ໜ້າຫຼັກ / ການເຄື່ອນໄຫວ / 28 ປີ ແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງວິທະຍຸ - ໂທລະພາບແຂວງຜົ້ງສາລີ
28 ປີ ແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງວິທະຍຸ - ໂທລະພາບແຂວງຜົ້ງສາລີ
(ເນື່ອງໃນໂອກາດ ວັນສ້າງຕັ້ງສະຖານີວິທະຍຸ - ໂທລະພາບແຂວງຜົ້ງສາລີ ຄົບຮອບ 28 ປີ ວັນທີ 20 ທັນວາ 1996 – 20 ທັນວາ 2024)
ໂດຍ: ສົມຄິດ ແກ້ວນວນລາ
ສະຖານີວິທະຍຸ -ໂທລະພາບແຂວງຜົ້ງສາລີ (ວ ທ ຜ) ສ້າງຕັ້ງຂື້ນໃນວັນທີ 20 ທັນວາ 1996 ເຊີງຕັ້ງຢູ່ ບ້ານ ໂພນແກ້ວ, ເມືອງຜົ້ງສາລີ ເທດສະບານແຂວງເກົ່າ, ເປັນສະຖານີທີ່ຂື້ນກັບ ພະແນກ ຖວທ ແຂວງຜົ້ງສາລີ, ມີພາລະບົດບາດທຽບເທົ່າກັບບັນດາຂະແໜງໃນພະແນກ ຖວທ ແຂວງ ໄດ້ເຄື່ອນໄຫວປະກອບສ່ວນຢ່າງຕັ້ງໜ້າເຂົ້າໃນການຈັດຕັ້ງປະຕິບັດວຽກງານຕາມພາລະບົດບາດ ແລະ ໜ້າທີ່ຂອງຕົນເປັນຕົ້ນນແມ່ນອອກແຮງໂຄສະນາ, ເຜີຍແຜ່ແນວທາງແຜນນະໂຍບາຍຂອງພັກ, ລະບຽບກົດໜາຍຂອງລັດ,ໂຄສະນາສຶກສາອົບຮົມ, ປຸກລະດົມຊວນເຊື່ອພົນລະເມືອງທຸກຊັ້ນຄົນໃນສັງຄົມໃຫ້ມີຄວາມຕື່ນຕົວເປັນເຈົ້າການເຂົ້າຮ່ວມປະຕິບັດແນວທາງນະໂຍບາຍຂອງພັກ, ລະບຽບກົດໜາຍຂອງລັດ, ແຜນພັດທະເສດຖະກິດ-ສັງຄົມຂອງລັດ, ວຽກງານປ້ອງກັນຊາດ, ປ້ອງການຄວາມສະຫງົບ ໃນແຕ່ລະໄລຍະ ຕອບໂຕ້ທຸກຖ້ອຍທຳນອງການໂຄສະນາໃສ່ຮ້າຍປ້າຍສີບິດເບື່ອນຄວາມຈິງຂອງພວກຄົນບໍ່ດີອັນໄດ້ສ້າງຄວາມເສື່ອມເສຍໃຫ້ແກ່ຜົນປະໂຫຍລວມຂອງພັກ, ຂອງຊາດ ແລະ ຂອງປະຊາຊົນ, ຕຳນິຕິຊົມຕໍ່ການກະທໍາທີ່ເປັນການລະເມີດລະບຽບກົດໜາຍ ແລະ ປະກົດການຫຍໍ້ທໍ້ທີ່ເກີດຂື້ນໃນສັງຄົມຢ່າງຕັ້ງໜ້າ, ພ້ອມກັນນັ້ນກໍ່ໄດ້ເຜີຍແຜ່ຂໍ້ມູນຂ່າວສານເຫດການທີເກີດຂື້ນ, ສາລະຄວາມຮູ້, ສາລະບັນເທີງໃຫ້ແກ່ສັງຄົມ. ເຊີງໃນແຕ່ລະໄລຍະກໍ່ໄດ້ປັບປຸງ, ຍົກລະດັບພາຫະນະຂອງສື່ມວນຊົນ(ວິທະຍຸ, ໂທລະພາບ ແລະ ໂທລະໂຄ່ງ)ໃຫ້ສາມາດກະຈາຍຮັບໃຊ້ໜ້າທີ່ການເມືອງຢ່າງຕໍ່ເນື່ອງ ຕິດພັນກັບການຍົກລະດັບຄວາມຮູ້, ຄວາມສາມາດຂອງພະນັກງານທີ່ເຮັດວຽກງານສື່ມວນຊົນໃຫ້ສົມຄູ່ກັບຍຸກເຕັກໂນໂລຊີທີ່ທັນສະໄໝ ແລະ ສົມຄູ່ກັບໜ້າທີ່ການເມືອງໃນໄລຍະໃໝ່ ສ້າງທຸກເງື່ອນໄຂ້ເຮັດໃຫ້ວຽກງານດັ່ງກ່າວໃຫ້ມີຄວາມເຂັ້ມແຂ່ງ, ມີຄວາມກ້າວໜ້າ ແລະ ທັນສະໄໜຂື້ນເລື້ອຍໆ
ໄລຍະສ້າງຕັ້ງທຳອິດປີ1996 – 2005: ໄລຍະນີ້ເອີ້ນວ່າຂະແໜງຖະແຫຼງຂ່າວ ທີ່ຮັບຜິດຊອບວຽກງານສະຖານີວິທະຍຸ - ໂທລະພາບແຂວງ ປີ 1996 ແມ່ນກະຈ່າຍລະບົບວິທະຍຸໃຊ້ເສົາອັງແຕນສູງ 65 ແມັດ, ກະຈາຍດ້ວຍລະບົບອານາລ໋ອກ ຄື້ນ FM 100.8 Mhz ດ້ວຍເຄື່ອງສົ່ງ 100 w, ກະຈາຍກວມພື້ນທີ 10 ບ້ານເທດສະບານແຂວງເກົ່າ ເມືອງຜົ້ງສາລີ, ມີຜູ້ໄດ້ຮັບຟັງ 6,960 ຄົນ, ກະຈາຍ 4 ຊົວໂມງ ຕໍ່ວັນ, ມີ 2 ລາຍການ. ພ້ອມທັງກະຈາຍໂທລະໂຄ່ງ 4 ຊົວໂມງຕໍ່ວັນ. ໂທລະພາບ ນັບແຕ່ມື້ສ້າງຕັ້ງແມ່ນກະຈາຍດ້ວຍລະບົບອານາລ໋ອກ ໃຊ້ເຄື່ອງສົງ 300 w ກວມພື້ນທີໃນ 11 ເທດສະບານຂອງແຂວງເກົ່າ ເມືອງຜົ້ງສາລີ, ມີຜູ້ໄດ້ຮັບຟັງ 7,305 ຄົນ ມີ 1 ລາຍການຂ່າວ. ໄລຍະກ່ອນການກໍ່ສ້າງສະຖານີຈົນຮອດປີ1996 ໂດຍແມ່ນ ທ່ານ ວັນ ສົມສະກຸນ ເປັນຫົວໜ້າຂະແໜງຖະແຫຼງຂ່າວ ທີແບ່ງອອກເປັນໜ່ວຍງານຄື່: ໜ່ວຍວິທະຍຸ - ໂທລະພາບແຂວງ ( ສະຖານີວິທະຍຸ-ໂທລະພາບແຂວງ ໃນປະຈຸບັນ ) ແລະ ໜ່ວຍງານໂທລະໂຄ່ງທີ່ມີສູນຄວບຄຸມການກະຈາຍໂທລະໂຄ່ງຢູເຂດສີ່ແຍກຫຼັກສູນ ເມືອງຜົ້ງສາລີ ທີ່ຮັບສັນຍານຈາກວິທະຍຸແຂວງ ແລະ ກະຈາຍອອກທາງໂທລະໂຄ່ງໃນເທດສະບານແຂວງເກົ່າ, ເຊີງສະຖານີໄລຍະນີ້ມີພະນັກງານທັງໝົດ 8 ຄົນ, ຍິງ 1 ຄົນ. ໄລຍະກໍ່ສ້າງສຳເລັດ ແລະ ເປີດການກະຈາຍປີ1996 – 2008 ນີ້ ແມ່ນທ່ານ ບຸນຈັນ ແພງສະຫວັດ ເປັນຫົວໜ້າສະຖານີ ມີພະນັກງານທັງໝົດ 9 ຄົນ, ຍິງ 3 ຄົນ.
