ໃນວັນທີ 24 ມີນາ 2025 ທີ່ຫ້ອງປະຊຸມຫ້ອງການ ບໍລິສັດຊີຊຸຍຢົງອີ້ ຢາງພາລາ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານການເກັບຊື້-ຂາຍຜົນຜະລິດຢາງພາລາ ປີ 2024 ຢ່າງເປັນທາງການ ພາຍໃຕ້ການເປັນປະທານຂອງທ່ານ ສົມພາບ ດາລາຈັກ ກຳມະການພັກແຂວງ ເລຂາພັກເມືອງ ເຈົ້າເມືອງໆບຸນເໜືອ, ຊີຊຸຍຢົງອີ້ ປະ

ທານບໍລິສັດຢາງພາລາ ມີບັນດາທ່ານກຳມະການປະຈຳພັກເມືອງ, ກຳມະການພັກເມືອງ ຫົວໜ້າ, ຮອງຫົວໜ້າຫ້ອງການທີ່ກ່ຽວຂ້ອງຂັ້ນເມືອງ, ເລຂາຄະນະພັກຮາກ

ຖານກຸ່ມ, ຕະຫຼອດຮອດເລຂານາຍບ້ານກຸ່ມຜະລິດປຸກຢາງພາລາເຂົ້າຮ່ວມ.

ກອງປະຊຸມໄດ້ຜ່ານບົດສະຫຼູບການປະຕິບັດໂຄງການສົ່ງເສີມປູກຢາງພາລາເປັນສິນຄ້າສົ່ງອອກປະຈຳປີ 2024 ແລະ ທິດທາງແຜນການປີ 2025.ໄດ້ກ່າວວ່າ: ທົ່ວເມືອງບຸນເໜືອມີເນື້ອທີ່ປູກຢາງພາລາທັງໝົດ 3.140,40 ເຮັກຕາ ຫຼື ເທົ່າກັບ 1.413.000 ກົກ,ໃນ ປີ2023 ທີ່ຜ່ານສາມາດເກັບກູ້ຜົນຜະລິດຢາງພາລາໄດ້ທັງໝົດ 3.200 ໂຕນ ສ້າງລາຍຮັບໃຫ້ປະຊາຊົນໄດ້ປະມານ 35,2 ຕື້ກີບ. ໃນນີ້ຂອບເຂດບ້ານເປົ້າໝາຍໂຄງການທີ່ປູກຮ່ວມກັບບໍລິສັດຊີຊູຍຢົງອີ້ລວມມີ 9 ໝູ່ບ້ານ, ມີ 410 ຄອບຄົວ, ຕາມແຜນປູກຢາງພາລາມີເນື້ອທີ່ 1.000 ເຮັກຕາ ແຕ່ໄດ້ປູກຕົວຈິງ 970,6 ເຮັກຕາ ມີ 436.750 ຕົ້ນ, ໃນປີ 2024 ມີເນື້ອ 697,8 ເຮັກຕາ, ມີ 314.040 ຕົ້ນ. ໃນປີ 2024 ນີ້ປະຊາຊົນເກັບກູ້ຜົນຜະລິດຢາງພາລາໄດ້ 4.200 ໂຕນ (ໃນນີ້ປູກຮ່ວມກັບ ບໍລິສັດໄດ້ 1.200 ໂຕນ) ແລະ ສ້າງລາຍຮັບໃຫ້ປະຊາຊົນໄດ້ຈໍານວນ 75,600 ຕື້ກີບ (ໃນລາຄາ18.000 ກີບຕໍ່ກິໂລ ). ຈາກນັ້ນທ່ານ ຄໍາແປງ ແກ້ວວົງຈັນ ກໍາມະການພັກເມືອງ ຫົວໜ້າຫ້ອງການ ການຄ້າເມືອງໄດ້ຜ່ານຮ່າງສັນຍາຊື້-ຂາຍຢາງພາລາປີ 2025. ແລະ ປະທານກອງປະຊຸມຍັງໄດ້ມີຄຳຖາມເຈາະຈີ້ມໃນການຈັດຕັ້ງປະຕິບັດໃນການຊື້-ຂາຍຢາງພາລາໃນປີ 2025 ໃຫ້ບັນດາບ້ານປະກອບຄໍາຄິຄໍາເຫັນເພື່ອເຮັດໃຫ້ມີສະຖຽນລະພາບໃນການຊື້-ຂາຍຢາງພາລາມີຄວາມທ່ຽງທຳຕາມສັນຍາ; ໂອກາດທີ່ມີຄວາມໝາຍຄວາມສຳຄັນນັ້ນທາງບໍລິສັດຍັງໄດ້ມອບເງີນລາງວັນໃຫ້ບັນດາບ້ານ ແລະ ພະນັກງານພາຍໃນບໍລິສັດທີ່ມີຜົນງານດີເດັ່ນໃນການປະຕິບັດໜ້າທີ່; ກຸ່ມຜະລິດປາດຢາງໄດ້ຫຼາຍທາງນີ້ກໍເພື່ອເປັນການຊູກຍູ້ຈິດໃຈ ແລະ ສົ່ງເສີມການປຸກສ້າງລາຍຮັບໃຫ້ທຸກບ້ານມີລາຍຮັບສູງຂຶ້ນກວ່າເກົ່າ.

