຍະ 70 ປີ ແຫ່ງການນໍາພາ ຂອງພັກທີ່ໄດ້ແບກຫາບພາລະກຳປະຫວັດສາດອັນຍິ່ງໃຫຍ່ໃນແຕ່ລະໄລຍະທີ່ແຕກຕ່າງກັນ ແລະ ສາມາດປະຕິບັດພາລະກຳປະຫວັດສາດເຫຼົ່ານັ້ນໄດ້ຢ່າງສະຫງ່າງາມ.
ຈາກນັ້ນ, ສະຫາຍ ນາງ ບົວໄຂ ໃຈວົງ ກຳມະການປະຈຳພັກເມືອງ ຫົວຫນ້າຄະນະໂຄສະນາອົບຮົມເມືອງ ຂຶ້ນເຜີຍແຜ່ ເອກະສານວັນຄຽດແຄ້ນຂອງປະຊາຊົນລາວ; ເອກະສານມູນເຊື້ອວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດຄົບຮອບ 79 ປີ.
Share:
