ກອງປະຊຸມໃຫຍ່ຜູ້ແທນອົງຄະນະພັກເມືອງຂວາ ແຂວງຜົ້ງສາລີ ໄດ້ດຳເນີນມາແຕ່ວັນທີ 20 ແລະ ໄດ້ສຳເລັດລົງຢ່າງຈົບງາມ ໃນວັນທີ 21 ມີນາ 2025 ໂດຍພາຍໃຕ້ການ ເປັນປະທານ ຂອງສະຫາຍ ສອນສະໜຸກ ສີສຸລາດ ເລຂາຄະນະບໍລິຫານງານພັກເມືອງເຈົ້າເມືອງໆຂວາ,ໃຫ້ກຽດເຂົ້າຮ່ວມຂອງ ສະຫາຍ ຄໍາຜອຍ ວັນນະສານ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຜົ້ງສາລີ, ມີບັນດາສະຫາຍ ຄະນະປະຈໍາພັກແຂວງ, ຄະນະນໍາກ່ຽວຂ້ອງຂັ້ນແຂວງ, ບັນດາສະຫາຍໃນອົງຄະນະພັກເມືອງ ພ້ອມດ້ວຍແຂກຖືກເຊີນ ແລະ ບັນດາສະຫາຍຜູ້ແທນສົມບູນຈໍານວນ 189 ສະຫາຍ, ຍິງ 25 ສະຫາຍ ທີ່ເປັນຕົວແທນໃຫ້ສະມາຊິກໃນທົ່ວເມືອງ 2,101 ສະຫາຍ, ຍິງ 554 ສະຫາຍ ເຂົ້າຮ່ວມ.

ກອງປະຊຸມໃຫຍ່ຜູ້ແທນອົງຄະນະພັກເມືອງຂວາ ໄດ້ສະຫຼຸບຕີລາຄາຄືນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XV ຂອງອົງຄະນະພັກເມືອງຕະຫຼອດໄລຍະ 5 ປີຜ່ານມາ ເຫັນວ່າມີຜົນສໍາເລັດຫຼາຍດ້ານ ເປັນຕົ້ນ ທົ່ວເມືອງ ແມ່ນມີສະຖຽນລະພາບທາງດ້ານການເມືອງອັນໜັກແໜ້ນ, ທົ່ວສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ເສດຖະກິດ-ສັງຄົມ ມີການພັດທະນາດ້ວຍບາດກ້າວ ແລະ ທ່ວງທ່າໃໝ່, ປະຊາຊົນບັນດາເຜົ່າມີຄວາມສາມັກຄີປອງດອງ, ພື້ນຖານໂຄງລ່າງຂອງເມືອງກໍ່ໄດ້ຮັບການປັບປຸງແກ້ໄຂ, ຊີວິດການເປັນຢູ່ຂອງປະຊາຊົນກໍ່ໄດ້ຮັບການປັບປຸງດີຂຶ້ນເປັນກ້າວໆ, ໄດ້ຖືວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນເປັນວຽກຍຸດທະສາດ ສຸມໃສ່ແກ້ໄຂຄວາມທຸກຍາກຕາມ 36 ບ້ານ ແລະ 2 ຈຸດສຸມພັດທະນາຕົວເມືອງນ້ອຍໃນຊົນນະບົດ. ນອກນັ້ນຍັງໄດ້ມອບໃຫ້ບັນດາຫ້ອງການພາຍໃນເມືອງເລັ່ງໃສ່ແກ້ໄຂຄວາມທຸກຍາກ ໃນ 57 ບ້ານທີ່ຍັງເຫຼືອ; ໂດຍຫັນເອົາພະນັກງານຫຼັກແຫຼ່ງຂອງເມືອງ ລົງຊ່ວຍບ້ານ ເພື່ອສ້າງຄວາມເຂັ້ມແຂງໃຫ້ແກ່ຮາກຖານຕິດພັນກັບການສ້າງຂະບວນການແຂ່ງຂັນຮັກຊາດ ແລະ ພັດທະນາ ສາມາດເຫັນໄດ້ວຽກດີຄົນເດັ່ນ, ກົມກອງເຂັ້ມແຂງ ໂດຍສຸມໃສ່ການຈັດສັນອາຊີບ ແລະ ກໍ່ສ້າງພື້ນຖານໂຄງລ່າງຮັບໃຊ້ແກ່ການພັດທະນາ, ການດໍາລົງຊີວິດ ແລະ ການແກ້ໄຂຄວາມທຸກຍາກຂອງປະຊາຊົນ ຕິດພັນກັບວຽກງານ 3 ສ້າງ ໄດ້ຮັບການເອົາໃຈໃສ່ຈັດຕັ້ງປະຕິບັດຢ່າງເປັນຂະບວນຟົດຟືຶ້ນ, ເຊິ່ງຜ່ານການປະເມີນຕາມດໍາລັດ 348/ລບ, ມີບ້ານພົ້ນທຸກເພີ່ມຂຶ້ນ; ບ້ານ ແລະ ຄອບຄົວທຸກຍາກກໍໄດ້ຫຼຸດລົງ.

