ແຂວງ ຜົ້ງສາລີ ກັບ ເມືອງຈຽງເຊິນ ພົບປະແລກປ່ຽນບົດຮຽນຮ່ວມກັນ.
26 Mar 2025 | ພາບ - ຂ່າວ: ແສງຄຳ ສາລີວັນ |
ກອງປະຊຸມພົບປະມິດຕະພາບລະຫ່ວາງ ຄະນະຜູ້ແທນແຂວງຜົ້ງສາລີ ແຫ່ງ ສປປ ລາວ ກັບ ຄະນະຜູ້ແທນເມືອງຈຽງເຊິນ ນະຄອນພູເອີ ແຂວງຢຸນນານ ແຫ່ງ ສປຈີນ ໄດ້ຈັດຂຶ້ນໃນຕອນເຊົ້າຂອງວັນທີ 26 ມີນາ 2025 ນີ້, ທີ່ຫ້ອງປະຊຸມຂອງຫ້ອງວ່າການແຂວງ ເຊິ່ງຝ່າຍແຂວງຜົ້ງສາລີ ນຳໂດຍ ທ່ານ ວີສອນ ລາວເມົາ ຮອງເຈົ້າແຂວງໆຜົ້ງສາລີ ແລະ ຝ່າຍ ເມືອງຈຽງເຊິນ ນຳໂດຍທ່ານ ຫລົງ ເຕີ ເຊິງ ຮອງເລຂາພັກເມືອງ, ເຈົ້າເມືອງ-ເມືອງຈຽງເຊີນ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.
ໃນກອງປະຊຸມ ທ່ານ ວີສອນ ລາວເມົາ ຮອງເຈົ້າແຂວງໆຜົ້ງສາລີ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນເມືອງຈຽງເຊິນ ເຊິ່ງໄດ້ນໍາເອົາຄວາມອົບອຸ່ນ, ຄວາມສາມັກຄີຮັກແພງ, ຄວາມເປັນຫ່ວງເປັນໄຍ ມາສູ່ການນໍາແຂວງຜົ້ງສາລີໃນຄັ້ງນີ້, ທັງເປັນການເສີມຂະຫຍາຍມູນເຊື້ອການພົວພັນຮ່ວມມືອັນດີງາມຂອງສອງພັກ, ສອງລັດຖະບານ ລາວ-ຈີນ ເວົ້າລວມ, ເວົ້າສະເພາະແຂວງຜົ້ງສາລີ ກັບເມືອງຈຽງເຊີນ, ເປັນການຈັດຕັ້ງຜັນຂະຫຍາຍຍຸດທະສາດການຮ່ວມມືຮອບດ້ານ, ໝັ້ນຄົງຍາວນານ ຕາມທິດ 4 ດີ; ໜຶ່ງແລວທາງ ໜຶ່ງເສັ້ນທາງ ແລະ ຄູ່ຮ່ວມຊາຕາກໍາ ລາວ-ຈີນ; ຈີນ-ລາວ ເຂົ້າສູ່ລວງເລິກ.
ພ້ອມກັນນັ້ນທັງສອງຝ່າຍກໍ່ໄດ້ຜັດປ່ຽນກັນລາຍງານສະພາບຈຸດພິເສດທີ່ຕັ້ງ ແລະ ການພັດທະນາເສດຖະກິດ-ສັງຄົມ, ການຮ່ວມມືຮອບດ້ານ ໃນໄລຍະທີ່ຜ່ານມາຢ່າງກົງໄປກົງມາໃຫ້ກັນຊາບ, ຊຶ່ງສອງຝ່າຍເຫັນດີເປັນເອກະພາບຮ່ວມກັນວ່າເພື່ອສືບຕໍ່ປົກປັກຮັກສາຄວາມສະເໝີພາບ, ຄວາມເປັນລະບຽບຮຽບຮ້ອຍລຽບຕາມຊາຍແດນສອງຝ່າຍ, ຊຸກຍູ້ ແລະ ປະກອບສ່ວນໃນການພັດທະນາເສດຖະກິດ - ສັງຄົມໃຫ້ມີບາດກ້າວຂະຫຍາຍຕົວເທື່ອລະກ້າວ, ຜ່ານຈາກການປຶກສາຫາລືສອງຝ່າຍໄດ້ເອກະພາບຕໍ່ທິດທາງແຜນການຮ່ວມມືເປັນຕົ້ນແມ່ນ: ສືບຕໍ່ເພີ່ມພູນສ້າງສາຍພົວພັນມິດຕະພາບ,ການຮ່ວມມືຮອບດ້ານ, ຄູ່ຮ່ວມຊະຕາກໍາດຽວກັນ ລະ ຫວ່າງ ລາວ-ຈີນ; ຈີນ-ລາວ ເວົ້າລວມ, ເວົ້າສະເພາະ ແຂວງຜົ້ງສາລີ ກັບ ເມືອງຈຽງເຊີນ ໃຫ້ເປັນປົກກະຕິ ແລະ ນັບມື້ເຂົ້າສູ່ລ່ວງເລິກ; ສືບຕໍ່ໃນການເປັນໃຈກາງ, ເປັນຂົວຕໍ່ໃນການປະສານ, ປຸກລະດົມຊຸກຍູ້ບັນດານັກທຸລະກິດ, ຫົວໜ່ວຍທຸລະກິດ ຂອງ ສປ ຈີນ ທີ່ມີຄວາມສາມາດ ແລະ ເງື່ອນໄຂເຂົ້າມາສຳຫຼວດລົງທຶນ ຢູ່ແຂວງຜົ້ງສາລີ ໃຫ້ຫຼາຍຂຶ້ນ; ສອງຝ່າຍສືບຕໍ່ຊຸກຍູ້ພາກສ່ວນປະຈໍາດ່ານອໍານວຍຄວາມສະດວກການຜ່ານ ເຂົ້າ-ອອກ ຢູ່ດ່ານສາກົນ ລ່ານຕຸ້ຍ-ເມືອງຄໍາ ແລະ ພ້ອມກັນສະເໜີຂັ້ນເທິງພິຈາລະນາໃຫ້ພົນລະເມືອງປະເທດທີສາມ ສາມາດຜ່ານເຂົ້າ-ອອກ ໄດ້ ໂດຍໄວ ເພື່ອເປັນເງື່ອນໄຂສ້າງໜ່ວຍງານວີຊ່າກັບດ່ານຢູ່ເບື້ອງລາວ ພ້ອມທັງອອກໃບຂັບຂີ່ຂ້າມປະເທດຊົ່ວຄາວ; ສອງຝ່າຍສືບຕໍ່ຮ່ວມກັນຕ້ານການເຄື່ອນໄຫວຜິດກົດໝາຍ ແລະ ອາດຊະຍາກຳຂ້າມຊາຍແດນ, ຊຸກຍູ້ສົ່ງເສີມວຽກງານສິ່ງແວກລ້ອມ, ວຽກງານການທ່ອງທ່ຽວ, ວຽກງານກູ້ໄພສຸກເສີນ ແລະ ອື່ນໆ.
Share:
