ວັນທີ 26 ມີນາ 2025 ນີ້, ນາຍ ແລະ ພົນທະຫານ ກອງບັນຊາການທະຫານແຂວງຜົ້ງສາລີ ໄດ້ຮັບຟັງການປາຖະກະຖາເລົ່າມູນເຊື້ອ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ( 22.3.1955 - 22.3.2025 ), ມູນເຊື້ອປະຕິວັດຂອງກໍາລັງປ້ອງກັນຄວາມສະຫງົບປະຊາຊົນ ຄົບຮອບ 64 ປີ ( 5.4.1961 - 5.4.2025 ), ມູນເຊື້ອວັນສ້າງຕັ້ງກໍາລັງປ້ອງກັນຄວາມສະຫງົບແຂວງຜົ້ງສາລີ ຄົບຮອບ 62 ປີ ( 11.5.1963 - 11.5.2025 ), ແລະ ເອກະສານຜົນສໍາເລັດກອງປະຊຸມຄົບຄະນະ ຄັ້ງທີ 3 ຂອງຄະນະກໍາມະການສູນກາງພັກ ກອມມູນິດຈີນ ສະໄໝທີ 20, ໂດຍການເປັນປະທານ ແລະ ປາຖະກະຖາເອກະສານຂອງສະຫາຍ ພັນເອກ ສົມຈັນ ລອດສຸລີ ຄະນະປະຈໍາພັກກອງບັນຊາການທະຫານແຂວງ ຫົວໜ້າຫ້ອງການເມືອງ, ເປັນກຽດເຂົ້າຮ່ວມຂອງສະຫາຍ ພັນໂທ ຢິວຊ່າງ ສຸລິວາງ ຄະນະພັກກອງບັນຊາການທະຫານແຂວງ ຮອງຫົວໜ້າຫ້ອງການ ແລະ ບໍລິຫານ, ພ້ອມດ້ວຍນາຍ ແລະ ພົນທະຫານເຂົ້າຮ່ວມ

ສະຫາຍ ພັນເອກ ສົມຈັນ ລອດສຸລີ ປະທານພິທີ ໄດ້ຍົກໃຫ້ເຫັນຜົນງານ, ການກໍາເນີດ ແລະ ເຕີບຂະຫຍາຍຕົວຂອງພັກປະຊາຊົນປະຕິວັດລາວ, ນັບແຕ່ປີ 1893 ພວກລ່າເມືອງຂຶ້ນຝຣັ່ງໄດ້ເຂົ້າມາຢຶດຄອງລາວເປັນຫົວເມືອງຂື້ນ ແລະ ໄດ້ດໍາເນີນການກົດຂີ່ຂູດຮີດປະຊາຊົນລາວບັນດາເຜົ່າຢ່າງແສນສາຫັດ ແລະ ໂຫດຮ້າຍປ່າເຖື່ອນ, ເພື່ອຕ້ານຢັນ ແລະ ເອົາຊະນະກັບການຮຸກຮານມັນໄດ້ຮຽກຮ້ອງໃຫ້ມີການນໍາພາການຕໍ່ສູ້ທີ່ຖືກຕ້ອງ, ປະທານໂຮ່ຈິມິນ ຈິ່ງໄດ້ນໍາເອົາທິດສະດີປະຕິວັດມາເຜີຍແຜ່ ແລະ ນໍາພາການປະຕິວັດຢູ່ໃນອິນດູຈີນເຮັດການປະຕິວັດ 3 ຊາດອິນດູຈີນໄດ້ມີການເຕີບໃຫຍ່ຂະຫຍາຍຕົວ, ພາຍໃຕ້ການນໍາພາຂອງພັກກອມມູນິດອິນດູຈີນກໍຄືຄະນະພັກແຄ້ວນລາວ, ພັກໄດ້ປຸກລະດົມຂົນຂວາຍມະຫາຊົນຢູ່ເຂດຊົນນະບົດ ແລະ ບໍລິເວນຊົນເຜົ່າ, ຖືຊາວໄຮ່ນາເປັນກໍາລັງພື້ນຖານຂອງການປະຕິວັດ ເຮັດໃຫ້ຂະບວນການຕໍ່ສູ້ລະເບີດຂຶ້ນແຕ່ຕໍ່າຫາສູງໃນທົ່ວປະເທດດ້ວຍບັນດາຮູບການທີ່ເໝາະສົມເປັນສາເຫດພາໃຫ້ມີການຢຶດອຳນາດ 23 ສິງຫາ 1945, ປະກາດເອກະລາດວັນທີ 12 ຕຸລາ 1945, ສ້າງຕັ້ງກອງທັບປະຊາຊົນລາວໃນວັນທີ 