ພິທີເປີດຊຸດເຝິກອົບຮົມຫັດແອບການທະຫານ - ການເມືອງ, ພາລາທິການ, ເຕັກນິກ ແລະ ວິຊາສະເພາະ ປະຈຳໄຕມາດ 1 ປີ 2025 ຂອງກອງບັນຊາການທະຫານເມືອງບຸນໃຕ້ ແຂວງຜົ້ງສາລີ ໄດ້ໄຂຂຶ້ນໃນຕອນເຊົ້າຂອງວັນທີ 25 ມີນາ 2025 ນີ້ ຢູ່ທີ່ຫ້ອງປະຊຸມກອງບັນຊາການທະຫານເມືອງ. ໂດຍການເປັນປະທານຮ່ວມຂອງ ສະຫາຍ ທອງສິງ ອິນທະແສງ ເລຂາຄະນະບໍລິຫານງານພັກເມືອງ, ປະທານປ້ອງກັນຊາດ-ປ້ອງກັນຄວາມສະຫງົບຂັ້ນເມືອງ, ເຈົ້າເມືອງບຸນໃຕ້, ມີ ສະຫາຍ ພັຕ ທອງດີ ພົມປັນຍາ ກຳມະການພັກເມືອງ, ເລຂາຄະນະພັກຮາກຖານ, ຫົວໜ້າການເມືອງ ກອງບັນຊາການທະຫານເມືອງ, ມີບັນດາ ສະຫາຍ ຄະນະພັກ, ຄະນະບັນຊາ ກອງບັນຊາການທະຫານເມືອງ, ແຂກເຊີນ, ນາຍ ແລະ ພົນທະຫານເມືອງເຂົ້າຮ່ວມ.
ໃນພິທີ ສະຫາຍ ຮທ ເກດ ຈິດທະວົງ ໄດ້ສະເໜີຈຸດປະສົງ ພ້ອມທັງຜ່ານຂໍຕົກລົງ ວ່າດ້ວຍການອະນຸມັດໃຫ້ກອງບັນຊາການທະຫານເມືອງບຸນໃຕ້ ດຳເນີນເຝິກອົບຮົມ ຫັດແອບການທະຫານ - ການເມືອງ, ພາລາທິການ, ເຕັກນິກ ແລະ ວິຊາສະເພາະ ປະຈຳໄຕມາດ 1 ປີ 2025. ຂອງກອງບັນຊາການທະຫານເມືອງບຸນໃຕ້. ຈາກນັ້ນ, ສະຫາຍ ພັຕ ທອງດີ ພົມປັນຍາ ກຳມະການພັກ ເມືອງ, ເລຂາຄະນະພັກຮາກຖານ, ຫົວໜ້າການເມືອງ ກອງບັນຊາການທະຫານ ເມືອງ ໄດ້ມີຄຳເຫັນ ແລະ ກ່າວເປີດພິທີຢ່າງເປັນທາງການ ເຊິ່ງ ສະຫາຍໄດ້ກ່າວວ່າ: ການເຝິກແອບການທະຫານ - ການເມືອງ, ພາລາທິການ, ເຕັກນິກ ແລະ ວິຊາສະເພາະ ແມ່ນເພື່ອເປັນການຫັດແອບໃຫ້ພະນັກງານ-ນັກຣົບ ໃນກົມກອງມີຄວາມຮູ້, ຄວາມສາມາດທາງດ້ານວິຊາສະເພາະ, ມີຄວາມຊຳນິຊຳນານທາງດ້ານສິນລະປະຍຸດ, ຍຸດທະວິທີ ອັນແນ່ນອນແຫຼມຄົມ, ມີລະບຽບວີໄນຢ່າງເຂັ້ມງວດ, ເປັນບ່ອນອີງກຳແໜ້ນການຊີ້ນຳ-ນຳພາ ການກວດກາຕີລາຄາຄຸນນະພາບຂອງພະນັກງານນັກຣົບ ແນໃສ່ເຮັດໃຫ້ ນາຍ ແລະ ພົນທະຫານທຸກຄົນຕ້ອງທົບທວນຄືນບົດຮຽນເກົ່າ, ທາງດ້ານທິດສະດີ, ຫຼັກການ ແລະ ດ້ານຈັ່ງວະບາດກ້າວຕົວຈິງ, ກຳແໜ້ນເນື້ອໃນແຜນການແທດເໝາະກັບເປົ້າໝາຍ, ສາມາດຮັບໃຊ້ໜ້າທີ່ກຽມພ້ອມສູ້ຣົບມີໄຊຂອງກົມກອງ.
ສະຫາຍ ພັຕ ຄຳເພົາ ອິນນະວົງສາ ຮອງຫົວໜ້າພະແນກເສນາທິການ ໄດ້ຂຶ້ນຜ່ານ ແຜນການອົບຮົມຫັດແອບການທະຫານ - ການເມືອງ, ພາລາທິການ, ເຕັກນິກ ແລະ ວິຊາສະເພາະ ເຊິ່ງສະຫາຍໄດ້ໃຫ້ຮູ້ວ່າ: ເປົ້າໝາຍເຂົ້າຮ່ວມຂະບວນເຝິກອົບຮົມໃນຄັ້ງນີ້ ມີນັກສຳມະນາກອນ ທັງໝົດ 129 ສະຫາຍ, ຍິງ 18 ສະຫາຍ, ມີຄະນະຊີ້ນຳລວມ 3 ສະຫາຍ, ຄະນະຮັບຜິດຊອບລົງເລິກ 3 ສະຫາຍ ແລະ ວິທະຍາກອນ (ຄູສອນ) 14 ສະຫາຍ; ສຳລັບເນື້ອໃນທີ່ຈະອົບຮົມ-ຫັດແອບປະກອບມີ ພາກການເມືອງຮັບໃຊ້ສູ້ຣົບ, ພາກພາລາທິການຮັບໃຊ້ສູ້ຣົບ, ພາກເຕັກນິກລະບຽບ, ພິທີການ ແລະ ພາກການທະຫານ (ສິນລະປະຍຸດ, ຍຸດທະວິທີ) ໃນແຕ່ລະພາກແມ່ນຈະໄດ້ຮຽນຮູ້ທິດສະດີ ແລະ ປະ
ຕິບັດຕົວຈິງໄປພ້ອມໆກັນ ເປັນເວລາ 15 ວັນຈິ່ງຈະສຳເລັດ. ຈາກນັ້ນ, ຄະນະຮັບຜິດຊອບແຕ່ລະພະແນກການໄດ້ພັດປ່ຽນກັນຂຶ້ນຜ່ານບັນດາຂໍ້ກຳນົດ, ກົດລະບຽບ ໃນການອົບຮົມຫັດແອບ ການທະຫານ, ການເມືອງ, ພາລາທິການ, ເຕັກນິກ ແລະ ວິຊາສະເພາະ ພ້ອມທັງປະກອບຄຳຄິດຄຳເຫັນຢ່າງກົງໄປກົງມາ.
ໃນພິທີ ທີ່ມີຄວາມໝາຍຄວາມສຳຄັນນີ້ ສະຫາຍ ທອງສິງ ອິນທະແສງ ເລຂາຄະນະບໍລິຫານງານພັກເມືອງ, ປະທານປ້ອງກັນຊາດ-ປ້ອງກັນຄວາມສະຫງົບຂັ້ນເມືອງ, ເຈົ້າເມືອງບຸນໃຕ້ ໄດ້ມີຄຳເຫັນຕໍ່ພິທີ ເຊິ່ງກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ຜົນສຳເລັດໃນການຊີ້ນຳ-ນຳພາຂອງຄະນະພັກ, ຄະນະກອງບັນຊາ
ການທະຫານເມືອງບຸນໃຕ້ ໃນຕະຫຼອດໄລຍະທີ່ຜ່ານມາ ແລະ ສະແດງຄວາມຍ້ອງຍໍຊົມເຊີຍຕໍ່ການກະກຽມຄວາມພ້ອມໃນການເປີດຊຸດອົບຮົມຄັ້ງນີ້, ພ້ອມດຽວກັນນັ້ນ ສະ
ຫາຍຍັງໄດ້ເນັ້ນໜັກຫຼາຍບັນຫາຕໍ່ການດຳເນີນການເຝິກອົບຮົມ; ເປັນຕົ້ນແມ່ນເນັ້ນໃຫ້ບັນດາສະຫາຍ ນັກວິທະຍາກອນ ແລະ ນັກສຳມະນາກອນ ເອົາໃຈໃສ່ໃນການປະຕິ
ບັດສິດ ແລະ ໜ້າທີ່ຂອງຕົນເຂົ້າໃນການເຝິກແອບເຊັ່ນ: ການປະຕິບັດໂມງເວລາ, ການປະຕິບັດຂໍ້ກຳນົດ, ກົດລະບຽບ, ຄວາມເອົາໃຈໃສ່ໃນການສຶກສາຕຳລາ, ວິທີສິດສອນສົ່ງຄວາມຮູ້ຂອງນັກວິທະຍາກອນ ແລະ ຄວາມເອົາໃຈໃສ່ໃນການສຶກສາຮໍ່າຮຽນເອົາຄວາມຮູ້ປະສົບການຂອງນັກສຳມະນາກອນ, ມີການໃຫ້ກຽດ, ເຄົາລົບຕໍ່ການຈັດ
ຕັ້ງ, ປະຕິບັດສິດ ແລະ ພັນທະຂອງແຕ່ລະພາກສ່ວນ. ນອກຈາກນັ້ນ, ສະຫາຍ ຍັງໄດ້ເນັ້ນໜັກໃຫ້ບັນດາສະຫາຍ ນາຍ ແລະ ພົນທະຫານ ສືບຕໍ່ຍົກສູງນໍ້າໃຈຄວາມຮັບ
ຜິດຊອບຕໍ່ໜ້າທີ່ການເມືອງ ທີ່ການຈັດຕັ້ງຂັ້ນເທິງໄດ້ມອບໝາຍໃຫ້ ໂດຍສະເພາະແມ່ນວຽກງານການເມືອງແນວຄິດ, ສິນທໍາປະຕິວັດ, ຈັນຍາບັນ-ຈັນຍາທຳ ຂອງພະນັກງານນັກຣົບ ແລະ ມີການປັບປຸງຕົນເອງໃຫ້ມີການພັດທະນາຢ່າງຕໍ່ເນື່ອງ ເພື່ອກຽມພ້ອມຮັບໃຊ້ຊາດ, ຮັບໃຊ້ປະຊາຊົນຢ່າງແທ້ຈິງ.