ໄລຍະປີ 2006 - 2015: ວັນທີ 1 ມິຖຸນາ 2008 ແມ່ນໄດ້ຮັບການຊ່ວຍເຫຼືອຈາກປະເທດເພື່ອນບ້ານ ສ ປ ຈີນ ໄດ້ມາຊ່ວຍປັງປຸງມອບເຄື່ອງສົ່ງວິທະຍຸ ຕິດຕັ້ງ 3 Kw ກວມພື້ນທີ 342 ບ້ານ ໃນ 5 ເມືອງຂອງແຂວງ, ກວມ 75 % ຂອງເນື້ອທີ່ທົ່ວແຂວງ , ຈັດລາຍການອອກອາກາດ 17 ຊົວໂມງຕໍ່ວັນ, ມີ 15 ລາຍການ ໃນນັ້ນລາຍການສະຖານີມີ 2 ລາຍການ ແລະ ລາຍການເປົ້າໝາຍສະເພາະກົມກອງ, ພະແນກການຂອງແຂວງມາຈັດຮ່ວມ 13 ລາຍການ ແລະ ຄຽງຄູກັບການກະຈາຍໂທລະໂຄ່ງໃນເທດສະບານແຂວງເກົ່າ 4 ຊົວໂມງ 30 ນາທີ ຕໍ່ວັນ. ແຕ່ການດຳເນີນການກະຈາຍໄດ້ເກີດມີໄພທຳມະຊາດ ຖຶກຟ້າຜ່າເຄື່ອງສົງຫຼາຍຄັ້ງ ຈຶ່ງເຮັດໃຫ້ຄຸນະພາບເຄຶ່ອງຫຼຸດລົງ ແລະ ພື້ນທີ່ກະຈາຍກໍ່ຫຼຸດລົງ ມີການແປງຫຼາຍຄັ້ງ ແລະ ເປເພ. ມາຮອດວັນທີ 10 ມິຖຸນາ ປີ 2012 ແຂວງເຊີນລາ ສສ ຫວຽດນາມໄດ້ນຳເອົາອຸປະກອນສະຖານີວິທະຍຸອານາລອ໋ກ ແລະ ໂທລະໂຄ່ງດີຈີຕອນມາຊ່ວຍປ່ຽນຖ່າຍຕິດຕັ້ງໃຫ້ ມູນຄ່າ 2 ຕື້ດົງ ດ້ວຍເຄື່ອງສົ່ງວິທະຍຸ 1 Kw ກວມພື້ນທີ່ຂອງບາງບ້ານ ໃນ 5 ເມືອງ ເທົ່າກັບ 30% ຂອງພື້ນທີ່ຂອງແຂວງ ແຕ່ຍ້ອນເຄື່ອງເກົ່າແກ່ຊຸດໂຊມ ສ້ອມແປງລາຍຄັ້ງເຮັດໃຫ້ພື້ນທີການກະຈາຍຄ່ອຍຫຼຸດນ້ອຍຖອຍລົງ. ສຳລັບໂທລະພາບຮອດວັນທີ 1 ມິຖຸນາ 2008 ສ ປ ຈີນໄດ້ມາຊ່ວຍປັງປຸງມອບເຄື່ອງສົ່ງຕິດຕັ້ງ 500 w ກວມພື້ນທີເທດສະບານແຂວງແຕ່ເພີ່ມບ້ານອ້ອມຂ້າງຕື່ມລວມເປັນ 34 ບ້ານ, ມີຜູ້ໄດ້ຮັບຊົມ 12,906 ຄົນ. ໄລຍະປີ 2008 – 2012 ນີ້ ແມ່ນທ່ານ ນາງ ວັນນະລີ ເຈັ່ນຄຳເຫຼັກ ເປັນຫົວໜ້າສະຖານີ ມີພະນັກງານທັງໝົດ 9 ຄົນ, ຍິງ 3 ຄົນ. ໄລຍະປີ 2013 – ວັນທີ20 ກັນຍາ 2019 ນີ້ ແມ່ນທ່ານ ສົມຈັນ ດວງດາບຸດ ເປັນຫົວໜ້າສະຖານີ ມີພະນັກງານທັງໝົດ 13 ຄົນ, ຍິງ 5 ຄົນ.
ໄລຍະປີ 2015 - 2025: ປີ 2018 ໄດ້ມີການແຍກອອກເປັນສອງຂະແໜງຄື່: ຂະແໜງຖະແຫຼງຂ່າວ ແລະ ສະຖານີວິທະຍຸ - ໂທລະພາບແຂວງ ຕາມຂໍ້ຕົກລົງຂອງລັດຖະມົນຕີກະຊວງ ຖວທ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງພະແນກແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຜົ້ງສາລີ ເລກທີ 682 / ຖວທ ລົງວັນທີ 19 ມິຖຸນາ 2018 ເຊີງມີ 11 ພາລະບົດບາດ ແລະ ໜ້າທີສຳຄັນ. ສຳລັບການກະຈາຍອອກອາກາດໄລຍະນີ້ແມ່ນເຄື່ອງສົງຖຶກຟ້າຜ່າໃນວັນທີ 2 ເມສາ 2020 ເຮັດໃຫ້ເຄື່ອງເປເພ ປະຈຸບັນກະຈາຍໄດ້ກວມພື້ນທີພຽງ 14 ບ້ານ ໃນເມືອງຜົ້ງສາລີ, ມີຜູ້ໄດ້ຮັບຟັງ 23,745 ຄົນ ເທົ່າກັບ 2,7 % ຂອງເນື້ອທີ່ທົ່ວແຂວງ, ມີ 17 ລາຍການ ໃນນັ້ນລາຍການສະຖານີມີ 7 ລາຍການ ແລະ ລາຍການເປົ້າໝາຍສະເພາະກົມກອງ, ພະແນກການຂອງແຂວງ ແລະ ເມືອງຜົ້ງສາລີມາຈັດຮ່ວມ 10 ລາຍການ. ສວ່ນລະບົບໂທລະໂຄງແມ່ນມອບໃຫ້ເມືອງຜົ້ງສາລີກະຈາຍ ນັບແຕ່ວັນທີ 11 ກໍລະກົດ 2023 ເປັນຕົ້ນມາ. ວຽກໂທລະພາບມາຮອດປີ 2017 ບໍລິສັດເຄເບີນທີວີຜົ້ງສາລີ ຕັ້ງຢູ່ເທດສະບານແຂວງເກົ່ ໄດ້ເຂົ້າມາຊ່ວຍຕິດຕັ້ງເຄື່ອງສົ່ງໂທລະພາບທີ່ເຊື່ອມກັບລະບົບເຄເບີນ ໂດຍຈັດໃຫ້ໂທລະພາບແຂວງຜົ້ງສາລີອອກອາກາດ 1 ຊອ່ງ ທີ່ເປັນຊ່ອງທີ 1 ຂອງເຄເບີນ, ກະຈາຍໃນບັນດາບ້ານເທດສະບານແຂວງເກົ່າ, ມີ 2 ລາຍການ: ລາຍການຂ່າວ ແລະ ລາຍການສີລະປະບ້ານເຮົາ ແລະ ລະບົບໂທລະພາບອານາລ໋ອກໄດ້ຍຸດການກະຈາຍ. ຈົນມາຮອດ ວັນທີ 2 ເມສາ 2020 ຟ້າຜ່າສະຖານີ ແລະ ເຄື່ອງສົ່ງຂອງເຄເບີນ ເຮັດໃຫ້ການເຊື່ອມຕໍ່ຂອງຊ່ອງຜົ້ງສາລີເຂົ້້າກັບເຄເບີນເປເພ ເພາະເຄື່ອງດັ່ງກ່າວແມ່ນນຳເຂົ້າຈາກ ສປ ຈີນ ແຕ່ຍ້ອນພະຍາດ ໂຄວິດ - 19 ລະບາດຢູ່ ສປ ຈີນ ຈຶ່ງບໍສາມາດເອົາເຄື່ອງໄປສ້ອມແປງໄດ້ ແລະ ບໍລິສັດເຄເບີນກໍຢຸດໃຫ້ການບໍລິການ ຈຶ່ງໄດ້ຢຸດການກະຈາຍ. ມາຮອດປີ 2022 ປ່ຽນຊື່ເອີ້ນມາເປັນ ກອງວິຊາການວິທະຍຸ - ໂທລະພາບແຂວງ ຈົນເຖິງປະຈຸບັນ ຕາມຂໍ້ຕົກລົງຂອງທ່ານເຈົ້າແຂວງຜົ້ງສາລີ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງພະແນກແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຜົ້ງສາລີ ເລກທີ 819 / ຂຜລ ລົງວັນທີ 12 ກັນຍາ 2022 ເຊີງມີ 13 ພາລະບົດບາດ ແລະ ໜ້າສຳຄັນ. ໄລຍະແຕ່ວັນທີ 20 ກັນຍາ ປີ 2019 – ປະຈຸບັນ ແມ່ນທ່ານ ນາງ ຄຳມະລາ ຍີນດາລາຄຳ ເປັນຫົວໜ້າສະຖານີ ມີພະນັກງານທັງໝົດ 9 ຄົນ, ຍິງ 3 ຄົນ.
ການກະຈາຍສື່ອອນລາຍຂອງສະຖານີ: ສື່ອອນລາຍແມ່ນເລີມສ້າງຂື້ນວັນທີ 24 ກັນຍາ 2018 ໄດ້ສ້າງໜ້າເຟດບຸກເພຈ facebook ແລະ youtube ສະເພາະຂອງສະຖານີ ຂື້ນ, ມາຮອດວັນທີ 27 ສິງຫາ ປີ 2024 ໄດ້ເພີ່ມຊ່ອງທາງ ເວບໄຊ້ https://dictphongsaly.gov.la ແລະ Tiktok ສະເພາະເພື່ອກະຈາຍຂ່າວ, ລາຍການອອກສູ່ສັງຄົມທາງອອນລາຍ.
ເຊີງຕະຫຼອດໄລຍະຜ່ານມາ ສະຖານີວິທະຍຸ - ໂທລະພາບແຂວງຜົ້ງສາລີ ໄດ້ປະກອບສວ່ນຕາມພາລະບົດບາດເປັນກະບອກສຽງຂອງພັກ - ລັດ ມອບໃຫ້ຢ່າງຕັ້ງໜ້າ ເຊີງມັນສະແດງອອກ ແຕ່ລະປີສາມາດເຄື່ອນໄຫວເກັບກຳຂໍ້ມູນມາຂຽນເປັນຂ່າວໄດ້ 350 ກ່ວາຂ່າວຕໍ່ປີ, 25 ບົດຕໍ່ປີ, ກະຈາຍວິທະຍຸໄດ້ 5 ພັນກວ່າຊົວໂມງຕໍ່ປີ, ກະຈາຍໂທລະພາບ 1 ພັນກວ່າຊົວໂມງຕໍ່ປີ, ກະຈາຍໂທລະໂຄ່ງຂອງສະຖານີ 2 ພັນກວ່າຊົວໂມງຕໍ່ປີ; ປະຈຸບັນມີຜູ້ຕິດຕາມສື່ອອນລາຍສະຖານີ 50 ພັນກວ່າຄົນຕໍ່ປີ, ມີຜູ້ເຂົ້າຊົມ ແລະ ອ່ານຂ່າວໜ້າສື່ອອນລາຍຂອງສະຖານີ 4 ລ້ານກວ່າເທື່ອຄົນຕໍ່ປີ.
