ຕອນເຊົ້າຂອງວັນທີ 20 ມີນາ ປີ 2025,ພະແນກຍຸຕິທຳ ແຂວງ ຜົ້ງສາລີ ລົງຕິດຕາມວຽກງານຮອບດ້ານຢູ່ ຫ້ອງການຍຸຕິທຳ ເມືອງບຸນເໜືອ ປະຈໍາປີ 2024 ໂດຍການເປັນປະທານຂອງ ທ່ານ ພອນສຸຈິດ ລີລາວົງ ກຳມະການພັກແຂວງ ຫົວໜ້າພະແນກຍຸຕິທຳ ແຂວງ ຜົ້ງສາລີ ມີທ່ານ ຄຳຈັນ ແກ້ວລາວກິນ ກຳມະການພັກເມືອງ ຫົວໜ້າຫ້ອງການຍຸຕິທຳເມືອງບຸນເໜືອ ມີບັນດາທ່ານທີມງານແຂວງ ພ້ອມດ້ວຍພະນັກງານພາຍໃນຫ້ອງການຍຸຕິທຳເມືອງເຂົ້າຮ່ວມ.
ໂອກາດທີ່ມີຄວາມໝາຍສຳຄັນນັ້ນຫົວໜ້າພະແນກຍຸຕິທຳ ແຂວງ ຜົ້ງສາລີ ພ້ອມດ້ວຍທີມງານແຂວງ ໄດ້ຮັບຟັງຜ່ານບົດລາຍງານວຽກງານຮອບດ້ານຈາກ ທ່ານ ຄຳຈັນ ແກ້ວລາວກິນ ກຳມະການພັກເມືອງ ຫົວໜ້າຫ້ອງການຍຸຕິທຳເມືອງບຸນເໜືອ ເຊິ່ງໄດ້ຍົກໃຫ້ເຫັນຈຸດດີ-ຈຸດອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຫຼາຍບັນຫາເປັນຕົົ້ນ ຄະນະພັກຫ້ອງການ ຍຸຕິທຳເມືອງບຸນເໜືອ ໄດ້ສຸມໃສ່ວຽກງານສຶກສາອົບຮົມການເມືອງ-ແນວຄິດ ເປັນບັນຫາສໍາຄັນ ຕິດພັນກັບ ວຽກງານ 3 ສ້າງ ຂອງພັກເພື່ອປັບປູງກໍ່ສ້າງບຸກຄະລາກອນຄະນະໄກ່ເກ່ຍຂັ້ນບ້ານທາງດ້ານຈຳນວນ ແລະ ຄຸນນະພາບໃນ ທົ່ວເມືອງໂດຍການຫັນເອົາພະນັກງານ ລົງກໍ່ສ້າງຮາກຖານການເມືອງພັດທະນາບັນດາບ້ານເປັນຕົ້ນ ຜັນຂະຫຍາຍຈັດຕັ້ງປະຕິບັດຂໍ້ຕົກລົງຂອງລັດຖະມົນຕີກະຊວງຍຸຕິທຳສະບັບເລກທີ 2399/ກຍ, ລົງວັນທີ 7 ທັນວາ 2017 ວ່າດ້ວຍການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍມາຮອດປະຈຸບັນໄດ້ 3.839 ຄອບຄົວບ້ານແບບຢ່າງປະຕິບັດກົດໝາຍໄດ້ 56 ບ້ານໃນທົ່ວເມືອງກວມ 86,15%, ພ້ອມນັ້ນກໍ່ໄດ້ມີການປະກອບຄຳຄິດ, ຄຳເຫັນແລກປ່ຽນບົດຮຽນ ລະຫວ່າງຂັ້ນແຂວງ, ເມືອງ ເພື່ອປະຕິບັດໜ້າວຽກງານໃນຕໍ່ໜ້າໃຫ້ໄປລວງດຽວກັນ ແລະ ວາງທິດທ່າງແຜນການປະຈໍາປີ 2025 ຈະສືບຕໍ່ຫັນເອົາກໍາລັງກໍ່ສ້າງຮາກຖານການເມືອງ,ເພີ່ມທະວີເກັບກໍາຂໍ້ມູນຈາກບ້ານທີ່ຍັງບໍ່ທັນໄດ້ໃຫ້ບັນລຸຕາມລະດັບຄາດໝາຍທີ່ວາງໄວ້.
ຕອນທ້າຍໄດ້ຮັບຟັງ ທ່ານ ພອນສຸຈິດ ລີລາວົງ ກຳມະການພັກແຂວງ ຫົວໜ້າພະແນກຍຸຕິທຳ ແຂວງ ຜົ້ງສາລີໄດ້ກ່າວສະແດງ ຄວາມຍ້ອງຍໍຊົມເຊີຍ ທີ່ຍາດໄດ້ຜົນງານຫຼາຍດ້ານໃນໜຶ່ງປີຜ່ານມາ ແລະ ໄດ້ເນັ້ນໜັກໃຫ້ຄະນະພັກ-ຄະນະຫ້ອງການ, ເພີ່ມທະວີຄວາມຮັບຜິດຊອບທາງດ້ານການເມືອງນໍາພາແນວຄິດ,ຝຶກຝົນຫຼໍ່ຫຼອມຕົນເອງໃຫ້ມີຄຸນທາດການເມືອງ, ຄຸນສົມບັດ, ສິນທໍາປະຕິວັດ ແລະ ພ້ອມກັນນໍາເອົາທິດທາງແຜນການຂອງກອງປະຊຸມໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງຂອງ ຫ້ອງການໃຫ້ມີຜົນສໍາເລັດ ເປັນກ້າວໆ.
