ໜ້າຫຼັກ / ການເຄື່ອນໄຫວ / ກອງປະຊຸມຄັ້ງທີ 3 ຂອງກຸ່ມການຮຽນຮູ້ວຽກງານອ່າງໂຕ່ງ.
ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 16 ມັງກອນ 2025 ນິ້, ທີ່ສະໂມສອນຫ້ອງວ່າການປົກຄອງເມືອງຂວາ ແຂວງຜົ້ງສາລີ, ໂດຍພາຍໃຕ້ການເປັນປະທານຂອງທ່ານ ວົງເດືອນ ພູມມີທໍາ ຮອງເຈົ້າເມືອງ, ຜູ້ຊີ້ນໍາຂົງເຂດເສດຖະກິດ, ທ່ານ ເຈຟ ຟົງຊວາ ກີບເບີຣ, ຫົວໜ້າຊີ້ນໍາໂຄງການ, ອົງການຄົ້ນຄວ້າ ແລະ ເຕັກໂລຊີ (ອົງການເກຣດ) ປະຈໍາປາຣີ, ທ່ານ ຣິກ ເດລນອຍ, ຫົວໜ້າທີມງານໂຄງການສະຫວັນ, ມີບັນດາຄະນະບ້ານ, ຊ່ຽວຊານໂຄງການ, ພ້ອມວິຊາການຜູ້ຮັບຜິດຊອບວຽກຂັ້ນບ້ານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມ ທ່ານ ວົງເດືອນ ພູມມີທໍາ ຮອງເຈົ້າເມືອງ, ຜູ້ຊີນໍາຂົງເຂດເສດຖະກິດ ໄດ້ກ່າວເປີດກອງປະຊຸມຢ່າງເປັນທາງການ ພ້ອມຮຽກຮ້ອງມາຍັງບັນດາຫ້ອງການກ່ຽວຂ້ອງທຸກພາກສ່ວນ, ຜູ້ຕາງໜ້າຂັ້ນບ້ານ ແລະ ຄະນະຊ່ຽວຊານ ຈຶ່ງເປັນເຈົ້າການນໍາພາ, ປູກລະດົມຂົນຂວາຍ, ສຸມຈິດສຸມໃຈ ແລະ ສະຕິປັນຍາ ໃນການປຶກສາຫາລື ແລະ ມີຂໍ້ສະເໜີ ເພື່ອເຮັດໃຫ້ກອງປະຊຸມສາມາດບັນລຸ ຕາມຄາດໝາຍທີ່ວາງໄວ.
ທ່ານ ນາງ ເຫຼັກ ຍືນດາວົງ ຮອງຫົວໜ້າຫ້ອງການກະສິກໍາ ແລະ ປາໄມ້ເມືອງ ຜູ້ປະສານງານໂຄງການ ໄດ້ຂຶ້ນຜ່ານບົດລາຍງານຄວາມຄືບໜ້າການຈັດຕັ້ງປະຕິບັດໂຄງການຄຸ້ມຄອງອ່າງໂຕງຂະໜາດນ້ອຍແບບຍືນຍົງຢູ່ພາກເໜືອຂອງ ສປປລາວ. ສະເພາະໃນຂອບເຂດອ່າງໂຕ່ງນໍ້ານ້ອຍ ເມືອງຂວາ ຂອງພວກເຮົາ ມີເນື້ອທີ່ 25,000 ກວ່າເຮັກຕາ ເປັນເຂດພູດອຍທີ່ສູງຊັນ, ປະກອບມີແມ່ນໍ້ານ້ອຍ-ໃຫຍ່ຫຼາຍສາຍໄຫຼຜ່ານ ອັນໄດ້ສ້າງຄວາມຊຸ່ມຊື່ນ, ຄວາມ ອຸດົມສົມບູນຂອງທຳມະຊາດ ແລະ ເປັນແຫຼ່ງທຳມາຫາກິນຂອງປະຊາຊົນບັນດາເຜົ່າ. ບໍ່ວ່າຈະເປັນເຂດເນີນສູງ ແລະ ເຂດທົ່ງພຽງ ແມ່ນມີຄວາມຈຳເປັນໃນການຄຸ້ມຄອງອ່າງໂຕ່ງ ແລະ ແຫຼ່ງນໍ້າ ໃຫ້ຄົງໄວ້ສະພາບດີ ເພື່ອສ້າງເງື່ອນໄຂການດໍາລົງຊີວິດພື້ນຖານຂອງຄົນເຮົາໃຫ້ມີຄວາມຍືນຍົງ ແລະ ປອດໄພ ເປັນຕົ້ນ ການເຂົ້າເຖິງນໍ້າດື່ມ-ນໍ້າໃຊ້, ການປູກຝັງ-ລ້ຽງສັດ ແລະ ການຜະລິດອື່ນໆ ລວມທັງ ການປ້ອງກັນບໍ່ໃຫ້ເກີດໄພຂົ່ມຂູ່ຈາກທຳມະຊາດ, ຍ້ອນເຫັນຄວາມສໍາຄັນຄືແນວນັ້ນ, ພັກ-ລັດຖະບານເຮົາ ໄດ້ຂົນຂວາຍເອົາການ ຊ່ວຍເຫຼືອລ້າຈາກ ອົງການຝຣັ່ງເພື່ອການພັດທະນາ (AFD) ດຳເນີນການ ໂຄງການຄຸ້ມຄອງອ່າງໂຕ່ງຂະໜາດນ້ອຍຢູ່ເຂດເນີນສູງພາກເໜືອ ຂອງ ສປປ ລາວ ຫຼືເອີ້ນວ່າ ໂຄງການ ສະຫວັນ "SWAN” ໃນມູນຄ່າ 6.5 ລ້ານໂດລາ ເພື່ອຈັດຕັ້ງປະຕິບັດຢູ່ 8 ອ່າງໂຕ່ງຂະໜາດນ້ອຍ ໃນ 4 ແຂວງພາກເໜືອຂອງ ສປປ ລາວ ດ້ວຍໄລຍະເວລາຈັດຕັ້ງປະຕິບັດ 4 ປີ (2023 ຫາ 2027). ໂຄງການນີ້ເປັນການ ຕໍ່ຍອດຈາກຜົນສໍາເລັດຂອງບັນດາໂຄງການຕ່າງໆທີ່ລັດຖະບານຟຣັ່ງ ໄດ້ເຄີຍໃຫ້ທຶນຊ່ວຍເຫຼືອຜ່ານມາ ລວມທັງ ໂຄງການ ສາລີ SARI, ເຊິ່ງໃນຄັ້ງນີ້ ຮູບແບບການຊ່ວຍເຫຼືອຂອງເພິ່ນແມ່ນຄັດເລືອກອ່າງໂຕ່ງນໍ້ານ້ອຍ ເປັນໜຶ່ງຂອງບັນດາອ່າງໂຕ່ງຂະໜາດນ້ອຍ ເປັນເຂດເປົ້າໝາຍໂຄງການ ເພື່ອປະກອບສ່ວນເປັນທ່າແຮງໜຶ່ງໃນການຄຸ້ມຄອງແຫຼ່ງນໍ້າ, ສະພາບສິ່ງແວດລ້ອມ ແລະ ການພັດທະນາເສດຖະກິດ ໃຫ້ສອດຄ່ອງກັບ ຈຸດສຸມແຜນພັດທະນາເສດຖະກິດ-ສັງຄົມ ຂອງເມືອງຂວາ ໃນແຕ່ລະໄລຍະໃຫ້ບັນລຸຕາມຄາດໝາຍທີ່ວາງໄວ້ ເວົ້າລວມເວົ້າສະເພາະແມ່ນການນໍາໃຊ້ຊັບພະຍາກອນທໍາມະຊາດ ຕາມທິດສີຂຽວ ແລະ ຍືນຍົງ ຂອງພັກ-ລັດຖະບານເຮົາ ເປັນຕົ້ນແມ່ນ ການບັນລຸເປົ້າໝາຍເຮັດໃຫ້ປະຊາຊົນມີນໍ້າໃຊ້ຕະຫຼອດປີ ແລະ ສົ່ງເສີມການຜະລິດໃຫ້ປະຊາຊົນມີລາຍຮັບດີຂຶ້ນ. ປະກອບສ່ວນແກ້ໄຂຄວາມທຸກຍາກໃນເມືອງຂວາເທື່ອລະກ້າວ. ກອງປະຊຸມໄດ້ປະກອບຄໍາຄິດຄໍາເຫັນຢ່າງກົງໄປກົງມາ. ທັງນິ້ ກໍເພື່ອເຮັດການຈັດຕັ້ງປະຕິບັດກິດກໍາໄດ້ຮັບໝາກຜົນຕົວຈິ່ງ ເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນດີຂຶ້ນ ແລະ ບັນລຸຕາມຈຸດປະສົ່ງ ແລະ ລະດັບຄາດໝາຍທ່ີ່ໂຄງການໄດ້ວາງໄວ້.
