ໜ້າຫຼັກ / ການເຄື່ອນໄຫວ / ໜ່ວຍພັກ ສະຫະພັນກຳມະບານແຂວງຜົ້ງສາລີ ໄດ້ຮັບໃບຢັ້ງຢືນນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2023.
ພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2023 ຂອງໜ່ວຍພັກສະຫະພັນກຳມະບານແຂວງຜົ້ງສາລີ ຄັ້ງທີ VI ໄດ້ຈັດຂຶ້ນໃນຕອນເຊົ້າຂອງວັນທີ 24 ຕຸລາ 2024 ນີ້, ຢູ່ຫ້ອງປະຊຸມຂອງສະຫະພັນກຳມະບານແຂວງ. ໂດຍການເປັນກຽດເຂົ້າຮ່ວມຂອງສະຫາຍ ທອງສະຫວັນ ທຳມະວົງ, ກໍາມະການປະຈໍາພັກແຂວງ, ປະທານແນວລາວສ້າງຊາດແຂວງ, ຜູ້ຊີ້ນໍາອົງການຈັດຕັ້ງມະຫະຊົນຂັ້ນແຂວງ, ມີສະຫາຍ ນາງ ຕຸລາພອນ ອະລິຍະ ກຳມະການພັກແຂວງ ເລຂາໝ່ວຍພັກ, ປະທານສະຫະພັນກຳມະບານແຂວງ, ມີຜູ້ຕາງໜ້າຄະນະຈັດຕັ້ງແຂວງ, ກວດກາແຂວງ, ຄະນະໂຄສະນາອົບຮົມແຂວງ ຕະຫຼອດຮອດສະມາຊິກພັກ ພາຍໃນໜ່ວຍພັກເຂົ້າຮ່ວມ.
ໃນພິທີສະຫາຍ ນາງ ຕຸລາພອນ ອະລິຍະ ເລຂາໜ່ວຍພັກ, ປະທານສະຫະພັນກຳມະບານແຂວງ ໄດ້ຂຶ້ນຜ່ານບົດສະຫຼູບການກໍ່ສ້າງໜ່ວຍພັກປອດໃສເຂັ້ມແຂງ ແລະ ໜັກແໜ້ນ ປະຈຳປີ 2023 ແລະ ຜ່ານທິດທາງແຜນການກໍ່ສ້າງໜ່ວຍພັກປອດໃສເຂັ້ມແຂງ ແລະ ໜັກແໜ້ນ ໃນຕໍ່ໜ້າ. ເຊິ່ງທ່ານໄດ້ຍົກໃຫ້ເຫັນຜົນງານດ້ານຕັ້ງໜ້າໃນການຊີ້ນຳໆພາການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໝັກແໜ້ນ, ຈຸດອ່ອນຂໍ້ຄົງຂ້າງ ແລະ ບາງບົດຮຽນທີ່ຖອດຖອນໄດ້ ໃນໄລຍະທີ່ຜ່ານມາ. ປະຈຸບັນພາຍໃນໜ່ວຍພັກມີຄະນະໜ່ວຍພັກ 3 ສະຫາຍ, ຍິງ 2 ສະຫາຍ ແລະ ມີສະມາຊີກພັກທັງໝົດ 16 ສະຫາຍ, ຍິງ 11 ສະຫາຍ. ຜ່ານການຕີລາຄາຈັດແບ່ງປະເພດສະມາຊີກພັກ ມີສະມາຊີກພັກປອດໃສ, ເຂັ້ມແຂງ ແລະ ໝັກແໜ້ນ ທັງໝົດ 16 ສະຫາຍ, ຍິງ 11 ສະຫາຍ ກວມເອົາ 100 %.
ຈາກນັ້ນ ສະຫາຍ ບຸນສະຫວັດ ເຫຼັກກັນຍາ ຕາງໜ້າຄະນະຈັດຕັ້ງແຂວງ ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 466/ຄພຂ, ລົງວັນທີ 20 ສິງຫາ 2024 ວ່າດ້ວຍການອະນຸມັດມອບໃບຢັ້ງຢືນໃຫ້ໜ່ວຍພັກ ສະຫະພັນກຳມະບານແຂວງຜົ້ງສາລີ ເປັນໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2023 ເປັນກຽດຂື້ນມອບໃບຢັ້ງຢືນໂດຍ ສະຫາຍ ທອງສະຫວັນ ທຳມະວົງ, ກໍາມະການປະຈໍາພັກແຂວງ, ປະທານແນວລາວສ້າງຊາດແຂວງ, ຜູ້ຊີ້ນໍາອົງການຈັດຕັ້ງມະຫະຊົນຂັ້ນແຂວງ ແລະ ຂື້ນຮັບໂດຍ ສະຫາຍ ນາງ ຕຸລາພອນ ອະລິຍະ ກຳມະການພັກແຂວງ ເລຂາໜ່ວຍພັກ, ປະທານສະຫະພັນກຳມະບານແຂວງ.
