ຕອນເຊົ້າຂອງວັນທີ 23 ມີນາ 2025ນີ້ ການນໍາເມືອງສໍາພັນແຂວງຜົ້ງໄດ້ວາງກະຕ່າດອກໄມ້ຢູ່ອະນຸສາວະລີສະຖານ ທີ່ປະທານໄກສອນ ພົມວິຫານ ນໍາພາໂດຍ ສະຫາຍ ທອງຕື ເກຍສະບົງ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງສໍາພັນ ເນື່ອງໃນໂອກາດ ເປີດກອງປະຊູມໃຫຍ່ຄັ້ງທີ່ XV ຂອງອົງຄະນະບໍລິຫານງານພັກເມືອງສໍາພັນ ແລະ ໂອກາດສະເຫຼີມສະຫຼອງ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ມີຄະນະປະຈໍາພັກເມືອງ, ກໍາມະການພັກເມືອງ ,ຫົວໜ້າ-ຄະນະຫ້ອງການ, ນາຍ ແລະ ພົນທະຫານ, ນາຍ ແລະ ພົນຕຳຫຼວດເຂົ້າຮວ່ມ.

ຈຸດປະສົງການວາງຕ່າດອກໄມ້ເພື່ອຂໍ່ານັບຮັບຕ້ອນກອງປະຊູມໃຫຍ່ຄັ້ງທີ່ XV ຂອງອົງຄະນະບໍລິຫານງານພັກເມືອງສໍາພັນ ແລະເປັນການຂໍານັບຊົມເຊີຍວັນສ້າງຕັ້ງພັກ ປະຊາຊົນປະຕິວັດລາວທີໄດ້ໝູນວຽນຄົບຮອບ 70 ປີ, ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວເມືອງສໍາພັນ ມີຄວາມເອກອ້າງທະນົງໃຈ ເປັນຢ່າງຍິ່ງຕໍ່ການຕ້ອນຮັບ ກອງປະຊູມໃຫຍ່ຄັ້ງທີ່ XV ຂອງອົງຄະນະບໍລິຫານງານພັກເມືອງສໍາພັນ ແລະການສະເຫຼີມສະຫຼອງວັນສ້າງຕັ້ງພັກປະຊາຊົນລາວຄົບຮອບ 70 ປີສະນັ້ນ ການນໍາພັກ-ລັດ ຕາງໜ້າໃຫ້ທົ່ວປວງຊົນຊາວເມືອງສໍາພັນແຂວງຜົ້ງສາລີ ໄດ້ພ້ອມກັນມາເຕົ້າໂຮມເພື່ອວາງກະຕ່າດອກໄມ້ສະແດງຄວາມເຄົາລົບ, ຮູ້ບຸນຄຸນ, ລະນືກຄຸນງາມ ຄວາມດີຂອງປະທານ ໄກສອນ ພົມວິຫານ ທີ່ມີຕໍ່ປະເທດຊາດອັນລົ້ນເຫຼືອ, ທັງເປັນນັກຮົບປະຕິວັດທີ່ດີເດັ່ນ, ເປັນຜູ້ນຳທີ່ປະເສີດ ແລະ ເປັນຜູ້ທີ່ເຄົາລົບຮັກປວງຊົນລາວທັງຊາດ, ເປັນຜູ້ທີ່ນໍາພາການຕໍ່ສູ້ກູ້ຊາດ ແລະ ສ້າງຕັ້ງພັກປະຊາຊົນປະຕິວັດລາວ, ນໍາພາຂະບວນການປະຕິວັດ ຈົນສາມາດສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງສະຫງ່າຜ່າເຜີຍ, ເຮັດໃຫ້ຄົນລາວ, ຊາດລາວ ມີອຳນາດອະທິປະໄຕ ແລະ ມີຜືນແຜນດິນອັນຄົບຖ້ວນເປັນຂອງຕົນເອງ,ລູກຫລານຄະນະບໍລິຫານງານພັກເມືອງ ກໍຄື ປະຊາຊົນບັນດາເຜົ່າຊາວເມືອງສໍາພັນ ຈຶ່ງມາຄາລະວະໃຫ້ປະທານ ໄກສອນ ພົມວິຫານ ຂໍໃຫ້ດວງວິນຍານ ແລະ ອະນຸພາບ ອັນແຮງກ້າຂອງປະທານ ໄກສອນ ພົມວິຫານ ຈົ່ງປົກປ້ອງ-ຄຸ້ມຄອງກອງປະຊູມໃຫຍ່ຄັ້ງທີ່ XV ໃຫ້ມີຜົນສໍາເລັດ ແລະຄູ້ມຄອງການນໍາພັກ-ລັດ ແລະ ປະຊາຊົນ ບັນດາເຜົ່າຊາວເມືອງສໍາພັນ ໃຫ້ມີຄວາມຢູ່ດີເປັນສຸກທຸກປະການ, ໃຫ້ທຸກສະຫາຍຕ້ອງຮັກສາຄຸນງາມຄວາມດີຂອງ ປະທານໄກສອນ ພົມວິຫານຢ່າງຈໍາບໍ່ລືມ. ຈາກນັ້ນສະຫາຍ ທອງຕືເກຍສະບົງ ກຳມະການພັກແຂວງ ເລຂາຄະນະບໍລິຫານງານພັກເມືອງ, ເຈົ້າເມືອງກໍ່ໄດ້ຂຶ້ນວາງກະຕ່າດອກໄມ້ ເພື່ອສະແດງນັບຖືຮູ້ບຸນຄູນ ໃນນັ້ນທຸກສະຫາຍ ກໍ່ໄດ້ພ້ອມກັນກົ້ມຫົວຂໍ່ານັບປະທານ ໄກສອນ ພົມວິຫານ ດ້ວຍຄວາມເຄົາລົບຢ່າງຍິ່ງ.