ໜ້າຫຼັກ / ການເຄື່ອນໄຫວ / ໜ່ວຍພັກ ພະແນກຊັບພະຍາກອນ, ທຳມະຊາດ ແລະ ສິ່ງແວດລ້ອມແຂວງຜົ້ງສາລີ ໄດ້ຮັບໃບຢັ້ງຍືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2023.
ພິທີມອບ-ຮັບໃບຢັ້ງຍືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2023 ຂອງໜ່ວຍພັກພະແນກຊັບພະຍາກອນ, ທຳມະຊາດ ແລະ ສິ່ງແວດລ້ອມແຂວງຜົ້ງສາລີ ຄັ້ງທີ III ໄດ້ຈັດຂຶ້ນໃນຕອນບ່າຍຂອງວັນທີ 17 ຕຸລາ 2024 ນີ້, ຢູ່ຫ້ອງປະຊຸມຂອງພະແນກພະລັງງານ ແລະ ບໍ່ແຮ່ແຂວງ. ໂດຍການເປັນກຽດເຂົ້າຮ່ວມຂອງສະຫາຍ ວິສອນ ລາວເມົາ ກໍາມະການປະຈຳພັກແຂວງ, ຮອງເຈົ້າແຂວງ, ຜູ້ຊີ້ນຳວຽກງານຂົງເຂດເສດຖະກິດຂັ້ນແຂວງ, ມີສະຫາຍ ທອງ ອາລີ ເລຂາໜ່ວຍພັກ, ຫົວໜ້າພະແນກ ຊັບພະຍາກອນ, ທຳມະຊາດ ແລະ ສິ່ງແວດລ້ອມແຂວງ ມີຜູ້ຕາງໜ້າຄະນະຈັດຕັ້ງແຂວງ, ກວດກາແຂວງ, ຄະນະໂຄສະນາອົບຮົມແຂວງ, ໜ່ວຍພັກອ້ອມຂ້າງ, ຕະຫຼອດຮອດສະມາຊິກພັກສົມບູນ ແລະ ສໍາຮອງ ພາຍໃນໜ່ວຍພັກເຂົ້າຮ່ວມ.
ໃນພິທີ ສະຫາຍ ທອງ ອາລີ ເລຂາໜ່ວຍພັກ, ຫົວໜ້າພະແນກ ຊັບພະຍາກອນ, ທຳມະຊາດ ແລະ ສິ່ງແວດລ້ອມແຂວງ ໄດ້ຂຶ້ນຜ່ານບົດສະຫຼູບຕິລາຄາປະເມີນຜົນການກໍ່ສ້າງໜ່ວຍພັກປອດໃສເຂັ້ມແຂງ ແລະ ໜັກແໜ້ນ ປະຈຳປີ 2023 ແລະ ຜ່ານທິດທາງແຜນການໃນຕໍ່ໜ້າ. ເຊິ່ງທ່ານໄດ້ຍົກໃຫ້ເຫັນຜົນງານດ້ານຕັ້ງໜ້າໃນການຊີ້ນຳໆພາການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໝັກແໜ້ນ, ຈຸດອ່ອນຂໍ້ຄົງຂ້າງ ແລະ ບາງບົດຮຽນທີ່ຖອດຖອນໄດ້ ໃນໄລຍະທີ່ຜ່ານມາ. ປະຈຸບັນ ໜ່ວຍພັກພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ມີ 5 ຂະແໜງ, ມີສະມາຊິກພັກທັງໝົດ 46 ສະຫາຍ, ຍິງ 16 ສະຫາຍ, ສໍາຮອງ 8 ສະຫາຍ ກວມ 79,31 % ຂອງພະນັກງານ-ລັດຖະກອນທັງໝົດ, ໃນນີ້ ຜ່ານຈາກການປະເມີນຕີລາຄາສະມາຊີກພັກ ມີສະມາຊິກພັກແຂງ 30 ສະຫາຍ, ຍີງ 11 ສະຫາຍ ເທົ່າກັບ 78,9 %, ປະເພດກາງ: 8 ສະຫາຍ ຍິງ 4 ສະຫາຍ ເທົ່າກັບ 21 % ແລະ ສະມາຊິກພັກ ບໍ່ໄດ້ປະເມີນຕີລາຄາ ມີ: 8 ສະຫາຍ, ຍິງ 4 ສະຫາຍ.
ຈາກນັ້ນ ສະຫາຍ ບຸນສະຫວັດ ເຫຼັກກັນຍາ ຕາງໜ້າຄະນະຈັດຕັ້ງແຂວງ ກໍ່ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ່ 473/ຄພຂ, ຜລ ລົງວັນທີ 20 ສິງຫາ 2024 ວ່າດ້ວຍການອະນຸມັດມອບໃບຢັ້ງຢືນໃຫ້ໜ່ວຍພັກ ພະແນກ ຊັບພະຍາກອນ, ທຳມະຊາດ ແລະ ສິ່ງແວດລ້ອມແຂວງ ຜົ້ງສາລີ ເປັນໜ່ວຍພັກປອດໃສເຂັ້ມແຂງ ແລະ ໜັກແໜ້ນ ປະຈໍາປີ 2023. ເປັນກຽດຂຶ້ນມອບໃບຢັ້ງຢືນດັ່ງກ່າວໂດຍ ໂດຍແມ່ນ ສະຫາຍ ວິສອນ ລາວເມົາ ກໍາມະການປະຈຳພັກແຂວງ, ຮອງເຈົ້າແຂວງ, ຜູ້ຊີ້ນຳວຽກງານຂົງເຂດເສດຖະກິດຂັ້ນແຂວງ ແລະ ຂຶ້ນຮັບໂດຍ ສະຫາຍ ທອງ ອາລີ ເລຂາໜ່ວຍພັກ, ຫົວໜ້າພະແນກ ຊັບພະຍາກອນ, ທຳມະຊາດ ແລະ ສິ່ງແວດລ້ອມແຂວງ ພ້ອມດ້ວຍຄະນະພັກຢ່າງສົມກຽດ.
ໃນໂອກາດທີ່ມີຄວາມໜາຍຄວາມສໍາຄັນນີ້ ສະຫາຍ ວີສອນ ລາວເມົາ ຮອງເຈົ້າແຂວງຜົ້ງສາລີ ກໍ່ໄດ້ໂອ້ລົມຕໍ່ພິທີເຊິ່ງກ່ອນອື່ນສະຫາຍ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍ ແລະ ຕິລາສູງຕໍ່ຜົນສໍາເລັດການກໍ່ສ້າງໜ່ວຍພັກປອດໃສເຂັ້ມແຂງ ແລະ ໜັກແໜ້ນ ຂອງໜ່ວຍພະແນກຊັບພະຍາກອນ, ທຳມະຊາດ ແລະ ສິ່ງແວດລ້ອມ ໃນໄລຍະທີ່ຜ່ານມາ ພ້ອມນີ້, ສະຫາຍຍັງໄດ້ຮຽກຮ້ອງມາຍັງຄະນະໜ່ວຍພັກ, ສະມາຊີກພັກ ຕ້ອງໄດ້ກຳແໜ້ນບັນດາມະຕິ, ຄຳສັ່ງ ຂອງສູນກາງ ແລະ ແຂວງວາງອອກເປັນແຕ່ລະໄລຍະໃຫ້ເລິກເຊິ່ງເຖິງຖອງ ໂດຍສະເພາະກຳແໜ້ນພາລະບົດບາດ, ສິດ ແລະ ໜ້າທີ່ຂອງຕົນ ເພື່ອເປັນບ່ອນອີງໃນການເຄື່ອນໄຫວ ແລະ ປະຕິບັດວຽກງານ ໃຫ້ຖືກຕ້ອງຕາມກົດໝາຍ ແລະ ມີຜົນສຳເລັດ; ກໍາແໜ້ນ ເນື້ອໃນຂອງກົດລະບຽບຂອງພັກ ສະໄໝທີ XI ແລະ ຮູ້ຜັນຂະຫຍາຍ ເຂົ້າໃນການນຳພາທຸກຂົງເຂດວຽກງານຕົວຈິງຂອງຕົນ, ກໍາແໜ້ນ 5 ຫຼັກການ ແລະ 3 ທິດນຳ ໃຫ້ໜັກແໜ້ນ ແລະ ຮູ້ຜັນຂະຫຍາຍເຂົ້າໃນການຊີ້ນໍາ-ນຳພາວຽກງານ ຂອງໜ່ວຍພັກ; ສືບຕໍ່ປັບປຸງ ກໍ່ສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ ເປັນແບບຢ່າງນຳໜ້າ ໃນການປະຕິບັດໜ້າທີ່ວຽກງານ, ມີລະບຽບວິໄນ, ມີແບບແຜນວິທີນຳພາ ທີ່ມີວິທະຍາສາດ, ປະດິດສ້າງ ແລະ ແທດເຖິງຕົວຈິງ, ສ້າງພັກໃຫ້ມີຄວາມສາມັກຄີປອງດອງ ປອດໄສຂາວສະອາດ, ມີຄວາມເຂັ້ມງວດໃນການສະກັດກັ້ນ ແລະ ຕ້ານການສໍ້ລາດບັງຫລວງ ແລະ ປະກົດການຫຍໍ້ທໍ້ໃນກົງຈັກການຈັດຕັ້ງ ຂອງພັກ - ລັດ ແລະ ຖັນແຖວພະນັກງານ ສະມາຊິກພັກ; ເອົາໃຈໃສ່ຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍ, ພ້ອມທັງ ຕິດຕາມ, ຊຸກຍູ້ ການສະຫຼຸບຕີລາຄາປະເມີນຜົນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ສ້າງໃຫ້ໜ່ວຍພັກສາມາດເປັນແກນນຳ ໃນການຈັດຕັ້ງນຳພາ ປະຕິບັດໜ້າທີ່ການເມືອງຂອງຕົນໄປສູ່ຄຸນນະພາບໃໝ່ ດ້ວຍພູມປັນຍາຂອງຄະນະພັກ, ສະມາຊິກພັກແຕ່ລະສະຫາຍ; ພ້ອມກັນນັ້ນ ສະມາຊິກພັກແຕ່ລະສະຫາຍ ຕ້ອງເປັນເຈົ້າການໃນການພັດທະນາກົມກອງ ແລະ ພັດທະນາຕົນເອງດ້ວຍຄວາມເປັນແບບຢ່າງນຳໜ້າ ສົມກັບວ່າເປັນສະມາຊິກພັກ ປອດໃສ, ເຂັ້ມແຂງ, ໜັ້ກແໜ້ນ ພ້ອມກັນນັ້ນກໍ່ຕ້ອງເຕົ້າໂຮມຄວາມສາມັກຄີພາຍໃນໜ່ວຍພັກໃຫ້ເປັນປືກແຜນ ແລະ ສືບຕໍ່ຮັກສາມູນເຊື້ອໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນໃຫ້ໜັ້ນຄົງຕະຫຼອດໄປ.
( ພາບ-ຂ່າວ: ແສງຄໍາ ສາລີວັນ )
