ໜ້າຫຼັກ / ການເຄື່ອນໄຫວ / ສອງຄະນະຈັດຕັ້ງ ແຂວງຜົ້ງສາລີ ກັບ ແຂວງດຽນບ່ຽນ ພົບປະແລກປ່ຽນບົດຮຽນຮ່ວມກັນ.
ກອງປະຊຸມພົບປະແລກປ່ຽນບົດຮຽນຮ່ວມກັນ ລະຫ່ວາງ ຄະນະຜູ້ແທນ ຄະນະຈັດຕັ້ງ ແຂວງຜົ້ງສາລີ ແຫ່ງ ສປປ ລາວ ກັບ ຄະນະຜູ້ແທນ ຄະນະຈັດຕັ້ງ ແຂວງດຽນບ່ຽນ ແຫ່ງ ສສ ຫວຽດນາມ ໄດ້ຈັດຂຶ້ນໃນຕອນເຊົ້າຂອງວັນທີ 15 ຕຸລາ 2024 ນີ້, ທີ່ຫ້ອງປະຊຸມຂອງຫ້ອງວ່າການແຂວງ ເຊິ່ງຝ່າຍແຂວງຜົ້ງສາລີ ນຳໂດຍ ສະຫາຍ ສັນຕິ ແກ້ວຍະສານ ກຳມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງ ຜົ້ງສາລີ, ຝ່າຍແຂວງດຽນບ່ຽນ ນຳໂດຍ ສະຫາຍ ຟາມ ຄັກ ກວນ ກຳມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງ ດຽນບ່ຽນ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.
ໂອກາດນີ້, ສະຫາຍ ສັນຕິ ແກ້ວຍະສານ ກຳມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງ ຜົ້ງສາລີ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກໃນຄັ້ງນີ້ ຂອງຄະນະຜູ້ແທນຄະນະຈັດຕັ້ງແຂວງ ດຽນບ່ຽນ ແຫ່ງ ສສ ຫວຽດນາມ ເພາະເປັນການເສີມຂະຫຍາຍມູນເຊື້ອ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ລະຫວ່າງ ຄະນະຈັດຕັ້ງ ແຂວງຜົ້ງສາລີ ກັບແຂວງດຽນບ່ຽນ ໃຫ້ນັບມື້ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ. ໂອກາດນີ້ທັງສອງຝ່າຍໄດ້ລາຍງານສະພາບຈຸດພິເສດທີ່ຕັ້ງ ແລະ ການພັດທະນາເສດຖະກິດ-ສັງຄົມຂອງແຂວງ ໃຫ້ກັນຊາບເຊິ່ງກັນ ແລະ ກັນ. ພ້ອມທັງແລກປ່ຽນບົດຮຽນວຽກງານຄະນະຈັດຕັ້ງແຂວງ ເຊິ່ງໄດ້ນຳສະເໜີເນື້ອໃນ ແລະ ບົດຮຽນ, ປະສົບການ ແລະ ການເຄື່ອນໄຫວຈັດຕັ້ງປະຕິບັດເຮັດວຽກງານ ຕາມພາລະບົດບາດ, ສິດ ແລະ ໜ້າທີ່ຂອງຕົນຕາມຂອບເຂດສິດ ແລະ ໜ້າທີ່ທີ່ກົດໝາຍກຳນົດໄວ້ ພ້ອມທັງປະກອບຄຳຄິດ, ຄຳເຫັນ ຕໍ່ວຽກງານຕ່າງໆ ຢ່າງກົງໄປ-ກົງມາ, ສ້າງສັນ ເປັນເອກະພາບ ບົນພື້ນຖານຄວາມສາມັນຄີຮັກແພງ, ຊ່ວຍເຫຼືອເຊິ່ງກັນ ແລະ ກັນ ເປັນຕົ້ນ: ວຽກງານການກໍ່ສ້າງພັກ, ການຄົ້ນຄວ້າພະນັກງານໄປບຳລຸງ-ກໍ່ສ້າງ, ການທຽບລະດັບທິດສະດີໃຫ້ພະນັກງານ-ລັດຖະກອນ, ການຍົກຍ້າຍສະມາຊິກພັກ, ການປັບປຸງກົງຈັກການຈັດຕັ້ງພັກ ຕິດພັນກັບການປັບປຸງກົງຈັກການຈັດຕັ້ງລັດ, ເປັນຕົ້ນການໂຮມວຽກງານ, ການຍຸບກົງຈັກການຈັດຕັ້ງ ການຂະຫຍາຍພັກ ແລະ ການກະກຽມບຸກຄະລາກອນໃຫ້ແກ່ການດຳເນີນກອງປະຊຸມໃຫຍ່ 3 ຂັ້ນ, ການກວດກາ ພິສູດຍັ້ງຢືນຄວາມຖືກຕ້ອງທາງດ້ານປະຫວັດຕົ້ນກຳເນີດ ແລະ ການຕິດຕາມສະມາຊິກພັກກ່ອນການເລືອກຕັ້ງ, ແຕ່ງຕັ້ງພະນັກງານເຂົ້າຮັບຕໍາແໜ່ງສຳຄັນ, ລວມໄປເຖິງບັນຫາດ້ານອ່ອນຂໍ້ຄົງຄ້າງທີ່ທັງສອງແຂວງພົບພໍ້ໃນໄລຍະຜ່ານມາ ແລະ ບັນຫາອື່ນໆອີກຈຳນວນໜື່ງ ເພື່ອແລກປ່ຽນບົດຮຽນເຊິ່ງກັນ ແລະ ກັນ ມີຄໍາຄິດຄຳເຫັນແກ້ໄຂຮ່ວມກັນກ່ຽວກັບບັນຫາຂໍ້ຄົງຄ້າງຕ່າງໆ ແນໃສ່ແກ້ໄຂບັນຫາຂໍ້ຫຍຸ້ງຍາກທີ່ພົບເຫັນໃນໄລຍະຜ່ານມາ ຍົກສູງຄຸນນະພາບ ແລະ ບົດບາດຂອງວຽກງານຈັດຕັ້ງ ກໍ່ສ້າງພັກ - ພະນັກງານ ໃຫ້ກ້າວເຂົ້າສູ່ລວງເລິກ ແລະ ມີຄຸນນະພາບໃໝ່.
