ກອງປະຊຸມພົບປະມິດຕະພາບລະຫ່ວາງ ຄະນະຜູ້ແທນ ເມືອງບຸນເໜືອ ແຂວງຜົ້ງສາລີ ແຫ່ງ ສປປ ລາວ ກັບ ຄະນະຜູ້ແທນເມືອງຫຼ້າ ແຂວງຢູນນານ ແຫ່ງ ສປຈີນ ໄດ້ຈັດຂຶ້ນໃນຕອນບ່າຍຂອງວັນທີ 26 ມີນາ 2025 ນີ້, ທີ່ຫ້ອງປະຊຸມຊັ້ນສາມຂອງຫ້ອງວ່າການເມືອງບຸນເໜືອ ເຊິ່ງຝ່າຍເມືອງບຸນເໜືອ ນຳໂດຍ ທ່ານ ວີສັນ ວົງນະຄອນ ຮອງເລຂາພັກເມືອງບຸນເໜືອ ແລະ ຝ່າຍ ເມືອງຫຼ້າ ນຳໂດຍທ່ານ ຊົງຈ່າວຢາງ ຮອງເຈົ້າເມືອງ -ເມືອງຫຼ້າ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.
ໃນກອງປະຊຸມທ່ານ ວີສັນ ວົງນະຄອນ ຮອງເລຂາພັກເມືອງບຸນເໜືອ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນເມືອງຫຼ້າ ເຊິ່ງໄດ້ນໍາເອົາຄວາມອົບອຸ່ນ, ຄວາມສາມັກຄີຮັກແພງ, ຄວາມເປັນຫ່ວງເປັນໄຍ ມາສູ່ການນໍາເມືອງບຸນເໜືອໃນຄັ້ງນີ້, ທັງເປັນການເສີມຂະຫຍາຍມູນເຊື້ອການພົວພັນຮ່ວມມືອັນດີງາມຂອງສອງພັກ, ສອງລັດຖະບານ ລາວ-ຈີນ ເວົ້າລວມ, ເວົ້າສະເພາະເມືອງບຸນເໜືອ ແຂວງຜົ້ງສາລີ ກັບເມືອງຫຼ້າ ແຂວງຢູນນານ, ໃຫ້ເຂົ້າສູ່ລວງເລີກ ຢ່າງບໍ່ຢຸດຢັ້ງ; ພິເສດແມ່ນການນຳສອງເມືອງ ພົບກັນຄັ້ງນີ້ເປັນຄັ້ງທຳອິດ ແລະ ຫວັງຢ່າງຍີ່ງວ່າພວກເຮົາຈະໄດ້ສືບຕໍ່ພົວພັນຮ່ວມມືໃນຕະຫຼອດໄປ.
ພ້ອມກັນນັ້ນທັງສອງຝ່າຍກໍ່ໄດ້ຜັດປ່ຽນກັນລາຍງານສະພາບຈຸດພິເສດທີ່ຕັ້ງ ແລະ ການພັດທະນາເສດຖະກິດ-ສັງຄົມ, ການຮ່ວມມືຮອບດ້ານ ໃນໄລຍະທີ່ຜ່ານມາຢ່າງກົງໄປກົງມາໃຫ້ກັນຊາບ, ຊຶ່ງສອງຝ່າຍເຫັນດີເປັນເອກະພາບຮ່ວມກັນວ່າເພື່ອສືບຕໍ່ປົກປັກຮັກສາຄວາມສະເໝີພາບ, ຄວາມເປັນລະບຽບຮຽບຮ້ອຍລຽບຕາມຊາຍແດນສອງຝ່າຍ, ຊຸກຍູ້ ແລະ ປະກອບສ່ວນໃນການພັດທະນາເສດຖະກິດ - ສັງຄົມໃຫ້ມີບາດກ້າວຂະຫຍາຍຕົວເທື່ອລະກ້າວ, ຜ່ານຈາກການປຶກສາຫາລືສອງຝ່າຍໄດ້ເອກະພາບຕໍ່ທິດທາງແຜນການຮ່ວມມືເປັນຕົ້ນແມ່ນ: ສືບຕໍ່ເພີ່ມພູນສ້າງສາຍພົວພັນມິດຕະພາບ,ການຮ່ວມມືຮອບດ້ານ, ຄູ່ຮ່ວມຊະຕາກໍາດຽວກັນ ລະຫວ່າງ ລາວ-ຈີນ; ຈີນ-ລາວ ເວົ້າລວມ, ເວົ້າສະເພາະ ເມືອງບຸນເໜືອ ກັບ ເມືອງຫຼ້າ ໃຫ້ເປັນປົກກະຕິ ແລະ ນັບມື້ເຂົ້າສູ່ລວງເລິກ; ສືບຕໍ່ໃນການເປັນໃຈກາງ, ເປັນຂົວຕໍ່ໃນການປະສານ, ປຸກລະດົມຊຸກຍູ້ບັນດານັກທຸລະກິດ, ຫົວໜ່ວຍທຸລະກິດ ຂອງ ສປ ຈີນ ທີ່ມີຄວາມສາມາດ ແລະ ເງື່ອນໄຂເຂົ້າມາສຳຫຼວດລົງທຶນ ຢູ່ເມືອງບຸນເໜືອ ໃຫ້ຫຼາຍຂຶ້ນ; ສອງຝ່າຍສືບຕໍ່ຊຸກຍູ້ພາກສ່ວນປະຈໍາດ່ານອໍານວຍຄວາມສະດວກການຜ່ານ ເຂົ້າ-ອອກ ຢູ່ດ່ານ ແລະ ພ້ອມກັນສະເໜີຂັ້ນເທິງພິຈາລະນາໃຫ້ພົນລະເມືອງປະເທດທີ ສາມາດຜ່ານເຂົ້າ-ອອກ ໄດ້ ໂດຍໄວ ແລະ ຊຸກຍູ້ສົ່ງເສີມວຽກງານສິ່ງແວດລ້ອມ, ວຽກງານການທ່ອງທ່ຽວ ແລະ ວຽກງານອື່ນໆ.
ໂອກາດທີ່ຄະນະຜູ້ແທນເມືອງຫຼ້າ ແຂວງຢູນນານ ແຫ່ງ ສປຈີນມາເຮັດວຽກຢູ່ເມືອງບຸນເໜືອໃນຄັ້ງນີ້ຍັງໄດ້ນໍາເອົາອຸປະກອນມອບໃຫ້ຈຳນວນໜຶ່ງໃຫ້ອົງການປົກຄອງເມືອງບຸນເໜືອເປັນມູນຄ່າ 1 ໝື່ນຢວນຕື່ມ.
