ໃນຕອນເຊົ້າຂອງວັນທີ 27 ມີນາ 2025 ນີ້ ທ່ານ ສັນຕິພາບ ພົມວິຫານ ກຳມະການສູນກາງພັກ, ລັດຖະມົນຕີກະຊວງການເງີນ ພ້ອມດ້ວຍບັນດາກົມຂອງກະຊວງ ໄດ້ລົງເຄື່ອນໄຫວພົບປະໂອ້ລົມ ແລະ ຊຸກຍູ້ວຽກງານຢູ່ພະແນກການເງີນແຂວງຜົ້ງສາລີ. ໂດຍການ ເຂົ້າຮ່ວມກອງປະຊຸມພົບປະໂອ້ລົມ ແລະ ຊຸກຍູ້ຂອງ ທ່ານ ພອນໄຊ ແກ້ວສົມພັນ ກໍາມະການປະຈໍາພັກແຂວງ, ປະທານແນວລາວສ້າງຊາດແຂວງພ້ອມຄະນະພະແນກການອ້ອມຂ້າງ, ຜູ້ເຮັດວຽກງານການເງີນຂັ້ນແຂວງ ແລະ ເມືອງເຂົ້າຮ່ວມ.
ໂອກາດນີ້ ທ່ານ ປອ ວັນໄຊ ສຸກສັນ ກຳມະການພັກແຂວງ, ຫົວໜ້າພະແນກການເງີນແຂວງຜົ້ງສາລີ ໄດ້ຂື້ນລາຍງານຫຍໍ້ ມາດຕະການວຽກງານຈຸດສຸມ ໃນການຈັດຕັ້ງປະຕິບັດແຜນລາຍຮັບ - ລາຍຈ່າຍຂອງແຂວງຜົ້ງສາລີ ປີ 2025 ຕາມຄາດໝາຍ ເສດຖະກິດເອກະລາດເປັນເຈົ້າຕົນເອງ ແລະ ຄາດຄະເນການສ້າງແຜນງົບປະມານປີ 2026. ເຊີງປີ 2025 ນີ້ພະແນກການເງີນແຂວງຜົ້ງສາລີມີພະນັກງານທັງໝົດ 211ຄົນ, ຍິງ 99 ຄົນ; ການຂຸດຄົ້ນລາຍຮັບເຂົ້າງົບປະມານ ມາຮອດວັນທີ 19 ມີນາ 2025 ໄດ້ທັງໝົດ 119,291.08 ລ້ານກີບ ເທົ່າກັບ18.55% ຂອງແຜນການປີ, ລາຍຈ່າຍງົບປະມານປະຕິບັດໄດ້ທັງໝົດ62,163.10ລ້ານກີນ ເທົ່າກັບ 10.96%.
ຈາກນັ້ນ, ບັນດາກົມຈາກກະຊວງການເງີນໄດ້ພັດປ່ຽນກັນຂຶ້ນສະເໜີ ກົນໄກການນຳໃຊ້ລາຍຮັບເງີນເກີນແຜນປີ 2024 ພູດ 50 % ຂອງແຂວງ ແລະ ການກະກຽມສ້າງແຜນລາຍຮັບ - ລາຍຈ່າຍ ງົບປະມານປີ 2026; ການຄຸ້ມຄອງຖານຂໍ້ມູນລາຍຮັບ, ການຈັດເກັບອາກອນປະເພດຕ່າງໆ, ຜ່ານລະບົບທັນສະໄໝ ແລະ ການກະກຽມສ້າງແຜນປີ 2026 ຕິດພັນກັບລາຍຮັບສວຍສາອາກອນ; ການຈັດເກັບພາສີຜ່ານລະບົບ NSWA+, ການຈັດເກັບຄ່າທຳນຽມ - ຄ່າບໍລິການແບບທັນສະໄໝລວມສູນ (FinPass) ຢູ່ບັນດາດ່ານສາກົນ, ການແກ້ໄຂພາຫະນະບໍ່ຖຶກຕ້ອງ ແລະ ການກະກຽມສ້າງແຜນປີ 2026 ຕິດພັນກັບລາຍຮັບພາສີ; ການຄຸ້ມຄອງບັນດາໂຄງການແຮ່ທາດຕ່າງໆ, ການປະຕິບັດຕາມດຳລັດເລກທີ 599/ລບ, ຂໍ້ຕົກລົງເລກທີ 169/ນຍ, ຄຳແນະນຳເລກທີ 0393/ກງ ແລະ ການກະກຽມສ້າງແຜນປີ 2026 ຕິດພັນກັບລາຍຮັບຊັບສິນແຫ່ງລັດ, ຊຸກຍູ້ການແກ້ໄຂຜົນການກວດສອບ ແລະ ການຈັດຕັ້ງປະຕິບັດລວມສູນລາຍຮັບຜ່ານບັນຊີລວມສູນຄັງເງີນ (TSA). ພ້ອມນີ້, ຜູ້ເຂົ້າຮ່ວມໄດ້ພັດປ່ຽນກັນປະກອບຄຳຄິດຄຳເຫັນ ເພື່ອເຮັດໃຫ້ການຈັດຕັ້ງປະຕິບັດວຽກງານການເງີນຢູ່ແຂວງຜົ້ງສາລີ ໄດ້ຮັບໝາກຜົນທີດີ ແລະ ຮັບຟັງການມີຄຳເຫັນໂອ້ລົມຂອງ ທ່ານ ສັນຕິພາບ ພົມວິຫານ ກຳມະການສູນກາງພັກ, ລັດຖະມົນຕີກະຊວງການເງີນຕື່ມອີກ.
