ໃນຕອນເຊົ້າຂອງ ວັນທີ 20 ມີນາ 2025 ນີ້ ບ້ານ ສົບຮຸນ ໄດ້ຈັດພິທີສະເຫຼີມສະຫຼອງງານບຸນຄຳບ້ານ ປະຈຳປີ 2025 ຂື້ນ ຢູ່ທີ່ເດີ່ນໂຮງຮຽນ ມສ ສົບຮຸນ ເມືອງໃໝ່ ແຂວງຜົ້ງສາລີ ໂດຍການເປັນປະທານ ຂອງ ທ່ານ ບົງ ເລືອງອ່ອນດາວົງ ເລຂາພັກບ້ານ ນາຍບ້ານສົບຮຸນ ແລະ ເປັນກຽດເຂົ້າຮ່ວມຂອງ ທ່ານ ນ ແດງ ຕິດສະພອນ ຄະນະປະຈຳພັກເມືອງ ປະທານແນວລາວສ້າງຊາດ ຜູ້ຊີ້ນຳຂົງເຂດອົງການຈັດຕັ້ງມະຫາຊົນ ມີເລຂາຄະນະພັກຮາກຖານກຸ່ມ ມີອົງການຈັດຕັ້ງບ້ານ,​ ເຖົ້າແກ່ແນວໂຮມ, ຕະຫຼອດຮອດພໍ່ແມ່ປະຊາຊົນ ແລະ ແຂກເຊີນເຂົ້າຮ່ວມຢ່າງຫຼວງຫຼາຍ. ໃນພິທີ ທ່ານ ບົງ ເລືອງອ່ອນດາວົງ ໄດ້ຂື້ນກ່າວເປີດພິທີຢ່າງເປັນທາງການ ຈາກນັ້ນ ທ່ານ ແດງ ຮອງເລຂາ -ຮອງນາຍບ້ານ ກໍໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດວຽກງານຕະຫຼອດໄລຍະ 1 ປີ ຜ່ານມາ ເຊິ່ງໄດ້ສະເໜີວ່າ: ບ້ານ ສົບຮຸນເປັນບ້ານໜຶ່ງທີ່ຂື້ນກັບຄະນະພັກຮາກຖານກຸ່ມບ້ານສົບຮຸນ ເຊິ່ງຢູ່ຫ່າງຈາກເທດສະບານເມືອງ 10 ກິໂລແມັດ, ປະຈຸບັນພາຍໃນບ້ານ ມີທັງໝົດ 143 ຫຼັງຄາ, 223 ຄອບຄົວ, ມີພົນລະເມືອງທັງໝົດ 855 ຄົນ, ຍິງ 416 ຄົນ, ດຳລົງຊີວິດຢູ່ຮ່ວມກັນທັງໝົດ 8 ຊົນເຜົ່າ, ຢຶດຖືເອົາອາຊີບເຮັດນາ, ເຮັດສວນຢາງພາລາ, ປູກຝັງ-ລ້ຽງສັດ ແລະ ເຮັດການບໍລິການ ເຊິງສາມາດເຮັດໃຫ້ຊີວິດການເປັນຢູ່ຂອງພໍແມ່ປະຊາຊົນ ໂດຍສະເພາະແມ່ນດ້ານເສດຖະກິດ-ສັງຄົມ ພາຍໃນບ້ານມີການພັດທະນາດີຂື້ນເປັນກ້າວໆ ການຈັດພິທີສະເຫຼີມສະຫຼອງບຸນຄຳບ້ານນັ້ນ ແມ່ນໄດ້ຈັດຂື້ນທຸກໆປີ ເຊິ່ງໄດ້ຈັດຂື້ນໃນລະຫວ່າງທ້າຍເດືອນມີນາຫາຕົ້ນເດືອນເມສາ ການຈັດງານບຸນກໍເພື່ອເປັນການລະນຶກເຖິງຜູ້ທີລ່ວງລັບ ຫຼື ຜູ້ທີເຈົ້າກົກເຈົ້າເລົ່າ ແລະ ເປັນໂອກາດທີ່ຍາດຕິພີ່ນ້ອງ ເພື່ອນມິດສະຫາຍຜູ້ຢູ່ໃກ້ຢູ່ໄກ ມາພົບປະສ້າງສັນ ເຊິ່ງເຜົ່າໄຕແດງ ມີຮີດຄອງປະເພນີ ແລະ ວັດທະນະທຳ, ມີພາສາປາກເວົ້າ, ຄວາມເຊື່ອຖື, ການນຸ່ງຖື, ວິຖີການດໍາລົງຊີວິດ ທີເປັນເອກະລັກສະເພາະເຜົ່າ ນອກນັ້ນພາຍໃນງານຍັງຈັດກິດຈະກຳ ເຊິ່ງມີການ ສະແດງສິນລະປະ-ວັນະຄະດີ, ຕໍ່ແລ້, ໂຍນໝາກຄອນ,ຕີໝາກຄ່າງ, ດຶງເຊືອກ ແລະ ໄມ້ຕາບແຂ່ງ ເພື່ອເປັນການສືບຕໍ່ອະນຸລັກ​ຮັກ​ສາ ແລະ ເສີມຂະຫຍາຍຮີດຄອງປະເພນີຂອງຊົນເຜົ່າ ໂດຍຕິດພັນກັບການພັດທະນາ ເສດຖະກິດ-ສັງຄົມໃຫ້ມີຄວາມຢືນຢົງ ແລະ ເປັນການເຕົ້າໂຮມຄວາມສາມັກຄີປະຊາຊົນບັນດາເຜົ່າ ທີ່ໄດ້ສືບທອດກັນມາ, ພ້ອມທັງເປັນການສົ່ງເສີມ ວັດທະນະທໍາ, ຮີດຄອງປະເພນີຂອງເຜົ່າ, ຂອງຊາດ ໃຫ້ຢູ່ຄຽງຄູ່ກັບເຜົ່າຕະຫຼອດໄປຈົນຮອດຊົ່ວລູກ-ຊົ່ວຫຼານ.