ໃນໂອກາດທີມີຄວາມໜາຍຄວາມສໍາຄັນນັ້ນຍັງໄດ້ຮັບຟັງການໂອ້ລົມຈາກ ສະຫາຍ ທອງສະຫວັນ ທໍາມະວົງ ປະທານແນວລາວສ້າງຊາດແຂວງ ຜູ້ຊີ້ນໍາອົງການຈັດຕັ້ງມະຫະຊົນຂັ້ນແຂວງ ເຊິ່ງກ່ອນອື່ນສະຫາຍ ກໍ່ໄດ້ສະແດງຄວາມຍ້ອງຍໍຊົມເຊີຍ ແລະ ຕິລາຄາສູງຕໍ່ຜົນສໍາເລັດການກໍ່ສ້າງໜ່ວຍພັກປອດໃສເຂັ້ມແຂງ ແລະ ໜັກແໜ້ນ ພ້ອມນີ້, ສະຫາຍຍັງໄດ້ຮຽກຮ້ອງມາຍັງຄະນະໜ່ວຍພັກ, ສະມາຊິກພັກແຕ່ລະສະຫາຍຕ້ອງເປັນເຈົ້າການໃນການພັດທະນາກົມກອງ, ພັດທະນາຕົນເອງດ້ວຍຄວາມເປັນແບບຢ່າງນໍາໜ້າ, ສືບຕໍ່ປັບປຸງແບບແຜນວິທີເຮັດວຽກ, ສືບຕໍ່ເຊື່ອມຊືມບັນດາເອກະສານຕ່າງໆ ໃຫ້ແກ່ສະມາຊິກພັກເປັນແຕ່ລະໄລຍະ, ກໍາແໜ້ນ 5 ຫຼັກການ ແລະ 3 ທິດນຳ ໃຫ້ໜັກແໜ້ນ ແລະ ຮູ້ຜັນຂະຫຍາຍເຂົ້າໃນການຊີ້ນໍາ-ນຳພາຂອງໜ່ວຍພັກ, ພ້ອມກັນຮ່ວມຊິວິດການເມືອງໃຫ້ເປັນປົກກະຕິ, ເອົາໃຈໃສ່ສືກສາອົບຮົມການເມືອງແນວຄິດໃຫ້ແກ່ພະນັກງານລັດຖະກອນ, ເພີ່ມທະວີໃນການຕິດຕາມກວດກາບັນດາຊາວຜູ້ອອກແຮງງານ, ພ້ອມກັນນັ້ນຈົ່ງເຕົ້າໂຮມຄວາມສາມັກຄີພາຍໃນໜ່ວຍພັກໃຫ້ເປັນປືກແຜນ ແລະ ສືບຕໍ່ຮັກສາມູນເຊື້ອໜ່ວຍພັກປອດໃສເຂັ້ມແຂງ ແລະ ໜັກແໜ້ນໃຫ້ໜັ້ນຄົງຕະຫຼອດໄປ.
ໃນພິທີຄັ້ງນີ້ ໄດ້ຜ່ານຂໍ້ຕົກລົງຂອງທ່ານເຈົ້າແຂວງ ແລະ ມອບໃບຍ້ອງຍໍຂອງທ່ານເຈົ້າແຂວງປະຈຳປີ 2023 ໃຫ້ແກ່ພະນັກງງານລັດຖະກອນສະຫະພັນກໍາມະບານແຂວງທີ່ມີຜົນງານດີເດັ່ນໃນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ລວມທັງໝົດ 16 ທ່ານ, ຍິງ 9 ທ່ານ, ເປັນກຽດຂຶ້ນມອບໂດຍ ສະຫາຍ ທອງສະຫວັນ ທຳມະວົງ, ກໍາມະການປະຈໍາພັກແຂວງ, ປະທານແນວລາວສ້າງຊາດແຂວງ, ແລະ ຂຶ້ນຮັບ ໂດຍບັນດາທ່ານພະນັກງານລັດຖະກອນພາຍໃນສະຫະພັນກຳມະບານແຂວງຕາມລຳດັບ.
