ໜ້າຫຼັກ / ການເຄື່ອນໄຫວ / ເມືອງຂວາຈັດງານບຸນເກີຣ ປະຈຳປີ 2024
ເມືອງຂວາ ຈັດງານບຸນເກິຣ ປະຈໍາປີ 2024
ໃນວັນທີ 15 ມັງກອນ 2025 ນິ້, ທີ່ສະຫວັນຄໍາ ເມືອງຂວາ ແຂວງຜົ້ງສາລີ ໄດ້ຈັດບຸນເກິຣ ປະຈໍາປີ 2024 ຂຶ້ນຢ່າງເປັນທາງການ ໂດຍການເປັນປະທານຂອງທ່ານ ຄໍາໄລ ສຸທິພອນ ຮອງເລຂາພັກເມືອງ ປະທານແນວລາວສ້າງຊາດ, ເຂົ້າຮ່ວມມີບັນດາທ່ານກໍາມະການປະຈໍາພັກເມືອງ, ກຳມະການພັກເມືອງ, ຫົວໜ້າຫ້ອງການ, ພະນັກງານບຳນານ, ເຖົ້າແກ່ອາວຸໂສ, ຜູ້ຊົງຄຸນວຸດທິ, ທະຫານ, ຕຳຫຼວດ, ພະນັກງານ-ລັດຖະກອນ, ເລຂາພັກນາຍບ້ານ ແລະ ບໍລິສັດ, ໂຄງການ, ຫ້າງຮ້ານ ແລະ ຕະຫຼອດຮອດປະຊາຊົນບັນດາເຜົ່າເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ຄໍາໄລ ສຸທິພອນ ຮອງເລຂາພັກເມືອງ ປະທານແນວລາວສ້າງຊາດ ໄດ້ກ່າວເປີດພິທີງານບຸນເກິຣ ປະຈໍາປີ 2024. ເຊິ່ງທ່ານໄດ້ກ່າວວ່າ: ການຈັດງານບຸນເກິຣ ແມ່ນຈັດຂຶ້ນ ໃນເດືອນຈຽງ ຫາເດືອນຍີ່, ກົງກັບ ເດືອນ 12 ຕໍ່ໃສ່ ເດືອນ 1 ສາກົນ ເພື່ອເປັນການລະນຶກເຖິງ ເຄື່ອງມືອຸປະກອນ ທີ່ໄດ້ນໍາໃຊ້ເຂົ້າໃນການຜະລິດ ຈົນສໍາເລັດເສັດສິ້ນ ພ້ອມທັງສົມມາຄາລະວະຂໍອະໂຫສິກຳ ສິ່ງຂອງເຫຼົ່ານັ້ນ ຖ້າຫາກຖືກລ່ວງ ເກີນ. ເປັນໂອກາດທີ່ຍາດຕິພີ່ນ້ອງ ເພື່ອນມິດສະຫາຍຜູ້ຢູ່ໃກ້ຢູ່ໄກ ມາພົບປະສ້າງສັນ ແລກປ່ຽນ ບົດຮຽນເຊິ່ງກັນ ແລະ ກັນ. ເປັນການສະເຫຼີມສະຫຼອງໃນໂອກາດ ສົ່ງທ້າຍປີເກົ່າຕ້ອນຮັບປີໃໝ່. ເຜົ່າກຶມມຸ ເປັນເຜົ່າໜຶ່ງ ທີ່ມີຮີດຄອງປະເພນີ ແລະ ວັດທະນະທຳອັນດີງາມ ມີເອກະລັກ ສະເພາະຂອງຕົນ ເຊັ່ນ: ມີພາສາປາກເວົ້າ, ຄວາມເຊື່ອຖື, ການນຸ່ງຖື, ອາຫານ ການກິນ, ວິຖີການດໍາລົງຊີວິດ ແລະ ອື່ນໆ ທີ່ໄດ້ສືບທອດປະຕິບັດກັນມາ ຫຼາຍຍຸກຫຼາຍສະໄໝ, ຊື່ສັດທ່ຽງ ທໍາ ດຸໝັ່ນອອກແຮງງານ ມີຄວາມສາມັກຄີ ກັບເຜົ່າອື່ນຕະຫຼອດມາ ມີມູນເຊື້ອຮັກຊາດ ຮັກ ບ້ານເກີດເມືອງນອນ ເຊິ່ງສະແດງງອອກໃນສະໄໝຕໍ່ສູ້ກູ້ຊາດກໍ່ໄດ້ຄຽງບ່າ, ຄຽງໄຫຼກັບເຜົ່າອື່ນໆ ຕໍ່ສູ້ປົດປ່ອຍປະເທດຊາດຢ່າງພິລະອາດຫານເຮັດໃຫ້ມີວິລະຊົນ, ນັກຮົບແຂ່ງຂັນຫລາຍທ່ານທີ່ ເປັນເຜົ່າກຶມມຸ ແລະ ພາຍຫຼັງສໍາເລັດພາລະກິດຕໍ່ສູ້ປົດປ່ອຍປະທດຊາດກໍ່ປະຕິບັດພາລະກິດ ສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດມີຄວາມສາມັກຄີ ອັນແໜ້ນແຟ້ນກັບບັນດາເຜົ່າອື່ນໆ.