ກອງປະຊຸມຍັງໄດ້ເປັນເອກະສັນກັນຮັບຮອງແຜນການພັດທະນາເສດຖະກິດ-ສັງຄົມ 5 ປີ ຕໍ່ໜ້າ ແຕ່ປີ 2025- 2029 ໂດຍການສູ້ຊົນໃຫ້ເສດຖະກິດຂອງເມືອງ ຂະຫຍາຍຕົວຢ່າງຕໍ່ເນື່ອງ ແລະ ຍືນຍົງ ໂດຍສະເລ່ຍ 6.40% ຕໍ່ປີ, ລວມຍອດຜົນຜະລິດໃນ 5 ປີ ໃຫ້ບັນລຸ 2,605 ຕື້ກ່ວາກີບ. ໃນນັ້ນ, ຂະແໜງກະສິກໍາ-ປ່າໄມ້ ໃຫ້ຂະຫຍາຍຕົວ 6%, ຂະແໜງອຸດສາຫະກໍາ-ຫັດຖະກໍາ ໃຫ້ຂະຫຍາຍຕົວ 7% ແລະ ຂະແໜງການບໍລິການໃຫ້ຂະຫຍາຍຕົວ 7.80%. ຮອດປີ 2029 ສູ້ຊົນສ້າງລາຍຮັບສະເລ່ຍໃສ່ຫົວຄົນໃຫ້ໄດ້ 18 ລ້ານກວ່າກີບ ຫຼື ເທົ່າກັບ 850 ໂດລາສະຫະລັດ. ກອງປະຊຸມໃຫຍ່ຄັ້ງນີ້ ຍັງໄດ້ປ່ອນບັດເລືອກເອົາຄະນະບໍລິຫານງານພັກເມືອງ ຊຸດທີ່ XVI ເຊິ່ງມີຜູ້ສະໝັກເລືອກຕັ້ງ 32 ສະຫາຍ, ຍິງ 4 ສະຫາຍ, ເລືອກເອົາ 27 ສະຫາຍ, ຍິງ 4 ສະຫາຍ ແລະ ເລືອກເອົາຄະນະປະຈໍາພັກເມືອງຈຳນວນ 9 ສະຫາຍ, ຍິງ 1 ສະ ຫາຍ, ຜ່ານການດຳເນີນກອງປະຊຸມຄັ້ງປະຖົມມະລຶກ ກອງປະຊຸມໄດ້ເລືອກເອົາ ສະຫາຍ ສອນສະໜຸກ ສີສຸລາດ ເປັນເລຂາຄະນະບໍລິຫານງານພັກເມືອງ, ສະຫາຍ ຄໍາໄລ ສຸທິພອນ ເປັນຮອງເລຂາຄະນະບໍລິຫານງານພັກເມືອງ, ສະຫາຍ ພົມມີ ອິນມະສອນ ເປັນຮອງເລຂາຄະນະບໍລິຫານງານພັກເມືອງ ທັງເປັນປະທານກວດກາພັກເມືອງ, ສະຫາຍ ວັນດີ ຈັນທະບູສອນ ແລະ ສະຫາຍ ບຸນໄຊ ສົມພະນາຫວັດ ເປັນຮອງປະທານກວດກາພັກເມືອງ ແລະ ເລືອກໄດ້ຜູ້ແທນສົມບູນອີກ 27 ສະຫາຍ, 4 ສະຫາຍ ເຂົ້າຮ່ວມກອງປະຊຸມໃຫຍ່ຄັ້ງທີ XII ຂອງອົງຄະນະພັກແຂວງ.

ໂອກາດນີ້, ສະຫາຍ ຄໍາຜອຍ ວັນນະສານ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຜົ້ງສາລີ ຍັງໄດ້ໂອ້ລົມໃຫ້ທິດຊີ້ນໍາ ການຈັດຕັ້ງປະຕິບັດໜ້າທີ່ຂອງອົງຄະນະພັກເມືອງຊຸດໃໝ່ໃນຕໍ່ໜ້າ ເປັນຕົ້ນແມ່ນ: ຕ້ອງໄດ້ເພີ່ມທະວີເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ເປັນໜ້າທີ່ຂອງທົ່ວປວງຊົນ, ຫັນລົງຮາກຖານ, ສ້າງຮາກຖານໃຫ້ເຂັ້ມແຂງ ຕາມແນວທາງປ້ອງກັນຊາດປ້ອງກັນຄວາມສະຫງົບທົ່ວປວງຊົນຮອບດ້ານ, ບຳລຸງ ແລະ ກໍ່ສ້າງກຳລັງຢູ່ຮາກຖານບ້ານໃຫ້ສາມາດຈັດຕັ້ງປະຕິບັດຕາມສິດ ແລະ ໜ້າທີ່ຂອງຕົນ ແລະ ມີຄວາມເຂັ້ມແຂງເທື່ອລະກ້າວ ເປັນຕົ້ນແມ່ນສາມາດແກ້ 9 ໜໍ່ແໜ່ງທີ່ພາໃຫ້ເກີດປະກົດການຫຍໍ້ທໍ້ ແລະ ຄວາມບໍ່ສະຫງົບໃນສັງຄົມ, ເອົາໃຈໃສ່ສຶກສາອົບຮົມນໍາພາການເມືອງ-ແນວຄິດ, ປຸກລະດົມຈິດໃຈຟົດຟື້ນປະຕິວັດຂອງສະມາຊິກພັກ, ພະນັກງານ, ທະຫານ, ຕຳຫຼວດ ແລະ ປະຊາຊົນ, ຊັ້ນຄົນໃນສັງຄົມ ໃຫ້ເສີມຂະຫຍາຍ ຄວາມຮັບຜິດຊອບໃຫ້ສູງ; ກໍານົດທ່າແຮງ, ແລວພັດທະນາ ແລະ ຄາດໝາຍຂອງມະຕິໃນແຕ່ລະຂົງເຂດ ແລະ ການຫັນຄາດໝາຍຂອງມະຕິ ມາເປັນແຜນການ, ແຜນງານ ແລະ ໂຄງການ ຕາມທາງອອກ (ແລວພັດທະນາ) ແລະ ທ່າແຮງຂອງເມືອງໃຫ້ລະອຽດຈະແຈ້ງ, ຕ້ອງປະຕິບັດ 3 ພາລະ ບົດບາດແຫ່ງການເປັນໃຈກາງໃຫ້ມະຫາຊົນ, ໃຫ້ປະຊາຊົນ ໃຫ້ຖືກຕ້ອງ: ເປັນໃຈກາງແຫ່ງການເຕົ້າໂຮມ ຄວາມສາມັກຄີ (ສາມັກຄີບົນພື້ນຖານຄວາມເປັນເອກະພາບຕາມແນວທາງຂອງພັກ), ເປັນໃຈກາງແຫ່ງ ສະຕິປັນຍາ, ເປັນໃຈກາງແຫ່ງຄວາມເປັນແບບຢ່າງ, ກໍາແໜ້ນເຊື່ອມຊຶມ ມະຕິ, ແນວທາງຂອງພັກ, ເປັນແບບຢ່າງໃນການເຄົາລົບ ແລະ ປະຕິບັດບັນດາຫຼັກການນໍາພາຕາມ 5 ຫຼັກການ ເປັນຕົ້ນຫຼັກການລວມສູນປະຊາທິປະໄຕ, ນໍາເອົາຜົນສໍາເລັດຂອງກອງປະຊຸມໃຫຍ່ຄັ້ງນີ້ໄປຜັນຂະຫຍາຍ ແລະ ນໍາພາຈັດຕັ້ງປະຕິບັດໃຫ້ປະກົດຜົນເປັນຈິງ