ກອງປະຊຸມໂຄສະນາ ເຜີຍແຜ່ ກົດໝາຍ ຂົງເຂດສະພາແຫ່ງຊາດ ແລະ ສະພາປະຊາຊົນແຂວງ
02 Apr 2025 | ຂ່າວ: ສອນໄຊ ແສງມະນີ |
ໃນວັນທີ 2 ເມສາ 2025 ນີ້, ທີ່ສະໂມສອນເມືອງຂວາ ແຂວງຜົ້ງສາລີ ໄດ້ຈັດ ກອງປະຊຸມໂຄສະນາ ເຜີຍແຜ່ ກົດໝາຍ
ຂົງເຂດສະພາແຫ່ງຊາດ ແລະ ສະພາປະຊາຊົນແຂວງ ໂດຍພາຍໃຕ້ການເປັນປະທານຂອງ ທ່ານ ຄໍາພັນ ຄຸນສົມບັດ ກໍາມະການຄະນະປະຈໍາສະພາປະຊາຊົນແຂວງ, ສະພາປະຊາຊົນແຂວງປະທານຄະນະກໍາມະການ ຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ, ໃຫ້ກຽດເຂົ້າຮ່ວມຂອງທ່ານ ສອນສະໜຸກ ສີສຸລາດ ເລຂາຄະນະບໍລິຫານງານພັກເມືອງເຈົ້າເມືອງໆຂວາ, ມີບັນດາທ່ານກໍາມະການປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ຫົວໜ້າກອງບັນຊາການ ປກຊ-ປກສ, ອໍານວຍການໂຮງຮຽນ, ພະນັກງານ-ລັດຖະກອນ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ, ລັດວິສາຫະກິດ ບັນດາທະນາຄານ ອົງການຈັດຕັ້ງບ້ານພາຍໃນເທດສະບານເມືອງເຂົ້າຮ່ວມ.
ໃນກອງປະຊຸມ ຜູ້ເຂົ້າຮ່ວມໄດ້ຮັບຟັງ ການເຜີຍແຜ່ມະຕິກອງປະຊຸມສະພາແຫ່ງຊາດ ສະບັບເລກທີ 04/ສພຊ, ລົງວັນທີ 20 ມີນາ 2025 ກ່ຽວກັບການຮັບຮອງເອົາລັດຖະທໍາມະນູນ, ເຜີຍແຜ່ ຄໍາແນະນໍາຂອງຄະນະປະຈໍາສະພາປະຊາຊົນແຂວງ ສະບັບເລກທີ 108/ຄປຈຂ, ລົງວັນທີ 25 ກຸມພາ 2025 ກ່ຽວກັບການຕິດຕາມກວດກາ ປະເມີນຜົນການຈັດຕັ້ງປະຕິບັດຂໍ້ຕົກລົງຂອງທ່ານເຈົ້າແຂວງ; ຮັບຟັງການໂຄສະນາເຜີຍແຜ່ ກົດໝາຍວ່າດ້ວຍການແກ້ໄຂຄໍາຮ້ອງທຸກ, ຮັບຟັງການໂຄສະນາເຜີຍແຜ່ກົດໝາຍວ່າດ້ວຍການຕິດຕາມກວດກາຂອງ ສະພາປະຊາຊົນຂັ້ນແຂວງ, ຮັບຟັງການໂຄສະນາເຜີຍແຜ່ ກົດໝາຍວ່າດ້ວຍການເລືອກຕັ້ງສະມາຊິກສະພາປະຊາຊົນຂັ້ນແຂວງ, ຮັບຟັງການໂຄສະນາເຜີຍແຜ່ ກົດໝາຍວ່າດ້ວຍສະພາປະຊາຊົນຂັ້ນແຂວງ. ການເຜີຍແຜ່ກົດໝາຍ ຂອງສະພາປະຊາຊົນແຂວງ ເພື່ອໃຫ້ອົງການ, ຂະແໜງການຂັ້ນເມືອງ ແລະ ຂັ້ນບ້ານ ໂດຍສະເພາະ ແມ່ນອົງການຈັດຕັ້ງລັດ ແລະ ພະນັກງານ-ລັດຖະກອນ ແລະ ພໍ່ແມ່ປະຊາຊົນບັນດາເຜົ່າ ໄດ້ຮັບຮູ້ ແລະ ເຂົ້າໃຈຕໍ່ເນື້ອໃນຂອງກົດໝາຍ ໃນຂອບເຂດຂອງສະພາປະຊາຊົນແຂວງ. ເຊິ່ງໃນໄລຍະຜ່ານມາ ເຫັນໄດ້ວ່າ ກົດໝາຍ ແມ່ນເປັນເຄື່ອງມືສຳຄັນໃຫ້ແກ່ອົງການຈັດຕັ້ງລັດ ໃນການຈັດຕັ້ງປະຕິບັດພາລະບົດ
ບາດ, ສິດ ແລະ ໜ້າທີ່ ຕາມຂອບເຂດຄວາມຮັບຜິດຊອບຂອງຕົນໄດ້ເປັນຢ່າງດີ, ທັງເປັນການສ້າງເງື່ອນໄຂໃຫ້ປະຊາຊົນ ສາມາດເຂົ້າເຖິງຂະບວນການຍຸຕິທໍາຫຼາຍຂຶ້ນ, ສິດ ແລະ ຜົນປະໂຫຍດຂອງ ບຸກຄົນ, ນິຕິບຸກຄົນ ແລະ ການຈັດຕັ້ງ ໄດ້ຮັບການປົກປ້ອງ ຕາມລັດຖະທໍາມະນູນ ແລະ ກົດໝາຍ ອັນເປັນການປະກອບສ່ວນເຮັດໃຫ້ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍໂດຍພື້ນຖານ ແລະ ກໍາໄດ້ທີ່ຕັ້ງພາລະບົດບາດ, ສິດ ແລະ ໜ້າຂອງຄະນະກໍາມະການຂອງສະພາປະຊາຊົນແຂວງ. ຜູ້ແທນທີ່ເຂົ້າຮ່ວມກອງປະຊຸມ ໄດ້ເອົາໃຈໃສ່ຮັບຟັງ ແລະ ປະກອບຄວາມຄິດ, ຄວາມເຫັນເພື່ອເປັນການແລກປ່ຽນຢ່າງກົງໄປກົງມາ ດ້ວຍຄວາມຮັບຜິດຊອບສູງຂອງທຸກພາກສ່ວນ. ທັງນີ້ ເພື່ອແນໃສ່ເຮັດໃຫ້ອົງການຈັດຕັ້ງລັດ ແລະ ພາກສ່ວນຕ່າງໆ ໃນສັງຄົມ ມີຄວາມຮັບຮູ້ເຂົ້າໃຈເປັນເອກະພາບກັນໃນການຈັດຕັ້ງປະຕິບັດກົດໝາຍດັ່ງກ່າວ ໃຫ້ຖືກຕ້ອງ ແລະ ເຂັ້ມງວດ.
Share:
