ໜ້າຫຼັກ / ການເຄື່ອນໄຫວ / ພິທີຮັບຮອງຄອບຄົວ-ບ້ານສາມັກຄີປອງດອງ ບ້ານນໍ້າຮອຍ ແລະ ບ້ານຫ້ວຍສູງ ເມືອງບຸນເໜືອ ແຂວງຜົ້ງສາລີ.
ພິທີຮັບຮອງຄອບຄົວ-ບ້ານສາມັກຄີປອງດອງ ບ້ານນໍ້າຮອຍ ແລະ ບ້ານຫ້ວຍສູງ ເມືອງບຸນເໜືອ ແຂວງຜົ້ງສາລີ.
ພິທີຮັບຮອງຄອບຄົວ ແລະ ບ້ານສາມັກຄີປອງດອງ ບ້ານນໍ້າຮອຍ ແລະ ບ້ານຫ້ວຍສູງໄດ້ຈັດຂຶ້ນຕອນເຊົ້າວັນທີ 01 ຕຸລາ 2024 ທີ່ຫ້ອງການກຸ່ມບ້ານຢໍ້ ໂດຍການເປັນປະທານຮ່ວມຂອງ ທ່ານ ບຸນລຳ ທຳມະໃຈ ກຳມະການປະຈຳພັກເມືອງ, ປະທານແນວລາວສ້າງຊາດເມືອງ, ເຂົ້າຮ່ວມມີຄະນະພັກຮາກຖານກຸ່ມ, ອົງການປົກຄອງບ້ານ, ເຖົ້າແກ່ແຮວໂຮມ ຕະຫຼອດຮອດທີມງານຂັ້ນເມືອງ
ໃນພິທີ ທ່ານ ບຸນລຳ ທຳມະໃຈ ກຳມະການປະຈຳພັກເມືອງ ປະທານແນວລາວສ້າງຊາດເມືອງ, ຂຶ້ນກ່າວເປີດພິທີ ພ້ອມທັງເຜີຍແຜ່ເອກະສານປະເທດລາວຄົນລາວເປັນເຈົ້າຂອງ ມີບາງຕອນທ່ານໄດ້ໃຫ້ຮູ້ວ່າ: ຈຸດປະສົງຂອງເອກະວສານດັ່ງກ່າວນີ້ແມ່ນເພື່ອໃຫ້ທົ່ວປວງຊົນຮັບຮູ້, ເຊື່ອມຊືມຢ່າງເລິກເຊິ່ງ ແລະ ເຫັນແຈ້ງກ່ຽວກັບສິດເປັນເຈົ້າຕົນເອງຕໍ່ປະເທດຊາດບົນຈິດໃຈປັບປຸງ ແລະ ເຊີດຊູສະຕິຊາດອັນໜຶ່ງອັນດຽວ, ຕ້ານ ແລະ ສະ ກັດກັ້ນແນວຄິດເອື່ອຍອີງ, ຄອງຄອຍ, ຂາດຄວາມຮັບຜິດຊອບ, ບໍ່ເຮັດແທ້ທຳຈິງນັ້ນ ເພື່ອຫັນປ່ຽນຕົວເອງ ພ້ອມກັນເຂົ້າຮວ່ມປະຕິບັດພາລະກິດການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງຂຶ້ນເລື້ອຍໆ. ທຸກປະເທດໃນໂລກນີ້ເຖິງຈະເປັນປະເທດນ້ອຍ ຫຼື ປະເທດໃຫຍ່ ລ້ວນແຕ່ແມ່ນຄົນຂອງປະເທດນັ້ນເປັນເຈົ້າຂອງເປັນຜູ້ປົກປັກຮັກສາ ແລະ ສ້າງສາພັດທະນາປະເທດຂອງຕົນເອງ, ຍາມໃດກໍ່ຕ້ອງຍົກສູງສະຕິຊາດ ແລະ ກຽດສັກສີຂອງຊາດ. ເຖິງຈະມີການຊ່ວຍເຫຼືອຈາກພາຍນອກແຕ່ປັດໃຈຕັດສິນຊະຕາກຳຂອງຊາດຕົນກໍຍັງແມ່ນຄົນຂອງປະເທດນັ້ນເປັນຜູ້ຮັບຜິດຊອບເອງ. ສໍາລັບປະເທດລາວ ກໍແມ່ນຄົນລາວເປັນເຈົ້າຂອງຈະບໍ່ມີຊາດອື່ນ, ຄົນປະເທດອື່ນ ມາປ່ຽນຄົນລາວໄດ້. ປະຊາຊົນລາວບັນດາເຜົ່າໄດ້ດຳລົງຊີວິດຢູ່ໃນຜືນແຜນດິນນີ້ມາແຕ່ດຶກດຳບັນ, ມີປະຫວັດສາດຄວາມເປັນມາລະອິດລະອ້ຽວຢ່າງຍາວນານຈົນໄດ້ເປັນທີ່ລືຊາໄປທົ່ວພາກພື້ນ ແລະ ໃນໂລກເຊັ່ນ: ເຈົ້າຟ້າງຸ່ມມະຫາລາດ, ເຈົ້າໄຊເຊດຖາທິລາດ ແລະ ອື່ນໆ. ປະຊາຊົນລາວ ເປັນເຈົ້າການປົກປັກຮັກສາເນື້ອທີ່ຂອງປະເທດລາວ 236.800 ກີໂລຕາແມັດລວມທັງນ່ານຟ້າ, ນ່ານນໍ້າ, ຊັບໃນດິນສິນໃນນໍ້າ, ພູຜາ, ປ່າໄມ້ ແລະ ອື່ນໆ ໄວ້ໃຫ້ໝັ້ນຄົງຍາວນານ. ຈາກນັ້ນ, ຕາງໜ້າທີມງານ ເມືອງຂຶ້ນຜ່ານ ຂໍ້ຕົກລົງສະບັບເລກທີ 167/ມບໜ ບຸນເໜືອ ລົງວັນທີ 5 ສິງຫາ 2024 ວ່າດ້ວຍການຮັບຮອງເອົາຄອບຄົວສາມັກຄີປອງດອງປະຈຳປີ 2024. ໃຫ້ແກ່ບ້ານ ນໍ້າຮອຍ ແລະ ບ້ານ ຫ້ວຍສູງ; ຜ່ານຂໍ້ຕົກລົງສະບັບເລກທີ 710/ຂຜລ ຜົ້ງສາລີ ລົງວັນທີ 20 ສິງຫາ 2024 ວ່າດ້ວຍການມອບໃບຢັ້ງຢືນ ບ້ານສາມັກຄີປອງດອງໃຫ້ແກ່ ບ້ານ ນໍ້າຮອຍ ແລະ ບ້ານຫ້ວຍສູງ ເມືອງ ບຸນເໜືອ ແຂວງ ຜົ້ງສາລີເຊິ່ງໃຫ້ກຽດຂຶ້ນມອບ ຂອງທ່ານ ບຸນລຳ ທຳມະໃຈ ກຳມະການປະຈຳພັກເມືອງ ປະທານແນວລາວສ້າງຊາດ, ເປັນກຽດຂຶ້ນຮັບໂດຍປະທານແນວລາວສ້າງຊາດບ້ານ, ເລຂານາຍບ້ານທັງສອງບ້ານ ຂຶ້ນຮັບຕາມລຳດັບ.
ຖືໂອກາດນີ້ທີມງານຂັ້ນເມືອງຍັງໄດ້ເຜີຍແຜ່ເອກະສານ ໂຄສະນາປູກລະດົມການປະຕິບັດພັນທະເສຍພາສີ ແລະ ອາກອນຕໍ່ລັດ ໃຫ້ປະຊາຊົນທີ່ຂຶ້ນກັບກຸ່ມບ້ານຢໍ້ ແລະ ກຸ່ມນໍ້າລູຕື່ມອີກ