ໃນຕອນເຊົ້າຂອງວັນທີ 27 ມີນາ 2025 ນີ້ ທ່ານ ສັນຕິພາບ ພົມວິຫານ ກຳມະການສູນກາງພັກ, ລັດຖະມົນຕີກະຊວງການເງີນ ພ້ອມດ້ວຍຄະນະ ໄດ້ເຂົ້າພົບປະກັບ ທ່ານ ວິສອນ ລາວເມົາ ກໍາມະການປະຈໍາພັກແຂວງ, ຮອງເຈົ້າແຂວງ, ຜູ້ຊີ້ນໍາຂົງເຂດເສດຖະກິດແຂວງຜົ້ງສາລີ ພ້ອມຄະນະ .ໂອກາດນີ້ ທ່ານ ຮອງເຈົ້າແຂວງຜົ້ງສາລີ ໄດ້ລາຍ
ງານຫຍໍ້ສະພາບການຈັດຕັ້ງປະຕິບັດວຽກງານຂອງແຂວງເຊີງໄລຍະປີ2021-2025 ແຂວງຜົ້ງສາລີໄດ້ສຸມໃສ່ແກ້ໄຂ 8 ບັນຫາຕົ້ນຕໍ ທີ່ແຂວງພົບພໍ້ຜ່ານມາ ແລະ ພວມປະເສີນຢູ່ໃນປັດຈຸບັນ ໂດຍ ໄດ້ກໍານົດ 16 ໜ້າວຽກຕົ້ນຕໍ , ສຸມໃສ່ຈັດຕັ້ງປະຕິບັດ 6 ເປົ້າໝາຍຕົ້ນຕໍ, 11 ວຽກຈຸດສຸມ, 9 ແຜນງານ ແລະ 6 ທາງອອກຂອງແຂວງ, ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ແຕ່ປີ 2021-2025 ແລະ ແຜນພັດທະນາເສດຖະກິດ-ສັງຄົມປະຈໍາປີ 2024 ໂດຍໄລຍະ 1 ປີ ຜ່ານມາ: ເສດຖະກິດຂະຫຍາຍຕົວ 6% ລື່ນແຜນການປີ 12.81%, ລວມຍອດຜະລິດຕະພັນພາຍໃນ (GDP) ບັນລຸໄດ້ 6,716.36 ຕຶ້ກີບ ລື່ນແຜນການປີ 32.28%, ສະເລ່ຍໃສ່ຫົວຄົນໜຶ່ງ ບັນລຸ 1,530 ໂດລາສະຫາລັດ ຫຼື ເທົ່າກັບ 33.46 ລ້ານກີບ. ຂະແໜງກະສິກໍາຂະຫຍາຍຕົວເພີ່ມຂຶ້ນ 9.35%, ຂະແໜງອຸດສາຫະກໍາຂະຫຍາຍຕົວ 6.57% ແລະ ຂະແໜງການບໍລິການຂະຫຍາຍຕົວ 2.26%; ອັນທີ່ພົ້ນເດັ່ນມາຮອດປີ 2024 ໄດ້ຮັບຮອງຕົວເມືອງນ້ອຍໃນຊົນນະບົດ 2 ຈຸດ ແລະ ຮັບຮອງເມືອງບຸນເໜືອເປັນເມືອງພົ້ນທຸກ ແລະ ຜ່ານການປະເມີນຕາມດໍາລັດ 348/ລບ ມີບ້ານພົ້ນທຸກ 183 ບ້ານ ແລະ ຄອບຄົວພົ້ນທຸກ 17,407 ຄອບຄົວ ແລະ ຍັງມີບ້ານທຸກ 324 ບ້ານ, ກວມ 63.90% ຂອງຈໍານວນບ້ານໃນທົ່ວແຂວງ ; ມີເສັ້ນທາງເຂົ້າເຖິງບ້ານ ກວມ 100%;ບ້ານທີ່ໄດ້ຊົມໃຊ້ລະບົບຕາຄ່າຍໄຟຟ້າມີ 362 ບ້ານ ກວມ 71,97% ;ບ້ານທີ່ໄດ້ຊົມໃຊ້ນໍ້າປະປາ 52 ບ້ານ ເທົ່າກັບ10.34% ;ບ້ານໄດ້ຊົມໃຊ້ໂທລະສັບດ້ວຍລະບົບຕ່າງໆມີ 482 ບ້ານ, ກວມ 96% ,ບ້ານຊົມໃຊ້ສັນຍານອິນເຕີເນັດມີ 314 ບ້ານ, ກວມ 62% ຂອງຈໍານວນບ້ານໃນທົ່ວແຂວງ; ສຸມໃສ່ກໍ່ສ້າງ ແລະ ຍົກຍ້າຍເທດສະບານແຂວງ ຈາກເມືອງຜົ້ງສາລີ ມາຕັ້ງຢູ່ບຸນເໜືອ ມີຄວາມຄືບໜ້າ 82%. ການພັດທະນາວັດທະນະທໍາ-ສັງຄົມ ໄດ້ເອົາໃຈໃສ່ປັບປຸງຍົກລະດັບໂຄງລ່າງດ້ານວັດທະນະທໍາ-ສັງຄົມ ພ້ອມກັນນັ້ນກໍ່ໄດ້ພັດທະນາແບບຢືນຍົງ (SDGs) ຢ່າງຕໍ່ເນື່ອງ. ຈາກນັ້ນ, ທ່ານ ສັນຕິພາບ ພົມວິຫານ ກຳມະການສູນກາງພັກ, ລັດຖະມົນຕີກະຊວງການເງີນ ໄດ້ແຈ້ງຈຸດປະສົງໃນການລົງມາເຄື່ອນໄຫວເຮັດວຽກໃນຄັ້ງນີ້ ໃຫ້ທ່ານຮອງເຈົ້າແຂວງຜົ້ງສາລີຮັບຊາບ ເຊີງການມາແຂວງຜົ້ງສາລີຄັ້ງນີ້ແມ່ນເພື່ອພົບປະໂອ້ລົມຄະນະນໍາ ແລະ ພະນັກງານທີເຮັດວຽກງານການເງີນ ແລະ ຊຸກຍູ້ການຈັດຕັ້ງປະຕິບັດວຽກງານການເງີນຂອງແຂວງຜົ້ງສາລີ.