20 ມັງກອນ 1949 ແລະ ສ້າງຕັ້ງແນວລາວອິດສະຫຼະຂຶ້ນໃນວັນທີ 13 ສິງຫາ 1950, ຊື່ງໄດ້ກາຍເປັນຄັນທຸງເຕົ້າໂຮມ, ດຶງດູດເອົາທຸກຊັ້ນຄົນເຂົ້າຮ່ວມການປະຕິວັດ ໄດ້ຢ່າງກ້ວາງຂວາງ ແລະ ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ, ມາຮອດວັນທີ 22 ມີນາ 1955 ກອງປະຊຸມໃຫຍ່ສ້າງຕັ້ງພັກປະຊາຊົນປະຕິວັດລາວຈື່ງໄດ້ໄຂຂຶ້ນຢູ່ທີ່ບ້ານນາແມວ, ເມືອງວຽງໄຊ, ແຂວງຫົວພັນໂດຍເອື້ນຊື່ວ່າ: ( ພັກປະຊາຊົນລາວ ) ປະທານ ໄກສອນ ພົມວີຫານ ໄດ້ຖືກເລືອກຕັ້ງເປັນເລຂາຄະນະຊີ້ນໍາສູນກາງ, ພາຍໃຕ້ການນໍາພາ-ຊີ້ນໍາຢ່າງສະຫຼາດສ່ອງໃສຂອງພັກປະຊາຊົນປະຕິວັດລາວ, ກອງທັບ ແລະ ປະຊາຊົນລາວສາມາດຕີເອົາໄຊຊະນະການບຸກໂຈມຕີບຽດຢຶດຂອງສັດຕູທັງໝົດເປັນຕົ້ນແມ່ນບັ້ນຮົບນໍ້າບາກ, ບັ້ນຮົບຜາຖີ່ ( ປີ 1968 ), ບັ້ນຮົບທົ່ງໄຫຫີນສຽງຂວາງ ( ປີ 1970 ), ບັ້ນຮົບລາມເຊິນ 719 ( ປີ1971 ), ພາຍໃຕ້ການປະຕິບັດຄໍາຂັວນ: ( ທຸກສິ່ງທຸກຢ່າງເພື່ອແນວໜ້າ, ທຸກສິ່ງທຸກຢ່າງເພື່ອຕີເອົາຊະນະຈັກກະພັດອາເມລິກາ ແລະ ລູກມື ), ພວກເຮົາໄດ້ທັບມ້າງຍຸດທະສາດ ສົງຄາມພິເສດຂອງຈອນເຊິນ ແລະ ຍຸດທະສາດ ສົງຄາມພິເສດເພີ່ມທະວີຕາມທິດສະດີນິກເຊິນຂອງຈັກກະພັດອາເມລິກາ ໃຫ້ປະລາໄຊຢ່າງໜັກໜ່ວງ, ປີ 1975 ເປັນຕົ້ນມາ ພັກເຮົາໄດ້ເອົາໃຈໃສ່ນໍາພາແກ້ໄຂ ແລະ ຟື້ນຟູເສດຖະກິດ-ສັງຄົມໂດຍສຸມໃສ່ແກ້ໄຂຜົນຮ້າຍຂອງສົງຄາມ, ເຮັດໃຫ້ຊີວິດການເປັນຢູ່ຂອງປະຊາຊົນຄ່ອຍໆກ້າວສູ່ສະພາບປົກກະຕິ, ທັງໄດ້ເອົາໃຈໃສ່ຂະຫຍາຍການສຶກສາ, ລົບລ້າງຄວາມບໍ່ຮູ້ໜັງສື, ປົກປັກຮັກສາ ແລະ ເສີມຂະຫຍາຍວັດທະນະທໍາອັນດີງາມຂອງຊາດ, ຂອງເຜົ່າ, ໄດ້ເພີ່ມທະວີການຊີ້ນໍາ-ນໍາພາຕໍ່ກັບການປັບປຸງລະບອບການເມືອງ ປະຊາທິປະໄຕ ປະຊາຊົນຢູ່ແຕ່ລະຂັ້ນຕາມທິດ 3 ສ້າງ ແລະ ຖືວຽກງານ 3 ສ້າງ ແມ່ນຍຸດທະສາດສໍາຄັນສະເພາະໜ້າ ແລະ ຍາວນານ, ກໍາລັງປ້ອງກັນຄວາມສະຫງົບປະຊາຊົນ ແມ່ນກໍາລັງປະກອບອາວຸດປະຕິວັດອັນແຫຼມຄົມໂດຍແມ່ນພັກປະຊາຊົນປະຕິວັດລາວເປັນຜູ້ສ້າງຕັ້ງ, ນໍາພາເດັດຂາດ, ໂດຍກົງຮອບດ້ານ, ເປັນກໍາລັງທີ່ມາຈາກປະຊາຊົນ, ໂດຍປະຊາຊົນ ແລະ ເພື່ອຮັບໃຊ້ສິດຜົນປະໂຫຍດຂອງປະຊາຊົນລາວບັນດາເຜົ່າ, ກໍາລັງປ້ອງກັນຄວາມສະງົບປະຊາຊົນໄດ້ກໍາເນີດເຕີບໃຫຍ່ຂະຫຍາຍຕົວໃນຂະບວນການຕໍ່ສູ້ປົດປ່ອຍຊາດຕ້ານຈັກກະພັດຜູ້ຮຸກຮານ, ປົກປັກຮັກສາ ແລະ ສ້າງສາພັດທະນາປະເທດຊາດ, ເວລາໃດກໍ່ມີມູນເຊື້ອການຕໍ່ສູ້ອັນອົງອາດກ້າຫານ, ມີນໍ້າໃຈເສຍສະຫຼະອັນເດັດດ່ຽວບໍ່ຍອມຈໍານົນ, ມີຄວາມສັດຊື່ບໍລິສຸດ ແລະ ມີຄວາມສາມັກຄີເປັນປຶກແຜນແໜ້ນໜາ, ກໍາລັງປ້ອງກັນຄວາມສະຫງົບແຂວງຜົ້ງສາລີໄດ້ກໍາເນີດ ແລະ ເຕີບໃຫຍ່ຂະຫຍາຍຕົວພາຍໃຕ້ການຊີ້ນໍາ-ນໍາພາໂດຍກົງ, ເດັດຂາດ ແລະ ຮອບດ້ານຂອງພັກ, ກໍາລັງປ້ອງກັນຄວາມສະຫງົບແຂວງຜົ້ງສາລີໄດ້ຮັບການສ້າງຕັ້ງຂຶ້ນໃນວັນທີ 11 ພຶດສະພາ 1963 ເວລານັ້ນແມ່ນເອີ້ນວ່າ: ກໍາລັງສັນຕິລາດ, ຜົນງານການເຄື່ອນໄຫວວຽກງານວິຊາສະເພາະປ້ອງກັນຄວາມສະຫງົບແຂວງໃນ 1 ປີ ຜ່ານມາ ໂດຍປະຕິບັດຕາມ 04 ຄາດໝາຍ 04 ແຜນງານ 41 ໂຄງການ ຂອງກະຊວງວາງອອກ ແລະ 2 ແຜນງານ 9 ໂຄງການຂອງກອງບັນຊາການວາງອອກໃຫ້ປະກົດຜົນເປັນຈິງເທື່ອລະກ້າວ, ຜົນສໍາເລັດກອງປະຊຸມຄົບຄະນະ ຄັ້ງທີ 3 ຂອງຄະນະກໍາມະການສູນກາງພັກ ກອມມູນິດຈີນ ສະໄໝທີ 20 ປະກອບມີ 9 ຫຼັກການປະຕິຮູບດັ່ງນີ້: ຄວາມໝາຍອັນໃຫຍ່ຫຼວງ ແລະ ຄວາມຮຽກຮ້ອງໂດຍລວມຂອງການລົງເລິກການປະຕິຮູບຢ່າງຮອບດ້ານຕື່ມອີກເພື່ອຊຸກຍູ້ຄວາມທັນສະໄໝແບບຈີນ, ສ້າງໂຄງປະກອບເສດຖະກິດຕະຫຼາດສັງຄົມນີຍົມໃນລະດັບສູງ, ປັບປຸງໂຄງປະກອບ ແລະ ກົນໄກພັດທະນາຕົວເມືອງກັບຊົນນະບົດແບບເຊື່ອມໂຍງເຂົ້າກັນ, ປັບປຸງໂຄງປະກອບ ແລະ ກົນໄກເປີດປະຕູສູ່ພາຍນອກໃນລະດັບສູງ, ປັບປຸງລະບົບລະບອບປະຊາທິປະໄຕປະຊາຊົນໃນທົ່ວຂະບວນການ, ປັບປຸງລະບົບການປົກຄອງປະເທດຕາມກົດໝາຍສັງຄົມນິຍົມທີ່ມີສີສັນພິເສດຂອງຈີນໃຫ້ສົມບູນ, ປັບປຸງລະບົບລະບຽບການຮັບປະກັນ ແລະ ປັບປຸງຊີວິດການເປັນຢູ່ຂອງປະຊາຊົນນັ້ນໃຫ້ຄົບຖ້ວນ, ຊຸກຍູ້ການຫັນເປັນທັນສະໄໝຂອງລະບົບ ແລະ ຄວາມສາມາດດ້ານຄວາມໝັ້ນຄົງຂອງຊາດ, ຍົກສູງລະດັບນໍາພາຂອງພັກຕໍ່ການລົງເລິກການປະຕິຮູບຢ່າງຮອບດ້ານຕື່ມອີກເພື່ອຊຸກຍູ້ຄວາມທັນສະໄໝແບບຈີນ.