ພະແນກຍຸຕິທໍາແຂວງຜົ້ງສາລີໂຄສະນາເຜີຍແຜ່ກົດໝາຍໃຫ້ພະນັກງານ-ລັດຖະກອນ ຢູ່ອ້ອມຂ້າງແຂວງ
28 Mar 2025 | ຈັນເພງ ຈອມມະລີ |
ຕອນເຊົ້າຂອງວັນທີ 28 ມີນາ 2025 ຢູ່ທີ່ຫ້ອງປະຊຸມສູນພັດທະນາຄູ ພະແນກຍຸຕິທໍາແຂວງ
ໄດ້ຈັດພິທີໂຄສະນາເຜີຍແຜ່ກົດໝາຍໃຫ້ພະນັກງານ-ລັດຖະກອນ ອ້ອມຂ້າງແຂວງຂຶ້ນ ໂດຍພາຍໃຕ້ການເປັນປະທານຂອງ ທ່ານ ຈັນສະໜອນ ຄຸນນະເລີດ ຮອງຫົວໜ້າພະແນກຍຸຕິທໍາແຂວງ, ມີພະນັກງານ-ລັດຖະກອນອ້ອມຂ້າງແຂວງເຂົ້າຮ່ວມ.
ໃນພິທີຜູ້ເຂົ້າຮ່ວມໄດ້ຮັບຟັງກົດໝາຍຕ່າງໆໂດຍມີຜູ້ຮັບຜິດຊອບແຕ່ລະກົດໝາຍຜັດປ່ຽນກັນຂຶ້ນເຜີຍແຜ່ການໂຄສະນາເຜີຍແຜ່ກົດໝາຍໃນຄັ້ງນີ້ ແມ່ນໄດ້ຄັດຈ້ອນເອົາບາງມາດຕາຂອງກົດໝາຍ ແລະ ນິຕິກໍາ ຂອງຂະແໜງຍຸຕິທໍາຈໍານວນໜຶ່ງ ເປັນຕົ້ນແມ່ນ: ດຳລັດ ວ່າດ້ວຍການໂຄສະນາເຜີຍແຜ່ນິຕິກຳ, ກົດໝາຍ ວ່າດ້ວຍການສ້າງນິຕິກຳ, ກົດໝາຍ ວ່າດ້ວຍທະບຽນສານ, ກົດໝາຍ ວ່າດ້ວຍການຈັດຕັ້ງປະຕິບັດຄໍາຕັດສິນຂອງສານ, ດໍາລັດ ວ່າດ້ວຍການຊ່ວຍເຫຼືອທາງດ້ານກົດໝາຍ, ກົດໝາຍ ວ່າດ້ວຍການການແກ້ໄຂຂໍ້ຄັດແຍ່ງທາງດ້ານເສດຖະກິດ. ຈາກນັ້ນ ກໍໄດ້ສົນທະນາແລກປ່ຽນກ່ຽວກັບກົດໝາຍທີ່ເຜີຍແຜ່ຢ່າງກົງໄປກົງມາ ແລະ ເຕັມໄປດ້ວຍບັນຍາກາດມ່ວນຊື່ນ.
ຕອນທ້າຍ ທ່ານ ຈັນສະໝອນ ຄຸນນະເລີດ ຮອງຫົວໜ້າພະແນກຍຸຕິທໍາແຂວງ ໄດ້ມີຄຳຄິດຄຳເຫັນ ກ່ອນອື່ນທ່ານກໍໄດ້ຍ້ອງຍໍຊົມເຊີຍຕໍ່ຜູ້ເຂົ້າຮ່ວມຮັບຟັງການໂຄສະນາເຜີຍແຜ່ກົດໝາຍໃນຄັ້ງນີ້ ພ້ອມທັງເນັ້ນໜັ້ກໃຫ້ນໍາເອົາບັນດາເນື້ອໃນຈິດໃຈຂອງກົດໝາຍດັ່ງກ່າວນັ້ນ ໄປຈັດຕັ້ງປະຕິບັດໝູນໃຊ້ວຽກງານຕົວຈິງໃຫ້ມີຄວາມຖືກຕ້ອງ ແລະ ສອດຄ່ອງ ຕາມທີ່ກົດໝາຍກໍານົດໄວ້ຢ່າງເຂັ້ມງວດ.
Share:
