ໜ້າຫຼັກ / ການເຄື່ອນໄຫວ / ເຊັນສັນຍາສຳປະທານທີ່ດີນລັດກໍ່ສ້າງ ແລະ ບໍລິການໂຮງຮຽນມິດຕະພາບລາວ - ຈີນ ໂປເຊຍຢວນຢູ່ແຂວງຜົ້ງສາລີ
ເຊັນສັນຍາສຳປະທານທີ່ດີນລັດກໍ່ສ້າງ ແລະ ບໍລິການໂຮງຮຽນມິດຕະພາບລາວ - ຈີນ ໂປເຊຍຢວນຢູ່ແຂວງຜົ້ງສາລີ
ພິທີເຊັນສັນຍາໂຄງການລົງທືນສຳປະທານທີ່ດິນລັດ ເພື່ອກໍ່ສ້າງ ແລະ ບໍລິການໂຮງຮຽນມິດຕະພາບລາວ - ຈີນ ໂປເຊຍຢວນຢູ່ເຂດບ້ານໂນນສະຫວ່າງ, ເມືອງບູນເໜືອ, ແຂວງຜົ້ງສາລີ ລະຫວ່າງ ອົງການປົກຄອງແຂວງຜົ້ງສາລີ (ຕາງໜ້າໂດຍພະແນກແຜນການ ແລະ ການລງທືນ) ແລະ ບໍລິສັດໂປເຊຍຢວນ ທີປຶກສາດ້ານການສຶກສາທີ່ນະຄອນພູເອີ ຈຳກັດແຂວງຢູນນານ. ແມ່ນໄດ້ຈັດຂື້ນຢ່າງເປັນທາງການ ໃນຕອນບ່າຍຂອງວັນທີ່ 9 ພຶດສະພາ 2025 ທີ່ຫ້ອງປະຊຸມຊັ້ນ 3 ສຳນັກງານປົກຄອງແຂວງຜົ້ງສາລີ. ເຂົ້າຮ່ວມມີທ່ານ ທອງສຸກ, ເປົາສຸລີ ກຳມະການພັກແຂວງ ຫົວໜ້າພະແນກແຜນການ ແລະ ການລົງທຶນແຂວງຜົ້ງສາລີ, ມີທ່ານ ນາງ ຫລູ ຊຸນຈູ້ ປະທານບໍລິສັດໂປເຊຍຢວນ ທີປຶກສາດ້ານການສຶກສາທີ່ນະຄອນພູເອີ ຈຳກັດແຂວງຢູນນານ; ມີຫົວໜ້າພະແນກສຶກສາທິການ ແລະ ກິລາແຂວງຜົ້ງສາລີ, ມີຮອງເຈົ້າເມືອງບູນເໜືອ, ມີພະແນກການ, ອົງການ ແລະ ວິຊາການທີ່ກ່ຽວຂ້ອງເຂົ້າຮ່ວມ.
ໃນພິທີພາຍຫຼັງຄະນະຈັດຕັ້ງໄດ້ຂື້ນກ່າວຈຸດປະສົງແລ້ວ ຜູ້ເຂົ້າຮ່ວມໄດ້ຮັບຟັງການຜ່ານຂໍ້ຕົກລົງຂອງເຈົ້າແຂວງຜົ້ງສາລີ ເລກທີ367/ຂຜລ ລົງວັນທີ 7 ພຶດສະພາ 2025 ວ່າດ້ວຍການອະນຸມັດ ແລະ ມອບສິດເຊັນສັນຍາ ໂຄງການ ກໍ່ສ້າງ ແລະ ບໍລິການໂຮງຮຽນມິດຕະພາບລາວ - ຈີນ ໂປເຊຍຢວນຢູ່ເຂດບ້ານໂນນສະຫວ່າງ, ເມືອງບູນເໜືອ, ແຂວງຜົ້ງສາລີ. ຈາກນັ້ນ, ໄດ້ດຳເນີນການເຊັນສັນຍາຢ່າງເປັນທາງການ ເຊີງຕາງໜ້າອົງການປົກຄອງແຂວງຜົ້ງສາລີ ຂື້ນລົງນາມເຊັນໂດຍແມ່ນທ່ານ ສຸບຸນລ້ຽງ ເນດບຸນນອງ ຮອງຫົວໜ້າພະແນກແຜນການ ແລະ ການລງທືນແຂວງຜົ້ງສາລີ ແລະ ຕາງໜ້າຝ່າຍບໍລິສັດຂື້ນເຊັນໂດຍທ່ານ ນາງ ຫລູ ຊຸນຈູ້ ປະທານບໍລິສັດໂປເຊຍຢວນ ທີປຶກສາດ້ານການສຶກສາທີ່ນະຄອນພູເອີ ຈຳກັດແຂວງຢູນນານ; ຕາງໜ້າຂື້ນເຊັນເປັນສັກຂີພິຍານໂດຍມີທ່ານ ພອນໄຊ ອ່ອນສາ ກຳມະການພັກແຂວງ, ຫົວໜ້າພະແນກສຶກສາທິການ ແລະ ກິລາແຂວງຜົ້ງສາລີ, ທ່ານ ຄຳ ສຸວົງ ຮອງເຈົ້າເມືອງບູນເໜືອ, ທ່ານ ຊາວຈັ່ງຊຸນ ຈາກບໍລິສັດໂປເຊຍຢວນ ທີປຶກສາດ້ານການສຶກສາທີ່ນະຄອນພູເອີ ຈຳກັດແຂວງຢູນນານ.
ຂ່າວ: ສົມຄິດ