ຕອນທ້າຍໄດ້ຮັບຟັງການໂອ້ລົມຂອງທ່ານ ສົມພາບ ດາລາຈັກ ກຳມະການພັກແຂວງ ເລຂາພັກເມືອງ ເຈົ້າເມືອງບຸນເໜືອ ກ່ອນອື່ນທ່ານໄດ້ກ່າວສະແດງຄວາມຊົມເຊີຍບໍລິສັດທີ່ມີນະໂຍບາຍຊຸກຍູ້ຈິດໃຈໃຫ້ບັນດາບ້ານ ພາຍໃນກຸ່ມຜະລິດທີ່ໄດ້ປະຕິບັດສ້າງລາຍຮັບ ໃຫ້ຄອບຄົວຫຼາຍຂຶ້ນ ໃນນັ້ນຍັງໄດ້ຮຽກຮ້ອງໃຫ້ຜູ້ຊື້-ຜູ້ຂາຍ ແລະ ພາກສ່ວນກ່ຽວຂ້ອງເປັນເຈົ້າການສົມທົບກັບວິຊາການຂອງບໍລິສັດແນະນໍາ, ຝຶກອົບຮົມວິທີປາດຢາງ ແລະ ປາດໃຫ້ຖືກເວລາ ເພື່ອໃຫ້ມີຄວາມ ຮັບປະກັນບໍ່ໃຫ້ມີຜົນກະທົບຕໍ່ຕົ້ນຢາງ; ວິຊາການປະຈຳ ຢູ່ພາກສະໝາມຕ້ອງໄດ້ຕິດຕາມ, ຊຸກຍູ້ ແລະ ແນະນໍາເຕັກນິກ ຄວາມຮູ້ດ້ານວິຊາການ, ການໃສ່ຝຸ່ນ, ແລະ ການບົວລະບັດຮັກສາ.ສ້າງສັນຍາຊື້-ຂາຍຢາງພາລາໃຫ້ມີຄວາມເປັນເອກະພາບກັນ ລະຫວ່າງ ຜູ້ຊື້ ແລະ ຜູ້ຂາຍ;ລົງເຜີຍແຜ່, ຕິດຕາມການປະຕິບັດສັນຍາ ແລະ ລາຄາເກັບຊື້ໃນແຕ່ລະໄລຍະ, ກວດກາການປະຕິບັດສັນຍາຊື້-ຂາຍຜົນຜະລິດ ເພື່ອບໍ່ໃຫ້ສວຍໂອກາດເອົາປຽບກັນ, ເປັນໃຈກາງປະສານໃນການແຈ້ງລາຄາເກັບຊື້-ຂາຍໃຫ້ກັບທຸກຝ່າຍໃຫ້ມີຄວາມເປັນເອກະພາບໃນແຕ່ໄລຍະ; ລົງກວດກາຕິດຕາມຊິງຊັ່ງນໍ້າໜັກໃນການຊື້-ຂາຍຢາງພາລາຢູ່ແຕ່ລະບ້ານໃຫ້ມີຄວາມຮັບປະກັນ, ສ້າງຄວາມເຊື່ອໝັ້ນ ລະຫວ່າງ ຜູ້ຊື້-ຜູ້ຂາຍ.ລົງຕິດຕາມການຄຸ້ມຄອງສິ່ງແວດລ້ອມ ໃຫ້ເປັນລະບົບ ເພື່ອບໍ່ໃຫ້ສົ່ງຜົນກະທົບ ແລະ ໃຫ້ມີຄວາມຮັບປະກັນ ເພື່ອຄວບຄຸມບໍ່ໃຫ້ເກີດຜົນກະທົບຕໍ່ສິ່ງແວດລ້ອມ ໂດຍທາງກົງ ແລະ ທາງອ້ອມຕໍ່ສຸຂະພາບ ແລະ ການດຳລົງຊີວິດຂອງຄົນ, ສັດລ້ຽງ, ສັດນໍ້າ, ແຫຼ່ງນໍ້າ, ຮີດຄອງປະເພນີຂອງບັນດາເຜົ່າ ແລະ ອື່ນໆ.ລົງຕິດຕາມຄວາມເປັນທໍາຂອງທັງສອງຝ່າຍ ຖ້າຫາກມີຂໍ້ຂັດແຍ້ງໃນການປະຕິບັດສັນຍາຕ້ອງພິຈະລະນາແກ້ ໄຂຕາມຂັ້ນຕອນລະບຽບການ ແລະ ກົດໝາຍວາງອອກ.