ສະນັ້ນ, ການຈັດງານບຸນເກຼີຂອງເຜົ່າກຶມມຸໃນຄັ້ງນີ້ ເພື່ອເປັນອະນຸລັກ ແລະ ເສີມ ຂະຫຍາຍຮີດຄອງປະເພນີບຸນເກຼີຂອງເຜົ່າກຶມມຸຄຽງຄູ່ກັບການພັດທະນາ, ເສດຖະກິດ, ວັດທະນະທໍາ-ສັງຄົມໃຫ້ມີຄວາມຢືນຍົງ, ແລະ ເປັນການເຕົ້າໂຮມຄວາມສາມັກຄີປະຊາຊົນ ບັນດາເຜົ່າໃຫ້ເປັນປຶກແຜ່ນ, ທັງເປັນການປູກຈິດສໍານຶກໃຫ້ແກ່ລູກຫຼານໄດ້ຮັບຮູ້, ໄດ້ເຫັນ ຮີດຄອງປະເພນີຂອງແຕ່ລະເຜົ່າທີ່ໄດ້ສືບທອດກັນມາ, ທັງເປັນການສົ່ງເສີມການທ່ອງທ່ຽວຕິດ ພັນກັບວັດທະນາທໍາ, ວິຖີການດໍາລົງຊີວິດຂອງປະຊາຊົນບັນດາເຜົ່າ. ຈາກນັ້ນ, ທ່ານ ຄອງ ແສງວິໄລ ພະນັກງານບໍານານ ໄດ້ເລົ່າປະຫວັດຄວາມເປັນມາຂງອບຸນເກິຣ. ບຸນເກີຣ ແມ່ນບຸນໜຶ່ງທີ່ພວກເຮົາສະແດງຈິດໃຈບໍລິສຸດພຸດຜ່ອງຕໍ່ປູ່ຍ່າ, ຕາຍາຍ, ພໍ່ແມ່, ບັນພະບູລຸດ, ທີ່ສ້າງຜົນງານປະໄວ້ໃຫ້ລູກຫຼານມີຢູ່ມີກິນ, ສະໜຸກສະບາຍຈະເລີນຮຸ່ງເຮືອງ ດັ່ງສູ່ ມື້ນີ້, ຍ້ອນເຫື່ອແຮງສະຕິປັນຍາວິລະກຳອັນລ້ຳເລີດຂອງຜູ້ກໍ່ຕັ້ງໃນເມື່ອກ່ອນປະໄວ້ເປັນ ຕົ້ນແມ່ນ ຂຸນເຈືອງ, ເຊິ່ງເປັນບັນພະບູລຸດທີ່ໃຫ້ກຳເນີດຮີດຄອງປະເພນີຕ່າງໆຂອງເຜົ່າກຶມມຸການຈັດງານບຸນ ເກີຣຕາມຮີດເດີມແມ່ນເລີ່ມກັນມາແຕ່ຕົ້ນເດືອນຈຽງ 15 ຄໍາຂອງເດືອນຍີເປັນປະຈຳໃນແຕ່ລະ ປີ,ບາງທ້ອງຖິ່ນຫຼືບາງບ້ານອາດຈະເຮັດໄວຫຼືເຮັດຊ້ານັ້ນຂຶ້ນກັບບາງທ້ອງຖິ່ນ. ພິທີກະກ່ຽມບຸນເກີຣ ມີເຫຼົ້າໄຫ, ໄກ່ຕົ້ມ, ເຄື່ອງປູກຂອງຝັງຜົນຜະລິດ ແລະບັນດາອຸປະກອນຕ່າງໆທີ່ນໍາໃຊ້ເຂົ້າໃນການຜະລິດໃນ1ປີທີ່ຜ່ານມາເພື່ອທ້ອນໂຮມເຂົ້າໃນພິທີກຳບຸນເກີຣເປັນການລະນຶກເຖິງບຸນຄຸນຂອງບັນພະບຸລຸດ ແລະ ລະນຶກເຖິງບຸນຄຸນຂອງເຜືອກມັນ, ອຸປະກອນການຜະລິດ, ອຸປະກອນການທຳມາຫາກິນ ແລະ ອື່ນໆ. ນອກຈາກນັ້ນ ຍັງເປັນການວາງສະແດງຜົນງານ, ຄວາມເອກອ້າງທະນົງໃຈຕໍ່ໝາກຜົນທີ່ຕົນເອງຫຼືຄອບຄົວໄດ້ຮັບໃນ1ປີທີ່ຜ່ານມາ. ປະດັບປະດາໃນພິທີຈະມີດອກໄມ້ທີ່ຫວານຢູ່ໃນພື້ນໄຮ່ມີສີສັນລາກຫຼາຍມາປະດັບເອ້ຢ້ອງໃນ ບ່ອນພິທີມີເຫຼົ້າໄຫໃຫຍ່, ໄກ່ຕົ້ມ, ເຂົ້າໃໝ່, ມີເຜືອກມັນທີ່ໜຶ້ງມາປະຢູ່ພາເຂົ້າ, ມີເຂົ້າຕົ້ມເຂົ້າໜົມ ແລະໝາກໄມ້ຕ່າງໆອີກເປັນຈຳນວນຫຼວງຫຼາຍ. ການມ່ວນຊື່ນຫຼືດ້ານວັດທະນະທໍາເຜົ່າກຶມມຸ ຕີຄອງບັ້ງ 9 ບາດ ຈຶ່ງຕີຄອງຢາວ, ແສ່ງ ແລະ ອື່ນໆ, ຟ້ອນດາບຈຶ່ງມ່ວນຊື່ນດ້ວຍການ ການຂັບ, ການຮ້ອງ, ການເປົ່າປີ, ເປົ່າຕອດ, ຫຼິ້ນກິລາ, ຄະຄົບ, ຈາງຈານ, ດຶງເຊືອກ, ໜ້າເກັກເຫຼົ່ານີ້ເປັນຕົ້ນ. ບຸນເກີຣນອກຈາກເປັນການສອງແສງເຖິງ ວິທີການດໍາລົງຊີວິດຂອງເຜົ່າກຶມມຸ, ຍັງແມ່ນບຸນກິນທານ ແລະລະນຶກເຖິງບຸນຄຸນຂອງບັນພະບຸລຸດ, ບຸນຄຸນຂອງເຜືອກມັນ, ພາຫະນະ ແລະ ອຸປະກອນການຜະລິດບຸນຄຸນແມ່ ເຂົ້າ, ຜູກຂໍ້ຕໍ່ແຂນສໍາ ລະລ້າງສິ່ງບໍ່ດີໃຫ້ຕົກໄປນໍາປີເກົ່າ ແລະ ອວຍພອນໃຫ້ ສະມາຊິກພາຍໃນຄອບຄົວ, ເພື່ອນມິດ ສະຫາຍໃຫ້ມີອາຍຸໝັ້ນຍືນຍາວ, ປະສົບແຕ່ຜົນສໍາເລັດໃນປີ ໃໝ່, ພ້ອມກັນນັ້ນບຸນເກີຣຍັງແມ່ນງານ ບຸນເພື່ອເຕົ້າໂຮມ ແລະ ຜູກແໜ້ນຄວາມສາມັກ ຄີກັບເຜົ່າ ອື່ນໆ, ເພື່ອນມິດສະຫາຍ ແລະ ເປັນງານບຸນທີ່ມີຄວາມເອກອ້າງທະນົງໃຈຕໍ່ຜົນງານທີ່ຍາດມາ ໄດ້ໃນໄລຍະ1ປີທີ່ຜ່ານມາ ແລະ ວາງ ທິດທາງແຜນການຄາດໝາຍສູ້ຊົນໃນປີຕໍ່ໄປ.
