ໃນວັນທີ 31 ເດືອນມີນາປີ 2025 ທີ່ຜ່ານມານີ້ຢູ່ທີ່ຫ້ອງປະຊຸມກອງບັນຊາການຄຸ້ມຄອງຊາຍແດນເມືອງຫຼ້າໄດ້ຈັດກອງປະຊຸມພົບປະ ປະຈຳໄຕມາດທີ່ 1 ປີ 2025 ລະຫວ່າງກອງບັນຊາການຕຳຫຼວດຄຸ້ມຄອງຊາຍແດນກິ່ງແຂວງ 12 ພັນນາ ແຂວງຢູນນານ ແຫ່ງສປຈີນ ກັບ ກອງບັນຊາການ ປກສ ແຂວງຜົ້ງສາລີ ແຫ່ງສປປລາວ. ຕາງໜ້າຝ່າຍລາວນຳໂດຍ ພັອ ຍີນວັນນະສຸກ ບຸດຕະນະວົງ ຮອງຫົວໜ້າກອງບັນຊາການ ປກສ ແຂວງຜົ້ງສາລີ, ຝ່າຍຈີນນຳໂດຍ ທ່ານ ເຝິ່ງປິ່ງຮອງຫົວໜ້າກອງບັນຊາການຄຸ້ມຄອງຊາຍແດນກິ່ງແຂວງ 12 ພັນນາແຂວງຢູນນານ, ພ້ອມດ້ວຍຄະນະທັງສອງຝ່າຍເຂົ້າຮ່ວມ.
ໃນກອງປະຊຸມ ທັງສອງຝ່າຍໄດ້ພັດປ່ຽນກັນລາຍງານສະພາບການແລກປ່ຽນຂໍ້ມູນຂ່າວສານດ້ານການຮ່ວມມືປະຕິບັດກົດໝາຍໃນວຽກງານຄຸ້ມຄອງຊາຍແດນ, ປະຕິບັດຕາມເນື້ອໃນບົດບັນທຶກກອງປະຊຸມປະຈຳປີ 2024 ຄັ້ງທີ VIII ລະຫວ່າງກອງບັນຊາການປກສ 3 ແຂວງພາກເໜືອ, ປະຕິບັດກົນໄກຮ່ວມມືກັນລາດຕະເວນໃນແຕ່ລະໄຕມາດ ລະຫວ່າງ ກຸ່ມບ້ານຕຳຫຼວດຂອງສອງຝ່າຍ, ສ້າງສາຍປະສານງານດ່ວນ ຮ່ວມມືກັນຕໍ່ສູ້ສະກັດກັ້ນຕ້ານຢາເສບຕິດ ແລະ ສະກັດກັ້ນຕ້ານການລັກລອບເຂົ້າ-ອອກເມືອງ ແລະ ອື່ນໆ. ໃນຕໍ່ໜ້າທັງສອງຝ່າຍເຫັນດີປະສານງານສົມທົບຮ່ວມມືໃນການປ້ອງກັນງານບຸນ ແລະ ກິດຈະກຳຕ່າງໆຂອງພັກ-ຂອງຊາດຂອງສອງປະເທດ, ເພີ່ມທະວີແລກປ່ຽນຂໍ້ມູນຂ່າວສານໃນວຽກງານວິຊາສະເພາະຕຳຫຼວດໂດຍນຳໃຊ້ມາດຕະການທີ່ມີປະສິດທິຜົນ, ສຶກສາອົບຮົມພົນລະເມືອງຂອງຕົນເພື່ອເຮັດໃຫ້ປະຊາຊົນຮັບຮູ້ເຂົ້າໃຈລະບຽບກົດໝາຍຄຸ້ມຄອງຊາຍແດນ, ສ້າງສະພາບແວດລ້ອມຊາຍແດນກົມກຽວປອດໄພ ແລະ ໝັ້ນຄົງ.
