ໃນວັນທີ 22 ເມສາ 2025 ນີ້, ຄະນະພັກຮາກຖານຫ້ອງການເມືອງ ປກສ ແຂວງ ໄດ້ຈັດພິທີເລື່ອນສະມາຊິກພັກສຳຮອງ ຂຶ້ນເປັນສົມບູນ. ເປັນກຽດເຂົ້າຮ່ວມຂອງ ສະຫາຍ ພັທ ນາງ ວຽງຄຳ ຄຸນສົມເຮືອງ ຄະນະພັກກອງບັນຊາການ ເລຂາຄະນະພັກຮາກຖານຫ້ອງການເມືອງ ປກສ ແຂວງ, ມີຄະນະພັກຮາກຖານ, ເລຂາ-ຮອງເລຂາໜ່ວຍພັກຕະຫຼອດຮອດສະມາຊິກພັກສົມບູນ-ສຳຮອງເຂົ້າຮ່ວມ.

ສະຫາຍ ພັຕ ບຸນເລີດ ບູໄລສິນ ຄະນະພັກຮາກຖານ ຫ້ອງການເມືອງ ປກສ ແຂວງ, ໄດ້ຂຶ້ນຜ່ານມະຕິຕົກລົງຂອງຄະນະພັກກອງບັນຊາການ ເລກທີ 872, 873/ອພ ປກສ.ຜລ, ລົງວັນທີ 17 ມີນາ 2025 ວ່າດ້ວຍການອະນຸມັດເລື່ອນສະມາຊິກພັກສຳຮອງ ຂຶ້ນເປັນສະມາຊິກພັກສົມບູນ, ໃນນີ້ໄດ້ຕົກລົງເລື່ອນ 02 ສະຫາຍ, ຍິງ 01 ສະຫາຍ.ໃນໂອກາດທີ່ມີຄວາມໝາຍ-ຄວາມສຳຄັນດັ່ງກ່າວ, ສະຫາຍ ພັທ ນາງ ວຽງຄໍາ ຄູນສົມເຮືອງ ຄະນະພັກກອງບັນຊາການ ເລຂາຄະນະພັກຮາກຖານ ຫ້ອງການເມືອງ ປກສ ແຂວງ ໄດ້ໃຫ້ກຽດໂອ້ລົມຕໍ່ພິທີ, ເຊິ່ງກ່ອນອື່ນ ສະຫາຍ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ສະມາຊິກພັກສົມບູນໃໝ່ ທີ່ໄດ້ຕັ້ງໜ້າຝຶກຝົນຫຼໍ່ຫຼອມຕົນເອງໃນທຸກດ້ານ ຈົນສາມາດຮັບຮອງເຂົ້າເປັນສະມາຊິກພັກ ປະຊາຊົນ ປະຕິວັດລາວ, ພ້ອມທັງເນັ້ນໜັກໃຫ້ເອົາໃຈໃສ່ເປັນເຈົ້າການປະຕິບັດແນວທາງນະໂຍບາຍຂອງພັກ-ລະບຽບກົດໝາຍຂອງລັດ ແລະ ທຸກມະຕິຄຳສັ່ງທີ່ທາງການຈັດຕັ້ງຂັ້ນເທິງວາງອອກໃນແຕ່ລະໄລຍະ, ຕັ້ງໜ້າຝຶກຝົນຫຼໍ່ຫຼອມຕົນເອງໃນທຸກດ້ານ, ຊອກຮູ້ຮ່ຳຮຽນເອົາບັນດາທິດສະດີມາກ-ເລນິນ ແລະ ແນວຄິດ ໄກສອນ ພົມວິຫານ, ກ້າຕຳນິຕິຊົມຕົນເອງ ແລະ ໝູ່ເພື່ອນ, ເຊີດຊູຄວາມເປັນເຈົ້າການເຕົ້າໂຮມຄວາມສາມັກຄີ, ພ້ອມທັງປະກອບສ່ວນເຂົ້າໃນທຸກຂົງເຂດວຽກງານທີ່ການຈັດຕັ້ງຂັ້ນເທິງມອບໝາຍໃຫ້ມີຜົນສຳເລັດ.