ກອງປະຊຸມໃຫຍ່ຜູ້ແທນອົງຄະນະພັກເມືອງໃໝ່ ຄັ້ງທີ XV ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 27 ມີນາ 2025 ທີ່ສະໂມສອນໃຫຍ່ເມືອງໃໝ່, ແຂວງຜົ້ງສາລີ. ໂດຍພາຍໃຕ້ການ ເປັນປະທານ ຂອງ ສະຫາຍ ພອນທະວີ ໄຊມົນຕີ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໆໃໝ່,ໃຫ້ກຽດເຂົ້າຮ່ວມຂອງ ສະຫາຍ ຄໍາຜອຍ ວັນນະສານ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຜົ້ງສາລີ, ມີບັນດາສະຫາຍຮອງເລຂາພັກ, ຄະນະປະຈໍາພັກແຂວງ, ຄະນະນໍາກ່ຽວຂ້ອງຂັ້ນແຂວງ, ບັນດາສະຫາຍໃນອົງຄະນະພັກເມືອງ ພ້ອມດ້ວຍແຂກຖືກເຊີນ ແລະ ບັນດາສະຫາຍຜູ້ແທນສົມບູນຈໍານວນ 139 ສະຫາຍ, ຍິງ 14 ສະຫາຍ ທີ່ເປັນຕົວແທນໃຫ້ສະມາຊິກໃນທົ່ວເມືອງ 212 ສະຫາຍ, ຍິງ 27 ສະຫາຍ ເຂົ້າຮ່ວມ.

ໃນກອງປະຊຸມ ສະຫາຍ ພອນທະວີ ໄຊມົນຕີ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງ ເຈົ້າເມືອງໆໃໝ່ ໄດ້ກ່າວເປີດກອງປະຊຸມຢ່າງເປັນທາງການພ້ອມທັງຜ່ານຮ່າງບົດລາຍງານການເມືອງສອງພາກ ເຊິ່ງ​ມີບາງຕອນສະຫາຍ ​ໄດ້​ກ່າວ​ວ່າ: ພາຍໃຕ້ການຊີ້ນຳຈາກຄະນະບໍລິຫານງານພັກແຂວງ ແລະ ການນຳພາຂອງຄະນະບໍລິຫານງານພັກເມືອງໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກຂັ້ນຕ່າງໆ ໂດຍສະເພາະແມ່ນ ມະຕິກອງປະຊຸມໃຫຍ່ຄັ້ງທີ XIV ຂອງອົງຄະນະພັກເມືອງໃໝ່ ຕະຫຼອດໄລຍະ 5 ປີຜ່ານມາເຫັນວ່າມີຜົນສໍາເລັດຫຼາຍດ້ານ ເປັນຕົ້ນ ທົ່ວເມືອງແມ່ນມີສະຖຽນລະພາບທາງດ້ານການເມືອງອັນໜັກແໜ້ນ, ທົ່ວສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດ-ສັງຄົມ ມີການພັດທະນາດ້ວຍບາດກ້າວ ແລະ ທ່ວງທ່າໃໝ່, ປະຊາຊົນບັນດາເຜົ່າມີຄວາມສາມັກຄີປອງດອງ, ພື້ນຖານໂຄງລ່າງຂອງເມືອງໄດ້ຮັບການປັບປຸງ, ຊີວິດການເປັນຢູ່ຂອງປະຊາຊົນ​ດີຂຶ້ນເປັນກ້າວໆ, ອັດຕາສ່ວນຄວາມທຸກຍາກໄດ້ຫຼຸດໜ້ອຍຖອຍລົງເທື່ອລະກ້າວ. ໂດຍໄດ້ເອົາໃຈໃສ່​​ດ້ານການພັດທະນາ​ເສດ​ຖະ​ກິດເປັນໃຈກາງ​ ສຸມໃສ່ພັດທະນາຕາມແລວ 1, 4, 6 ຂອງເມືອງວາງອອກ ໃນໄລຍະ 5 ປີ ການຂະຫຍາຍຕົວເສດຖະກິດສະເລຍ 7,09 %5 ປີຜ່ານມາ ການຂະຫຍາຍຕົວດ້ານເສດຖະກິດແມ່ນຢູ່ໃນລະດັບ 7.09% ທຽບໃສ່ແຜນປະຕິບັດໄດ້ 71.96% ໃນນີ້ຂະແໜງກະສິກຳ-ປ່າໄມ້ ແລະ ການປະມົງຂະຫຍາຍຕົວ 7.19%, ຂະແໜງອຸດສາຫະກໍາ-ຫັດຖະກຳ ຂະຫຍາຍຕົວ 10.45%, ຂະແໜງບໍລິການ ຂະຫຍາຍຕົວ 10.77%, ລວມຍອດລາຍຮັບຜົນຜະລິດໃນ 5 ປີບັນລຸ 1,243.66 ຕື້ກີບ ທຽບໃສ່ແຜນການປະຕິບັດໄດ້ 90.97%, ມູນຄ່າເພີ່ມຕາມລາຄາໃນປີ 2024 ລວມຍອດລາຍຮັບຜົນຜະລິດບັນລຸ 288.17 ຕື້ກີບ, ສະເລ່ຍຕໍ່ຫົວຄົນບັນລຸໄດ້ 476 ໂດລາ/ຄົນ/ປີ, ທຽບແຜນການປະຕິບັດ 35.27% (ອັດຕາແລກປ່ຽນ 21,393) ເທົ່າກັບ 10,177.69 ລ້ານກີບ/ຄົນ/ປີ.

ກອງປະຊຸມໃຫຍ່ຄັ້ງທີ XV ຂອງຜູ້ແທນອົງຄະນະພັກເມືອງໃໝ່ຄັ້ງນີ້ ຜູ້ແທນຈະໄດ້ພ້ອມກັນຄົ້ນຄ້ວາ,ປະກອບຄໍາເຫັນໃສ່ຮ່າງບົດລາຍງານການເມືອງ, ແຜນພັດທະນາ ເສດຖະກິດ - ສັງຄົມ 5 ປີ ພ້ອມທັງທົບທວນຕີລາຄາຄືນກ່ຽວກັບການຈັດຕັ້ງປະຕິບັດແນວທາງການປ່ຽນແປງໃໝ່ທີ່ມີຫຼັກການຂອງພັກກໍ່ຄືການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ XV ຂອງອົງຄະນະພັກເມືອງກ່ຽວກັບດ້ານຕັ້ງໜ້າ ແລະ ຖອດຖອນບົດຮຽນຢ່າງພາວະວິໄສ ພ້ອມດຽວກັນນັ້ນຈະໄດ້ພ້ອມກັນກຳນົດທິດທາງໜ້າທີ່ແຕ່ນີ້ຮອດປີ 2029. ​

ກອງປະຊຸມໃຫຍ່ຜູ້ແທນອົງຄະນະພັກເມືອງ ຄັ້ງທີ XV ຈະສືບຕໍ່ດໍາເນີນເປັນເວລາ 2 ວັນ ຮອດວັນທີ 28 ມີນາ 2025 ຈຶ່ງຈະສໍາເລັດ.