ບ້ານນໍ້າຮອຍເມືອງບຸນເໜືອ ແຂວງຜົ້ງສາລີ ປະກາດອບົວ ແລະ ບ້ານວັດທະນະທຳ.
27 Mar 2025 | ນັກຂ່າວ ຖວທ ເມືອງບຸນເໜືອ |
ຕອນເຊົ້າວັນທີ 27 ມີນາ 2025 ທີ່ສະໂມສອນບ້ານນໍ້າຮອຍ ໄດ້ຈັດພິທີມອບ-ຮັບ ການກໍ່ສ້າງຄອບຄົວ ແລະ ບ້ານວັດທະນະທຳ ຂອງບ້ານນໍ້າຮອຍ ເມືອງ ບຸນເໜືອ ແຂວງ ຜົ້ງສາລີ.ໂດຍເປັນປະທານຂອງທ່ານ
ຄຳໄຊ ວົງສັກ ກຳມະການພັກເມືອງ ຮອງເຈົ້າເມືອງ ຜູ້ຊີ້ນຳຂົງເຂດວັດທະນະທຳ-ສັງຄົມ. ມີທ່ານ ນາງ ພວງມະລີ ວົງແສງ ຮອງຫົວ
ໜ້າຫ້ອງການຖະແຫຼງຂ່າວ,ວັດທະນະທຳ ແລະ ທ່ອງທ່ຽວເມືອງ, ທ່ານ ສົມໄຊ ຊຸຍຕັ້ງເລຂານາຍບ້ານບ້ານນໍ້າຮອຍ, ມີຄະນະພັກຮາກຖານກຸ່ມ ຕະຫຼອດຮອດປະຊາຊົນບ້ານນໍ້າຮອຍເຂົ້າຮ່ວມ ຢ່າງຫຼວງຫຼາຍ.
ທ່ານ ນາງ ພວງມະລີ ວົງແສງ ຮອງຫົວໜ້າຫ້ອງການຖະແຫຼງຂ່າວ,ວັດທະນະທຳ ແລະ ທ່ອງທ່ຽວເມືອງ ຂຶ້ນຜ່ານບົດສະຫຼຸບຜົນການປະເມີນການສ້າງຄອບຄົວ ແລະ ບ້ານວັດທະນະທຳ.ບ້ານ ນໍ້າຮອຍ ເປັນບ້ານໜຶ່ງທີ່ຂຶ້ນກັບກຸ່ມບ້ານຢໍ້ ຂອງເມືອງ ບຸນເໜືອ ຫ່າງຈາກເທດສະບານເມືອງປະມານ 30 ກິໂລແມັດ ທິດຕາເວັນອອກຕິດກັບບ້ານ ຜາປຸນເກົ່າ,ບ້ານບໍ່ມາງ,ທິດໃຕ້ຕິດກັບບ້ານສົມບຸນ,ທິດເໜືອ ແລະ ທິດຕາເວັນຕົກຕິດກັບຊາຍແດນ ສປຈີນ. ປະກອບມີ 1 ເຜົ່າຄື: ເຜົ່າອາຄາ ເຊື່ອຖືບັນພະບຸລຸດ,ອາຊີບຕົ້ນຕໍແມ່ນປູກອ້ອຍ,ຢາງພາລາ, ປູກພຶດແບບປະສົມປະສານເປັນສີນຄ້າ ແລະ ລ້ຽງສັດນ້ອຍ,ສັດໃຫຍ່. ປະຈຸບັນມີພົນລະເມືອງ 472 ຄົນ,ຍິງ 232 ຄົນ, ມີ 80 ຫຼັງຄາ ມີ 103 ຄອບຄົວ ແລະ ສາມາດສ້າງຄອບຄົວວັດທະນະທຳໄດ້ 77 ຄອບຄົວ ເທົ່າກັບ 96% ບ້ານມີເນື້ອທີ່ດິນ 800 ເຮັກຕາ,ລວມລາຍຮັບທັງໝົດ 8.930.000.000 ກີບ ສະ
ເລ່ຍໃສ່ຫົວຄົນ ໄດ້ 18.919.000 ກີບ ຕໍ່ຄົນຕໍ່ປີ.ຈາກນັ້ນ, ທ່ານສີສົມພອນ ໄຊຍະແສງ ຮອງຫົວໜ້າໜ່ວຍງານວັດທະນະທຳ ໄດ້ຜ່ານຂໍ້ຕົກລົງສະບັບເລກທີ 31/ມບລົງວັນທີ 31 ມັງກອນ 2025 ວ່າດ້ວຍ ການຮັບຮອງເອົາ ໃບຢັ້ງຢືນຄອບຄົວວັດທະນະທຳ ບ້ານນໍ້າຮອຍ, ຂໍ້ຕົກລົງສະບັບເລກທີ 125/ຂຜລ ລົງວັນທີ 20 ກຸມພາ 2025 ວ່າດ້ວຍການຮັບຮອງເອົາບ້ານນໍ້າຮອຍ ເປັນບ້ານວັດທະນະທຳ ໃຫ້ກຽດຂຶ້ນມອບຂອງທ່ານ ຄຳໄຊ ວົງສັກ ຮອງເຈົ້າເມືອງ ຜູ້ຊີ້ນຳຂົງເຂດວັດທະນະທຳ-ສັງຄົມເປັນກຽດຂຶ້ນຮັບຂອງທ່ານເລຂານາຍບ້ານ-ບ້ານ ນໍ້າຮອຍ. ຈາກນັ້ນປະທານຍັງໄດ້ລັ່ນຄ້ອງ 9 ບາດ ພ້ອມທັງເປີດປ້າຍ ບ້ານ ນໍ້າຮອຍ ບ້ານວັດທະນະທຳ.
ຕອນທ້າຍໄດ້ຮັບຟັງການໂອ້ລົມຈາກທ່ານ ຄຳໄຊ ວົງສັກ ຮອງເຈົ້າເມືອງ ຜູ້ຊີ້ນຳຂົງເຂດວັດທະນະທຳ-ສັງຄົມ ຂັ້ນເມືອງ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນການກໍ່ສ້າງຄອບຄົວ ແລະ ບ້ານວັດທະນະທຳ ຂອງບ້ານນໍ້າຮອຍທີ່ປະຊາຊົນພາຍໃນບ້ານພ້ອມກັນຍາດມາໄດ້ໃນໄລະຍະທີ່ຜ່ານມາ ແລະ ທ່ານຍັງໄດຮຽກຮ້ອງຕື່ມບາງບັນຫາໃຫ້ປະຊາຊົນພາຍໃນບ້ານສືບຕໍ່ເຕົ້າໂຮມຄວາມສາມັກຄີຊ່ວຍເຫຼືອເຊີ່ງກັນ ແລະ ກັນ ສືບຕໍ່ຮັກສາມູນເຊື້ອຄອບຄົວ ແລະ ບ້ານວັດທະນະທຳ ໃຫ້ຢືນຍົງ.
Share:
