ກອງປະຊຸມທົບທວນວຽກງານແຜນງານໜື່ງດຽວທີ່ມີສ່ວນຮ່ວມຫຼາຍຂະແໜງການ ປະຈໍາໄຕມາດ 1 ແລະ ວາງທິດທາງແຜນການ ປະຈໍາໄຕມາດ 2 ປີ 2025 ຂອງເມືອງບຸນໃຕ້, ແຂວງຜົ້ງສາລີ.
28 Mar 2025 | ນັກຂ່າວຫ້ອງການ ຖວທ ເມືອງບຸນໃຕ້ |
ອນເຊົ້າຂອງວັນທີ 28 ເດືອນ ມີນາ ປີ2025 ນີ້ ຫ້ອງການແຜນການ ແລະ ການລົງທືນໄດ້ຮ່ວມກັບຂະແໜງການທີ່ກ່ຽວຂ້ອງເປີດກອງປະຊຸມທົບທວນວຽກງານແຜນງານໜື່ງດຽວທີ່ມີສ່ວນຮ່ວມຫຼາຍຂະແໜງການ ປະຈໍາໄຕມາດ 1 ແລະ ວາງທິດທາງແຜນການ ປະຈໍາໄຕມາດ 2 ປີ 2025 ຂອງເມືອງບຸນໃຕ້, ແຂວງຜົ້ງສາລີ ຂື້ນຢ່າງເປັນທາງ
ການ ນະທີຫ້ອງປະຊຸມຊັ້ນ 2 ຂອງຫ້ອງວ່າການເມືອງຫຼັງໃໝ່.
ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ຄໍາຫຼ້າ ດວງມາໄລ ຮອງເຈົ້າເມືອງ ຜູ້ຊີ້ນໍາຂົງເຂດວັດທະນະທໍາ-ສັງຄົມ, ມີທ່ານ ນາງ ຄໍາປຽງ ທອງພຸດ ຫົວໜ້າຫ້ອງການແຜນການ ແລະ ການລົງທຶນ, ມີບັນດາທ່ານຫົວໜ້າຫ້ອງການ ວິຊາການຈາກຂະແໜງການທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມທ່ານ ນາງ ຄໍາປຽງ ທອງພຸດ ຫົວໜ້າຫ້ອງການ ແຜນການແລະການລົງທຶນ ໄດ້ສະເໜີຈຸດປະສົງຂອງກອງປະຊຸມ ພ້ອມດຽວກັນທ່ານ ຄໍາຫຼ້າ ດວງມາໄລ ຮອງເຈົ້າເມືອງຜູ້ຊີ້ນໍາຂົງເຂດວັດທະນະທຳ-ສັງຄົມ, ໄດ້ມີຄໍາເຫັນ ແລະ ຊີ້ນໍາໃນການດໍາເນີນກອງປະຊຸມເພື່ອແນໃສ່ເຮັດໃຫ້ກອງປະຊຸມມີຄວາມໝາຍຄວາມສໍາຄັນເລີກເຊິ່ງ, ເພື່ອຈະໄດ້ພ້ອມກັນຊອກຫາວິທາງແກ້ໄຂບັນຫາທີ່ຕັ້ງຂື້ນ ແລະ ຈະໄດ້ພ້ອມກັນວາງແຜນທິດທາງໃນຕໍ່ໜ້າເຮັດໃຫ້ກິດຈະກໍາຂອງໂຄງການແຜນງານໜື່ງດຽວທີ່ສ່ວນຮ່ວມຫຼາຍຂະແໜງການບັນລຸຕາມແຜນທີ່ໄດ້ວາງໄວ້ ເຊິງທ່ານຍັງໄດ້ຮຽກຮ້ອງໃຫ້ຜູ້ແທນກອງປະຊຸມຈົ່ງເອົາໃຈໃສ່ສຸມທຸກສະຕິປັນຍາເຂົ້າໃນການຄົ້ນຄວ້າພິຈາລະນາຮັບຟັງບົດລາຍງານຂອງຂະແໜງການເພື່ອຈະໄດ້ກໍາໄດ້ເນື້ອໃນ ແລະ ຊອກຫາວິທີທາງແກ້ໄຂບັນຫາໃຫ້ຖືກຕ້ອງສອດຄ່ອງ ຈາກນັ້ນກໍໄດ້ກ່າວເປີດກອງປະຊຸມຢ່າງເປັນທາງການ.
ທ່ານ ທອງສຸກ ຈາໄມ່ ຫົວໜ້າໜ່ວຍງານແຜນການ, ສົ່ງເສີມການລົງທຶນ ແລະ ຮ່ວມມືສາກົນ ໄດ້ຜ່ານບົດລາຍງານຄວາມຄືບໜ້າການຈັດຕັ້ງປະຕິບັດແຜນງານປະຈໍາໄຕມາດ 1 ຜ່ານມາ ແລະ ວາງແຜນໄຕມາດ 2 ປີ 2025, ເຊິ່ງທ່ານໄດ້ກ່າວວ່າ; ການຈັດຕັ້ງປະຕິບັດວຽກງານແຜນງານໜຶ່ງດຽວຫຼາຍຂະແໜງການມີສ່ວນຮ່ວມ ໃນໄລຍະໄຕມາດ IV ທີ່ຜ່ານມາ ໄປຕາມທ່າອ່ຽງໄດ້ຄາດຄະເນໄວ້ນັ້ນ ແມ່ນສືບຕໍ່ພົບກັບຄວາມຫຍຸ້ງຍາກດ້ານເສດຖະກິດ-ການເງິນ ເປັນຕົ້ນແມ່ນປະເສີນກັບພາວະເງິນເຟີ້ ແລະ ລາ
ຄາສິ້ນຄ້າທີ່ເພີ່ມຂື້ນໃນແຕ່ລະວັນ ອັນໄດ້ສ້າງຂໍ້ຫຍຸ້ງຍາກ ຕໍ່ການຈັດຕັ້ງປະຕິບັດວຽກງານດັ່ງກ່າວ; ຢ່າງໃດກໍ່ຕາມທຸກຂະແໜງການທີ່ມີຄວາມຮັບຜິດຊອບລ້ວນແລ້ວ
ແຕ່ໄດ້ພະຍາຍາມຈັດຕັ້ງປະຕິບັດ ຢ່າງເປັນປົກກະຕິ ແລະ ຕໍ່ເນື່ອງ ດ້ວຍການເຊື່ອມສານເອົາວຽກງານນີ້ເຂົ້າໃນການຈັດຕັ້ງປະຕິບັດແຜນພັດທະນາ ຂອງແຕ່ລະຂະແໜງຕາມພາລະບົດບາດເຮັດໃຫ້ການຈັດຕັ້ງປະຕິບັດແຜນການທີ່ໄດ້ກຳນົດໄວ້ມີຄວາມຄືບໜ້າຫຼາຍດ້ານໃນຂອບເຂດຂອງແຜນງານເພື່ອການພັດທະນາວຽກງານໂພຊະນາການ ໃນເຂດຊົນນະບົດ ທີ່ເປັນວຽກລະອຽດອ່ອນ ແລະ ເປັນວຽກສະເພາະ ເຊິ່ງໄດ້ສຸມໃສ່ປະສານງານໃນແຜນງານດຽວ (4 ດຽວ) ໂດຍມີສ່ວນຮ່ວມຈາກຫຼາຍຂະແໜງການເຊັ່ນ: ບູລິມະສິດດຽວກັນ,ຈຸດສູມດຽວກັນ, ເປົ້າໜາຍໜື່ງດຽວກັນ ແລະ ໄລຍະເວລາອັນດຽວກັນ, ນອນຢູ່ໃນ 4 ຂົງເຂດຄື: (1) ສຸມໃສ່ສ້າງພື້ນຖານໂຄງລ່າງ ທີ່ຈຳເປັນສຳ
ລັບວຽກງານໂພຊະນາການ ແບບທາງກົງ ແລະ ທາງອ້ອມ ຢູ່ໃນຊຸມຊົນ ແລະ ຄົວເຮືອນທີ່ນອນຢູ່ໃນພື້ນທີ່ ຂອງໂຄງການ, (2) ນຳໃຊ້ແຜນປະຕິບັດງານ, ຍຸດທະສາດການສື່ສານ ເພື່ອປ່ຽນແປງພຶດຕິກຳ ຂອງຊຸມຊົນ ຫຼື (SBCC) ເພື່ອໃຫ້ເກີດການສົ່ງຕໍ່ ແລະ ຍືນຍົງ, (3) ເພີ່ມປະສິດທິພາບໃນການນຳໃຊ້ຮູບແບບໃຫ້ເໝາະສົມແຕ່ລະພື້ນທີ່ ເພື່ອໃຫ້ເກີດການພັດທະນາທີ່ດີກວ່າ ເຊັ່ນ: ສ້າງຕັ້ງກຸ່ມສື່ສານ ແລະ ປະສານງານພາຍໃນ, (4) ສໍາຫຼວດຄວາມເປັນໄປໄດ້ໃນການພັດທະນາວຽກງານໂພຊະນາການ ແລະ ສ້າງກອບໜ້າວຽກເພື່ອຕິດຕາມ ແລະ ການປະເມີນຜົນເປັນແຕ່ລະໄລຍະ; ສຳລັບແຜນການ ຂອງທະນາຄານໂລກ ແລະ ສປປ ລາວ ແຜນງານໜຶ່ງດຽວທີ່ມີສ່ວນຮ່ວມຫຼາຍຂະແໜງການ ແມ່ນການມີສ່ວນຮ່ວມຈາກ: ຫ້ອງການ ສາທາລະນະສຸກ, ສຶກສາທິການ ແລະ ກິລາ, ກະສິກຳ ແລະ ປ່າໄມ້, ຫ້ອງການ ໂຍທາທິການ ແລະ ຂົນສົ່ງ ທີ່ຈັດ
ຕັ້ງປະຕິບັດ ຕາມສາຍວິຊາສະເພາະ ແລະ ມີຫ້ອງການ ແຜນການ ແລະ ການລົງທຶນ ເປັນໃຈກາງໃນການປະສານງານ ກັບທຸກພາກສ່ວນພ້ອມທັງຕິດຕາມ ແລະ ລາຍງານຄວາມຄືບໜ້າການຈັດຕັ້ງປະຕິບັດໃຫ້ຂັ້ນເທິງຢ່າງເປັນປົກກະຕິ.
ຕອນທ້າຍຂອງກອງປະຊຸມທ່ານ ຄໍາຫຼ້າດວງມາໄລ ຮອງເຈົ້າເມືອງ ຜູ້ຊີ້ນໍາຂົງເຂດວັດທະນະທໍາ- ສັງຄົມ ໄດ້ມີທັດສະນະໂອ້ລົມຕໍ່ກອງປະຊຸມ ເຊິ່ງທ່ານໄດ້ສະແດງຄວາມຊົມເຊີຍມາຍັງຄະນະຮັບຜິດຊອບການຈັດຕັ້ງປະຕິບັດກິດຈະກໍາຂອງໂຄງການແຜນງານໜື່ງດຽວທີ່ມີສ່ວນຮ່ວມຂອງຫຼາຍຂະແໜງການ, ເຊິງສະແດງອອກໃນການລາຍງານການຈັດຕັ້ງປະຕິບັດກິດຈະກໍາໃນໄລຍະຜ່ານມາເຫັນວ່າມີຫຼາຍດ້ານທີ່ຜົ້ນເດັ່ນ, ຄຽງຄູ່ກັບຈຸດດີກໍຍັງມີຈຸດອ່ອນ ແລະ ຂໍ້ຄົງຄ້າງ ດັ່ງນັ້ນທ່ານຍັງໄດ້ຮຽກຮ້ອງໃຫ້ຄະນະຮັບສືບຕໍ່ແກ້ໄຂຈຸດອ່ອນ ແລະ ຂໍ້ຄົງຄ້າງບາງດ້ານເພື່ອເຮັດໂຄງການດໍາເນີນຕາມແຜນ ແລະ ບັນລຸຕາມແຜນ, ພ້ອມທາງວາງແຜນການໃນຕໍ່ໜ້າ ແລະ ສືບຕໍ່ປະສານງານລະຫວ່າງຂະແໜງການເພື່ອລົງຕິດຕາມຊຸກຍູ້ບັນດາກິດຈະກໍາໄປພ້ອມກັນເພື່ອປະຍັດເວລາໃຫ້ແກ່ພໍ່ແມ່ປະຊາຊົນບ້ານເປົ້າໝາຍທີ່ນອນຢູ່ໃນໂຄງການແຜນງານໜື່ງດຽວທີ່ມີສ່ວນຮ່ວມຫຼາຍຂະແໜງການ.
Share:
