ພະແນກພະລັງງານ ແລະ ບໍ່ແຮ່ແຂວງຜົ້ງສາລີ ເຜີຍແຜ່ສັນຍາສຳຫຼວດຖ່ານຫີນ ແລະ ແຮ່ທອງຢູ່ເມືອງຜົ້ງສາລີ, ບູນເໜືອ ແລະ ບູນໃຕ້
01 Apr 2025 | ຂ່າວ, ພາບ: ສົມຄິດ (ວິທະຍຸ-ໂທລະພາບແຂວງຜົ້ງສາລີ) |
ໃນຕອນບ່າຍຂອງວັນທີ 1 ເມສາ 2025ນີ້ ທີ່ຫ້ອງປະຊຸມພະແນກພະລັງງານ ແລະ ບໍ່ແຮ່ແຂວງຜົ້ງສາລີ ໄດ້ຈັດກອງປະຊຸມ ເຜີຍແຜ່ເນື້ອໃນສັນຍາ ວ່າດ້ວຍການສຳຫຼວດຖ່ານຫີນ ແລະ ແຮ່ທອງ ຢູ່ເຂດເມືອງຜົ້ງສາລີ, ເມືອງບູນເໜືອ ແລະ ເມືອງບູນໃຕ້ ຂອງບໍລິສັດ ແອລເອັສ ມາຍນີ້ງ ຈຳກັດຜູ້ດຽວ ໂດຍການເປັນປະທານເຂົ້າຮ່ວມຂອງທ່ານ ພອນໄຊ ສີສົມບັດ ຮອງຫົວຫນ້າພະແນກພະລັງງານ ແລະ ບໍ່ແຮ່ແຂວງຜົ້ງສາລີ ແລະ ທ່ານ ຄໍາ ສຸວົງ ຮອງເຈົ້າເມືອງ, ຜູ້ຊີ້ນໍາຂົງເຂດເສດຖະກິດເມືອງບູນເໜືອ
; ເຂົ້າຮ່ວມມີຄະນະພະແນກ, ອົງການປົກຄອງເມືອງຜົ້ງສາລີ, ເມືອງບູນເຫນືອ, ເມືອງບູນໃຕ້, ມີບໍລິສັດ ແອລເອັສ ມາຍນີ້ງ ຈຳກັດຜູ້ດຽວ ແລະ ວິຊາການທີ່ກ່ຽວຂ້ອງເຂົ້າຮ່ວມນຳ.
ເຊີງໂຄງການສຳຫຼວດຖ່ານຫີນ ແລະ ແຮ່ທອງ ຢູ່ເຂດເມືອງຜົ້ງສາລີ, ເມືອງບູນເໜືອ ແລະ ເມືອງບູນໃຕ້ ຂອງບໍລິສັດ ແອລເອັສ ມາຍນີ້ງ ຈຳກັດຜູ້ດຽວ ແມ່ນໄດ້ເຊັນສັນຍາກັບລັດຖະບານລາວສະບັບລົງວັນທີ 4 ກຸມພາ 2025 ໂດຍລວມເວລາການສໍາຫຼວດ36 ເດືອນ ເຊີ່ງບໍລິສັດ ແອລເອັສ ມາຍນີ້ງ ຈຳກັດຜູ້ດຽວ ໄດ້ສ້າງຕັ້ງຂື້ນ ຕາມໃບທະບຽນວິສາຫະກິດ ເລກທີ 0071 /ຈທວ ລົງວັນທີ 30 ມີນາ 2023 ໂດຍຈະສຳຫຼວດ ໃນເນື້ອທຮ 50 ກິໂລຕາແມັດ ໃນເຂດຂອງເມືອງຜົ້ງສາລີ, ເມືອງບູນເຫນືອ ແລະ ເມືອງບູນໃຕ້ ເຊີງເນື້ອໃນສັນຍາທີນຳມາເຜີຍແຜ່ຄັ້ງນີ້ລວມມີ 27 ມາດຕາ ທີກໍານົດນິຍາມ, ການແຕ່ງຕັ້ງ ແລະ ໜ້າທີ່ຮັບຜິດຊອບຂອງບໍລິສັດ, ເປົ້າໝາຍ ແລະ ຈຸດປະສົງຂອງສັນຍາ, ວິທີການດໍາເນີນງານ,ເຂດເນື້ອທີ່ສໍາປະທານ, ການລາຍງານ ແລະ ການຮັກສາຄວາມລັບ, ໄລຍະການສໍາຫຼວດ ແລະ ອື່ນໆ.
ທັງນີ້ກໍ່ເພື່ອເຮັດໃຫ້ອົງການປົກຄອງທ້ອງຖິ່ນ ແລະ ປະຊາຊົນບ່ອນໂຄງການສໍາຫຼວດຢູ່ມີຄວາມເຂົ້າໃຈຕໍ່ໂຄງການ; ເພື່ອເສີມສ້າງການມີສວ່ນຮ່ວມຂອງອົງການປົກຄອງທ້ອງຖິ່ນ ແລະ ປະຊາຊົນບ່ອນໂຄງການສໍາຫຼວດຢູ່ ເຂົ້າໃນໂຄງການຕາມຂອບເຂດສິດ ແລະ ພາລະບົດບາດຂອງຕົນ; ເພື່ອສ້າງຄວາມເຂັ້ມແຂງໃນຂອດການປະສານງານເຊິງກັນ ແລະ ກັນ; ເພື່ອເຮັດໃຫ້ບໍລິສັດດຳເນີນໂຄງການຂອງຕົນມີຄວາມຖືກຕ້ອງ ແລະ ສອດຄ່ອງຕາມກົດຫມາຍ, ລະບຽບການ, ສັນຍາ, ເຕັກນິກ ແລະ ແຜນການທີ່ກຳນົດໄວ້.
Share:
