ປກສ ແຂວງຜົ້ງສາລີ ປາຖະກະຖາວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 64 ປີ ແລະ ວັນສ້າງຕັ້ງກໍາລັງປ້ອງກັນຄວາມສະຫງົບ ປກສ ແຂວງຜົ້ງສາລີ ຄົບຮອບ 62 ປີ.
31 Mar 2025 | ນັກຂ່າວ ປກສ ແຂວງ |
ໃນວັນທີ 31 ມີນາ 2025
ຢູ່ທີ່ສະໂມສອນ ກອງບັນຊາການ ປກສ ແຂວງຜົ້ງສາລີ ໄດ້ຈັດພິທີ ປາຖະກະຖາເລົ່າມູນເຊື້ອວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 64 ປີ ( 5 ເມສາ 1961 – 5 ເມສາ 2025 ) ແລະ ວັນສ້າງຕັ້ງກໍາລັງປ້ອງກັນຄວາມສະຫງົບ ປກສ ແຂວງຜົ້ງສາລີ ຄົບຮອບ 62 ປີ ( 11 ພຶດສະພາ 1963 – 11 ພຶດສະພາ 2025 ). ໂດຍການເປັນປະທານ ແລະ ປາຖະກະຖາຂອງ ພົຈວ ຄໍາຈັນ ແສງລາວົງ ກໍາມະການພັກແຂວງ, ເລຂາຄະນະພັກ, ຫົວໜ້າກອງບັນຊາການ ປກສ ແຂວງ, ມີບັນດາທ່ານຄະນະພັກ-ຄະນະກອງບັນຊາການ, ອະດີດຄະນະພັກ-ຄະນະບັນຊາກອງບັນຊາການ, ຄະນະຫ້ອງໃນ 7 ຫ້ອງ 1 ກອງພັນ ແຂກຖືກເຊີນ ຕະຫຼອດຮອດພະນັກງານ-ນັກຮົບ ອ້ອມຂ້າງກອງບັນຊາການ ປກສ ແຂວງເຂົ້າຮ່ວມຢ່າງພ້ອມພຽງ.
ໃນພິທີ ພົຈວ ຄໍາຈັນ ແສງລາວົງ ຫົວໜ້າກອງບັນຊາການ ປກສ ແຂວງ ໄດ້ຍົກໃຫ້ເຫັນປະຫວັດແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງກໍາລັງປ້ອງກັນຄວາມສະຫງົບຕະຫຼອດໄລຍະ 64 ປີຜ່ານມາ, ຍົກໃຫ້ເຫັນທາດແທ້ມູນເຊື້ອຂອງກໍາລັງປ້ອງກັນຄວາມສະຫງົບ ແລະ ເສີມຂະຫຍາຍທາດແທ້ມູນເຊື້ອປະຕິວັດ ກໍາລັງປ້ອງກັນຄວາມສະຫງົບ ແມ່ນກໍາລັງປະກອບອາວຸດອັນແຫຼມຄົມ ໂດຍພັກປະຊາຊົນປະຕິວັດລາວເປັນຜູ້ກໍ່ຕັ້ງ, ນໍາພາເດັດຂາດ, ໂດຍກົງຮອບດ້ານ, ເປັນກໍາລັງທີ່ມາຈາກປະຊາຊົນ ໂດຍປະຊາຊົນ ແລະ ຮັບໃຊ້ສິດຜົນປະໂຫຍດຂອງປະຊາຊົນລາວບັນດາເຜົ່າ, ກໍາລັງປ້ອງກັນຄວາມສະຫງົບປະຊາຊົນ ໄດ້ກໍາເນີດ ແລະ ເຕີບໃຫຍ່ຂະຫຍາຍຕົວໃນຂະບວນ
ການຕໍ່ສູ້ປົດປ່ອຍຊາດຕ້ານຈັກກະພັດຜູ້ຮຸກຮານ, ປົກປັກຮັກສາ ແລະ ສ້າງສາພັດທະນາປະເທດຊາດ, ເວລາໃດກໍ່ມີມູນເຊື້ອຕໍ່ສູ້ຢ່າງອົງອາດກ້າຫານ, ມີນໍ້າໃຈເສຍສະຫຼະເດັດດ່ຽວບໍ່ຍອມຈໍານົນ ມີຄວາມສັດຊື່ບໍລິສຸດ ແລະ ມີຄວາມສາມັກຄີເປັນປຶກແຜ່ນແໜ້ນໜາ. ຕະຫຼອດໄລຍະ 64 ປີ ແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງກໍາລັງປ້ອງກັນຄວາມສະຫງົບປະຊາຊົນ ພາຍໃຕ້ການນໍາພາຂອງພັກປະຊາຊົນປະຕິວັດລາວ ແມ່ນປະຫວັດສາດແຫ່ງການທົດສອບອັນໃຫຍ່ຫຼວງ ໃນການຕໍ່ສູ້ອັນຍືດເຍື້ອຍາວນານ ເພື່ອຍາດເອົາຄວາມເປັນເອກະລາດແຫ່ງຊາດ, ຕະຫຼອດໄລຍະທາງອັນລະອິດລະອ້ຽວ, ຫຍຸ້ງຍາກລຳບາກທີ່ສຸດນັ້ນ ແຕ່ກໍ່ປຽບລົ້ນໄປດ້ວຍຜົນງານອັນສູງສົ່ງ, ວິລະກໍາອັນພິລະອາດຫານ ແລະ ໄຊຊະນະອັນສະຫງ່າລາສີ ພາຍໃຕ້ການນໍາພາອັນສະຫຼາດສ່ອງໃສຂອງພັກເຮົາ, ກໍາລັງປ້ອງກັນຄວາມສະຫງົບໄດ້ສາມັກຄີເປັນຈິດໜຶ່ງໃຈດຽວ ໃນການປະຕິບັດໜ້າທີ່ການເມືອງ, ທັງປະສານກົມກຽວ ແລະ ຕໍ່ສູ້ຢ່າງມີໄຊ ຕິດພັນກັບການອອກແຮງປັບປຸງ, ກໍ່ສ້າງກໍາລັງຂອງຕົນໃຫ້ນັບມື້ເຂັ້ມແຂງ ແລະ ຂະ
ຫຍາຍຕົວເປັນກ້າວໆ.
ໂອກາດທີ່ມີຄວາມໝາຍຄວາມສໍາຄັນນີ້, ທ່ານຫົວໜ້າກອງບັນຊາການ ປກສ ແຂວງ ຍັງໄດ້ຍົກໃຫ້ເຫັນ ປະຫວັດແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງກໍາລັງປ້ອງກັນຄວາມສະຫງົບ ແຂວງຜົ້ງສາລີ ເຊິ່ງກໍາລັງປ້ອງກັນຄວາມສະຫງົບ ແຂວງຜົ້ງສາລີ ໄດ້ກໍາເນີດ ແລະ ເຕີບໃຫຍ່ຂະຫຍາຍຕົວ ພາຍໃຕ້ການຊີ້ນໍາ - ນໍາພາໂດຍກົງ, ເດັດຂາດ ແລະ ຮອບດ້ານຂອງພັກ, ທັງເປັນກໍາລັງຫຼັກແຫຼ່ງໃນຂະບວນການຕໍ່ສູ້ຂອງປະຊາຊົນໂດຍປະຊາຊົນ, ຮັບໃຊ້ປະເທດຊາດ ແລະ ຮັບໃຊ້ປະຊາຊົນຢ່າງແທ້ຈີງ. ຕະຫຼອດໄລຍະ 62 ປີຜ່ານມາ ກໍາລັງປ້ອງກັນຄວາມສະຫງົບ ແຂວງຜົ້ງສາລີ ໄດ້ສູ້ຮົບທັງປັບປຸງ ແລະ ກໍ່ສ້າງຕົນເອງໃຕ້ການອົບຮົມສັ່ງສອນຈາກຄະນະພັກແຂວງອໍານາດການປົກຄອງ ແລະ ການອູ້ມຊູຊ່ວຍເຫຼືອຂອງປະຊາຊົນບັນດາເຜົ່າຊາວແຂວງຜົ້ງສາລີ. ກໍາລັງປ້ອງກັນຄວາມສະຫງົບປະຊາຊົນແຂວງຜົ້ງສາລີ ໄດ້ສືບທອດ ແລະ ເສີມຂະຫຍາຍມູນເຊື້ອຕໍ່ສູ້ອັນພິລະອາດຫານ ຂອງຊາວແຂວງຜົ້ງສາລີ ໂດຍໄດ້ຍົກສູງຂຶ້ນສູ່ຄຸນນະພາບໃໝ່ໃຫ້ທັນກັບສະພາບການ ແລະ ສ້າງໄດ້ມູນເຊື້ອອັນສະຫງ່າງາມຫຼາຍປະການ, ພາຍໃຕ້ການນໍາພາ ແລະ ສຶກສາອົບຮົມຈາກພັກອໍານາດການປົກຄອງແຂວງ ສະນັ້ນ, ກໍາລັງປ້ອງກັນຄວາມສະຫງົບແຂວງຜົ້ງສາລີຍາມໃດກໍມີຄວາມຈົ່ງຮັກພັກດີ, ບໍລິສຸດພຸດຜ່ອງ, ມີລະບຽບແບບແຜນເຂັ້ມງວດເຊື່ອໝັ້ນຕໍ່ການນໍາພາຂອງພັກອໍານາດການປົກຄອງ, ເຊື່ອໝັ້ນຕໍ່ປະຊາຊົນຊາວແຂວງຜົ້ງສາລີ, ເຊື່ອໝັ້ນກໍາລັງແຮງຂອງຕົນ ແລະ ອຸດົມການນໍາພາຂອງອໍານາດການປົກຄອງແຂວງ. ສິ່ງເຫຼົ່ານັ້ນມັນໄດ້ກາຍເປັນມູນເຊື້ອອັນດີງາມຂອງກໍາລັງປະກອບອາວຸດຂອງປະຊາຊົນແຂວງຜົ້ງສາລີຕະຫຼອດມາ.
Share:
