ພິທີ ມອບ-ຮັບ ນໍ້າລິນນໍ້າສະອາດ ບ້ານແສນອິນຫຼວງ ທີ່ຂຶ້ນກັບກຸ່ມສຳພັນໄຊ, ເມືອງບຸນໃຕ້ ແຂວງຜົ້ງສາລີ ໄດ້ຈັດຂຶ້ນໃນຕອນເຊົ້າຂອງວັນທີ 27 ມີນາ 2025 ຢູ່ທີ່ສະໂມສອນບ້ານແສນອິນຫຼວງ. ໂດຍເປັນກຽດເຂົ້າຮ່ວມຂອງ ທ່ານ ຄໍາຫຼ້າ ດວງມະໄລ ກຳມະການໃນຄະນະປະຈຳພັກເມືອງ, ຮອງເລຂາ, ຮອງເຈົ້າເມືອງ, ຜູ້ຊີ້ນຳວຽກງານຂົງເຂດວັດທະນະທຳ-ສັງຄົມ, ມີທ່ານ ປທ ທອງວັນ ລາວຈຸ່ງ ກຳມະການພັກເມືອງ, ເລຂາຄະນະພັກຮາກຖານກຸ່ມສຳພັນໄຊ, ມີທ່ານ ນາງແປງ ສຸກຫຼ້າສີ ຮອງຫົວໜ້າ ຫ້ອງການສາທາລະນະສູກເມືອງ, ມີທ່ານ ບຸນພອນ ເລຂາພັກບ້ານ ນາຍບ້ານແສນອີນຫຼວງ, ມີທ່ານ ສອນນາລິນ ມິດຕະພອນ ອຳນວຍການບໍລິສັດ ມິດຕະພອນ ກໍ່ສ້າງ ແລະ ສ້ອມແປງເຄຫະສະຖານຈໍາກັດ, ມີບັນດາທ່ານຄະນະຮັບຜິດຊອບໂຄງການຂັ້ນເມືອງ, ອົງການຈັດຕັ້ງຂັ້ນບ້ານ, ຕະຫຼອດຮອດຊາວບ້ານແສນອິນຫຼວງເຂົ້າຮ່ວມ.

ໃນພິທີທ່ານ ນາງ ແປງ ສຸກຫຼ້າສີ ຮອງຫົວຫນ້າຫ້ອງການສາທາລະນະສຸກເມືອງ ໄດ້ມີຄຳເຫັນກ່າວເປີດພິທີ, ພ້ອມທັງຜ່ານບົດລາຍງານການຈັດຕັ້ງປະຕິບັດໂຄງການ ເຊິ່ງທ່ານໄດ້ໃຫ້ຮູ້ວ່າ: ໂຄງການກໍ່ສ້າງນໍ້າລິນ-ນໍ້າສະອາດ ຢູ່ບ້ານແສນອິນຫຼວງ ເປັນໂຄງການໜຶ່ງທີ່ໄດ້ຮັບທຶນຈາກລັດຖະບານ ເພື່ອຈັດຊື້ ແລະ ສົ່ງເຄື່ອງ ພ້ອມທັງຊີ້ນໍາການກໍ່ສ້າງລະບົບນໍ້າລິນ-ນໍ້າສະອາດ ໃນມູນຄ່າ 327, 800,000 ກີບ ສົມທົບກັບແຫຼ່ງທຶນຂອງຊາວບ້ານເຊັ່ນ: ໄມ້ຄໍ້າແບບ, ໄມ້ແປ້ນແບບ, ແຮງງານ ໃນມູນຄ່າ 26,454,000 ກີບ ລວມມູນຄ່າການກໍ່ສ້າງທັງໝົດແມ່ນ 354,254,000 ໂດຍແມ່ນບໍລິສັດ ມິດຕະພອນ ກໍ່ສ້າງ ແລະ ສ້ອມແປງເຄຫາສະຖານຈໍາກັດ ເປັນຜູ້ຮັບເໝົາກໍ່ສ້າງ. ໄດ້ເລີ່ມຈັດຕັ້ງປະຕິບັດແຕ່ວັນທີ 5 ທັນວາ 2024 ເຖິງ ວັນທີ 5 ມັງກອນ 2025 ຈຶ່ງສໍາເລັດ. ໂດຍປະຕິດບັດກໍ່ສ້າງຝາມຫົວງານ 1 ບ່ອນ, ຂຸດຮ່ອງວາງທໍ່ 4,300 ແມັດ ຈາກຫົວງານຫາອ່າງເກັບ, ກໍ່ສ້າງອ່າງເກັບນໍ້າ 45.000 ລິດ 1 ອ່າງ, ຕິດຕັ້ງກົງເຕີ ແລະ ຫົວກ໊ອກນໍ້າ 50 ຄອບຄົວ. ການຈັດຕັ້ງປະຕິບັດກິດຈະກໍາໃນແຕ່ລະໄລຍະຂອງໂຄງການ ທາງວິຊາການຊີ້ນຳຂັ້ນເມືອງຕິດຕາມກວດກາເປັນແຕ່ລະໄລຍະ ເຫັນວ່າຖືກຕ້ອງຕາມສັນຍາ ແລະ ສຳເລັດ ຕາມກຳນົດເວລາ. ດັ່ງນັ້ນ, ຈຶ່ງໄດ້ລົງນາມເຊັນບົດບັນທຶກມອບ-ຮັບຢ່າງເປັນທາງການ ຕາງໜ້າຝ່າຍເຈົ້າຂອງໂຄງການໂດຍທ່ານ ນາງ ແປງ ສຸກຫຼ້າສີ ຮອງຫົວຫນ້າຫ້ອງການສາທາລະນະສຸກເມືອງ, ຝ່າຍບໍລິສັດຜູ້ຮັບເໝົາກໍ່ສ້າງໂດຍທ່ານ ສອນນາລີນ ມິດຕະພອນ ກໍ່ສ້າງ ແລະ ສ້ອມແປງເຄຫາສະຖານຈໍາກັດ ແລະ ຝ່າຍອົງການປົກຄອງບ້ານ ໂດຍແມ່ນທ່ານ ບຸນພອນ ເລຂາພັກບ້ານ, ນາຍບ້ານແສນອິນຫຼວງ ໂດຍມີທ່ານ ຄຳຫຼ້າດວງມາໄລ ກໍາມະການໃນຄະນະປະຈໍາພັກເມືອງ, ຮອງເລຂາ, ຮອງເຈົ້າເມືອງ, ຜູ້ຊີ້ນຳວຽກງານຂົງເຂດວັດທະນະທຳສັງຄົມ, ເລຂາຄະນະພັກຮາກຖານກຸ່ມ, ຄະນະຮັບຜິດຊອບຂັ້ນເມືອງ ແລະ ຊາວບ້ານແສນອິນຫຼວງ ເຂົ້າຮ່ວມເປັນສັກຂີພະຍານ

ໃນຕອນທ້າຍຂອງພິທີ ທ່ານຄຳຫຼ້າ ດວງມະໄລ ກຳມະການໃນຄະນະປະຈຳພັກເມືອງ, ຮອງເລຂາ, ຮອງເຈົ້າເມືອງ ຍັງໄດ້ມີຄຳເຫັນໂອ້ລົມຕໍ່ພິທີດັ່ງກ່າວ. ເຊິ່ງກ່ອນອື່ນທ່ານ ໄດ້ສະແດງ ຄວາມຍ້ອງຍໍຊົມເຊີຍມາຍັງບໍລິສັດຜູ້ຮັບເໝົາກໍ່ສ້າງ ແລະ ເຈົ້າຂອງໂຄງການ ກໍຄືຄະນະຮັບຜິດຊອບຂັ້ນເມືອງ, ຕະຫຼອດຮອດພໍ່ແມ່ປະຊາຊົນຊາວບ້ານແສນອິນຫຼວງ ທີ່ໄດ້ມີຄວາມເອກະພາບກັນໃນການຈັດຕັ້ງປະຕິບັດໂຄງການ ເຮັດໃຫ້ໂຄງການດັ່ງກ່າວສຳເລັດຕາມສັນຍາ, ສາມາດຕອບສະໜອງນໍ້າໃຫ້ຊາວບ້ານໄດ້ຊົມໃຊ້ນໍ້າຢ່າງພຽງພໍ ແລະ ທົ່ວເຖິງ ແລະ ຖືວ່າເປັນການປະກອບສ່ວນເຂົ້າໃນການປັບປຸງຊີວິດການເປັນຢູ່ຂອງພໍ່ແມ່ປະຊາຊົນໃຫ້ດີຂຶ້ນກວ່າເກົ່າ. ພ້ອມດຽວກັນນັ້ນ ທ່ານຍັງໄດ້ເນັ້ນໜັກ ໃຫ້ພໍ່ແມ່ປະຊາຊົນຈົ່ງປົກປັກຮັກສາ ແລະ ນໍາໃຊ້ນ້ຳລິນ-ນ້ຳສະອາດ ໃຫ້ໄດ້ນຳໃຊ້ຍາວນານ, ພ້ອມກັນເປັນເຈົ້າການ ໃນການປົກປັກຮັກສາ, ແຕ່ງຕັ້ງ ແລະ ແບ່ງຄວາມຮັບຜິດຊອບໃຫ້ຊາວບ້ານໃນການຕິດຕາມ, ຄຸ້ມຄອງລາຍຮັບຈາກການຊົມໃຊ້ນໍ້າຢ່າງມີລະບຽບຫຼັກການ, ຖືກຕ້ອງ, ໂປ່ງໃສ ແລະ ກວດສອບໄດ້, ປົກປັກຮັກສາປ່າໄມ້ເຂດຫົວງານ, ການຮັກສາຄວາມສະອາດບໍລິເວນຫົວກ໊ອກນ້ຳ, ພ້ອມກັນຂຸດຮ່ອງ, ວາງທໍ່ລະບາຍນ້ຳເສດເຫຼືອ ເພື່ອບໍ່ໃຫ້ເກີດມີ ນ້ຳອັ່ງ ແລະ ເປັນບ່ອນເກີດເຊື້ອພະຍາດຕ່າງໆອີກດ້ວຍ.