ໃນຕອນບ່າຍຂອງວັນທີ 25 ມີນາ 2025 ຢູ່ທີ່ຫ້ອງປະຊຸມຂອງຫ້ອງວ່າການ ເມືອງ ຍອດອູ ແຂວງຜົ້ງສາລີ ໄດ້ຈັດໃຫ້ມີກອງປະຊຸມພົບປະແລກປ່ຽນບົດຮຽນລະຫ່ວາງ ຄະ

ນະຜູ້ແທນ ເມືອງ ຍອດອູ ແຂວງຜົ້ງສາລີ ແຫ່ງ ສປປ ລາວ ກັບ ຄະນະຜູ້ແທນເມືອງຈຽງເຊິນ ນະຄອນພູເອີ ແຂວງຢູນນານ ແຫ່ງ ສປ ຈີນ ຂຶ້ນຢ່າງເປັນທາງການ, ເຊິ່ງຝ່າຍລາວ ນຳໂດຍ ທ່ານ ສົມຫວັງ ສຸມວິໄລ ກໍາມະການພັກແຂວງ, ເລຂາພັກເມືອງ ເຈົ້າເມືອງໆຍອດອູ ແລະ ຝ່າຍ ເມືອງຈຽງເຊິນ ນຳໂດຍທ່ານ ຫຼົງເຕີເຊິງ ຮອງເລຂາພັກ, ເມືອງຈຽງເຊິນ, ນະຄອນພູເອີ ແຫ່ງ ສປ ຈີນ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.

ໃນກອງປະຊຸມທ່ານ ສົມຫວັງ ສຸມວິໄລ ກໍາມະການພັກແຂວງ, ເລຂາພັກເມືອງ ເຈົ້າເມືອງໆຍອດອູ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນເມືອງຈຽງເຊິນ ໃນຄັ້ງນີ້ ທ່ານ ຫຼົງເຕີເຊິງ ຮອງເລຂາພັກເມືອງເມືອງຈຽງເຊິນ, ນະຄອນພູເອີ ແຫ່ງ ສປ ຈີນ ໄດ້ກ່າວວ່າ: ໃນຊຸມປີຜ່ານມານີ້ ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງ ເມືອງຈຽງເຊີນ ກັບ ເມືອງຍອດອູ ແຂວງ ຜົ້ງສາລີ ນັບມື້ນັບເລິກເຊິ່ງ ແລະ ໄດ້ຮັບການພັດທະນາຢ່າງຕັ້ງໜ້າ. ພາຍໃຕ້ຄວາມພະຍາຍາມຂອງສອງຝ່າຍພວກເຮົາ, ການຮ່ວມມືໃນຂົງເຂດຕ່າງໆໄດ້ຮັບໝາກຜົນຢ່າງໃຫ່ຍຫຼວງ, ເພື່ອສືບຕໍ່ເພີ່ມທະວີການຈັດຕັ້ງປະຕິບັດຄວາມເຫັນດີເອກະພາບຂອງການນໍາສອງປະເທດ ຈີນ-ລາວ. ໂດຍສະເພາະ, ກ່ຽວກັບການກໍ່ສ້າງແຜນແມ່ບົດວ່າດ້ວຍຄູ່ຮ່ວມຊາຕາກໍາ ຈີນ-ລາວ (ປີ 2024-2028), ເປັນການພັກດັນສູ່ການຜັນຂະຫຍາຍການຮ່ວມມືລະຫວ່າງ ເມືອງຈຽງເຊີນ ກັບ ແຂວງຜົ້ງສາລີ, ເມືອງຈຽງເຊີນ ກັບ ເມືອງຍອດອູ ແລະ ສືບຕໍ່ຊຸກຍູ້ການພັດທະນາ ທາງດ້ານການຮ່ວມມື ໃນຂົງເຂດຕ່າງໆ ລະຫວ່າງ ເມືອງຈຽງເຊີນ ແລະ ແຂວງຜົ້ງສາລີ ໃຫ້ນັບມື້ໃຫ່ຍຫຼວງກວ່າເກົ່າ. ຫຼັງຈາກນັ້ນທ່ານກໍ່ໄດ້ສະເໜີແລກປ່ຽນບາງວຽກງານ ກັບບັນດາທ່ານເຊິ່ງມີວຽກງານ ລົງເລິກການຮ່ວມມືປ້ອງກັນແລະສະກັດກັ້ນໄຟໄຫມ້ປ່າຕາມຊາຍແດນ, ເລັ່ງລັດການຮ່ວມມືການທ່ອງທ່ຽວຂ້າມຊາຍແດນ, ຮ່ວມກັນຕ້ານການເຄື່ອນໄຫວຜິດກົດໝາຍແລະອາດຊະຍາກຳຂ້າມຊາຍແດນ , ເພີ່ມທະວີການຮ່ວມມືລະຫວ່າງສອງຝ່າຍໃນການປູກຝັງຜະລິດຕະພັນກະເສດ, ການຮ່ວມມືດ້ານການແພດແລະສາທາລະນະສຸກ, ວຽກງານດ້ານເມືອງແຮກສ່ຽວ, ການຮ່ວມມືດ້ານອື່ນໆ. ນອກຈາກບັນຫາທີ່ກ່າວມາຂ້າງເທິງ, ທາງຄະນະນໍາເມືອງຈຽງເຊີນຫວັງຢ່າງຍິ່ງວ່າຈະເພີ່ມທະວີການຮ່ວມມືກັບເຂດປົກຄອງຂອງເມືອງຍອດອູຕື່ມອີກໃນການສຶກສາ, ການຄ້າ,ການລົງທຶນ ແລະ ການຄວບຄຸມສັດຕູພືດ.

ຫວັງວ່າບັນດາການນຳເມືອງຍອດອູຈະສືບຕໍ່ການສະໜັບສະໜູນບັນດາຫ້ອງການກ່ຽວຂ້ອງ, ວິສາຫະກິດ ແລະ ປະຊາຊົນຂອງສອງຝ່າຍດຳເນີນບັນດາການເຄື່ອນໄຫວແລກປ່ຽນຕ່າງໆ ແລະ ສ້າງເງື່ອນໄຂສະດວກໃຫ້ແກ່ການພັດທະນາເສດຖະກິດ-ສັງຄົມຂອງເມືອງຍາດອູ ແລະ ເມືອງຈຽງເຊິນ. ຊຶ່ງເມືອງຈຽງເຊິນພ້ອມແລ້ວທີ່ຈະໃຫ້ການສະໜັບສະໜູນຊ່ວຍເຫຼືອຕາມເງື່ອນໄຂຕົວຈິງ, ເຫັນດີຮ່ວມມືສ້າງກົນໄກການນຳໃຊ້ແຮງງານ ແລະ ສອງຝ່າຍເຫັນດີຮ່ວມມືໄປມາຫາສູ່ກັນ, ພົບປະແລກປ່ຽນວຽກງານຊາຍແດນຂອງສອງຝ່າຍອີກດ້ວຍ.