ໜ້າຫຼັກ / ການເຄື່ອນໄຫວ / ປະກາດຈຸດສຸມບ້ານຢໍ້ ເມືອງບຸນເໜືອ ເປັນຕົວເມືອງໃນຊົນນະບົດ ແລະ ປະກາດ ເມືອງບຸນເໜືອ ເປັນເມືອງພົ້ນທຸກ ຂອງແຂວງຜົ້ງສາລີ.
ພິທີປະກາດ #ຈຸດສຸມບ້ານຢໍ້ເມືອງບຸນເໜືອເປັນຕົວເມືອງໃນຊົນນະບົດ ເປັນຈຸດສຸມທຳອິດຂອງເມືອງ ແລະ ຂອງແຂວງ ແລະ ປະກາດ #ບຸນເໜືອເປັນເມືອງພົ້ນທຸກ ຂອງແຂວງ ເປັນເມືອງທຳອິດຂອງແຂວງ ໄດ້ຈັດຂຶ້ນໃນວັນທີ 17 ມັງກອນ 2025 ທີ່ຜ່ານມານີ້, ທີ່ເດີນໂຮງຮຽນມັດທະຍົມສົມບູນບ້ານຢໍ້ ໂດຍການເຂົ້າຮ່ວມຂອງທ່ານ ຄຳຜອຍ ວັນນະສານ ກຳມະການສູນກາງພັກ ເລຂາພັກແຂວງ, ເຈົ້າແຂວງຜົ້ງສາລີ, ມີທ່ານ ບົວຫົງ ຄຳຫາ ຫົວໜ້າກົມພັດທະນາຊົນນະບົດ ກະຊວງກະສີກຳ ແລະ ປ່າໄມ້, ມີທ່ານ ສົມພາບ ດາລາຈັກ ເຈົ້າເມືອງໆບຸນເໜືອ, ມີບັນດາທ່ານ ຮອງເຈົ້າແຂວງ, ການນຳແຂວງ, ບັນດາທ່ານເຈົ້າເມືອງ, ຮອງເຈົ້າເມືອງທົ່ວແຂວງ, ມີການນໍາຂັ້ນແຂວງ, ການນໍາຂັ້ນເມືອງ, ເລຂາຄະນະພັກຮາກຖານກຸ່ມບ້ານ, ອົງການປົກຄອງບ້ານ, ບັນດາທ່ານແຂກເຊີນ ແລະ ປະຊາຊົນບັນດາເຜົ່າພາຍໃນບ້ານຢໍ້ ເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ຄໍາຕັນ ນາມແສງ ຫົວໜ້າຫ້ອງວ່າການ ເມືອງບຸນເໜືອ ຂຶ້ນຜ່ານຂໍ້ຕົກລົງ ວ່າດ້ວຍການອະນຸມັດ ເປີດພິທີຮັບຮອງເອົາ ຈຸດສຸມບ້ານຢໍ້ ເປັນຕົວເມືອງໃນຊົນນະບົດ ແລະ ຮັບຮອງ ເມືອງບຸນເໜືອ ເປັນເມືອງພົ້ນທຸກ ຂອງແຂວງຜົ້ງສາລີ. ຈາກນັ້ນທ່ານ ວີສອນ ລາວເມົາ ຮອງເຈົ້າແຂວງຜົ້ງສາລີ ທັງເປັນຫົວໜ້າ ຄະນະຊີ້ນໍາ ການສ້າງຕົວເມືອງໃນຊົນນະບົດ ໄດ້ຂຶ້ນຜ່ານບົດລາຍງານ ການສ້າງບ້ານໃຫຍ່ ເປັນຕົວເມືອງນ້ອຍໃນຊົນນະບົດ ເຊິ່ງຈຸດສຸມບ້ານຢໍ້ ຫ່າງຈາກເທດສະບານເມືອງບຸນເໜືອໄປທາງທິດໃຕ້ປະມານ 21 ກິໂລແມັດ, ມີເນື້ອທີ່ຄຸ້ມຄອງທັງໝົດ: 9.872 ຮຕ. ຈຸດສຸມບ້ານຢໍ້ແມ່ນນອນຢູ່ໃນ 20 ຈຸດສຸມຂອງລັດຖະບານ, ນອນຢູ່ໃນ 15 ຈຸດສຸມຂອງແຂວງຜົ້ງສາລີ ແລະ ນອນຢູ່ໃນ 10 ກຸ່ມບ້ານຂອງເມືອງບຸນເໜືອ, ປະກອບມີ 6 ບ້ານຂຶ້ນກັບ, ມີ 594 ຫຼັງຄາ, ມີ 737 ຄອບຄົວ, ມີພົນລະເມືອງທັງໝົດ 2.950 ຄົນ/ ຍີງ 1.512 ຄົນ, ປະກອບມີ 9 ເຜົ່າຄື: ປະກອບມີ ເຜົ່າລື້, ເຜົ່າອາຄາ, ເຜົ່າພູນ້ອຍ, ເຜົ່າລາວລຸ່ມ, ເຜົ່າກືມມຸ, ເຜົ່າຫໍ້, ເຜົ້າຢັ້ງ ແລະ ເຜົ່າມົ້ງ. ຈຸດສຸມບ້ານຢໍ້ມີໜ່ວຍພັກທັງໝົດ 9 ໜ່ວຍພັກ, ປະກອບມີເລຂາພັກເປັນນາຍບ້ານ 6 ສະຫາຍ, ມີຮອງຄະນະບ້ານ 15 ທ່ານ, ຍິງ 1 ທ່ານ ແລະ ອົງການຈັດຕັ້ງຕ່າງໆຂອງບ້ານຄົບຊຸດຕາມກົດໝາຍການປົກຄອງ. ເຖິງປັດຈຸບັນສາມາດສ້າງບ້ານພົ້ນທຸກໄດ້ 6 ບ້ານກວມ 100%, ຄອບຄົວພົ້ນທຸກໄດ້ 533 ຄອບຄົວກວມ 94,84%, ຄອບຄົວຍັງບໍ່ພົ້ນທຸກ 29 ຄອບຄົວ ກວມ 7,16%, ຜ່ານການກວດກາ ແລະ ປະເມີນຈຸດສຸມບ້ານຢໍ້ ຂອງຄະນະຮັບຜິດຊອບ ແລະ ກອງເລຂາ 348/ລບ ຂັ້ນແຂວງ ແລະ ເມືອງ ບັນດາຂະແໜງການທີ່ກ່ຽວຂ້ອງໄດ້ຢັ້ງຢືນວ່າ: ຈຸດສຸມບ້ານຢໍ້ໄດ້ມີເງື່ອນໄຂຄົບຕາມ 16 ຕົວຊີ້ບອກ ຂອງການສ້າງບ້ານໃຫຍ່ເປັນຕົວເມືອງໃນຊົນນະບົດ ທີ່ໄດ້ກຳນົດໄວ້ໃນມາດຕາ 9 ຂອງດໍາລັດເລກທີ 348/ລບ ແລະ ບົດແນະນໍາເລກທີ 0830/ກປ ເຊິ່ງມີຄື: ເປັນບ້ານພັດທະນາຢູ່ຊົນນະບົດ, ເປັນບ້ານທີ່ມີຫົວໜ່ວຍຜະລິດ ແລະ ປຸງແຕ່ງເປັນສິນຄ້າ, ເປັນໃຈກາງໃຫ້ແກ່ບັນດາບ້ານອ້ອມຂ້າງ, ເປັນບ້ານທີ່ມີການຄົມມະນາຄົມສະດວກດີ, ເປັນບ້ານທີ່ມີພື້ນຖານການຜະລິດໝັ້ນຄົງ, ເປັນບ້ານທີ່ມີຕະຫຼາດຖາວອນ, ເປັນບ້ານທີ່ມີສູນບໍລິການໄປສະນີຫຼືໂທລະຄົມມະນາຄົມ, ເປັນບ້ານທີ່ມີສະຖານີບໍລິການເຕັກນິກກະສິກຳແລະປ່າໄມ້, ເປັນບ້ານທີ່ມີໜ່ວຍບໍລິການ ການເງິນຈຸລະພາກໃດໜຶ່ງ, ເປັນບ້ານທີ່ມີສຸກສາລາ ຫຼື ໂຮງໝໍນ້ອຍ, ເປັນບ້ານທີ່ມີນ້ຳປະປາໃນຊຸມຊົນ, ເປັນບ້ານທີ່ມີຕະຂ່າຍໄຟຟ້າໃນລະບົບ, ເປັນບ້ານທີ່ມີໂຮງຮຽນປະຖົມສົມບູນແລະມັດທະຍົມຕົ້ນ, ເປັນບ້ານທີ່ມີການຄຸ້ມຄອງ,ປົກປັກຮັກສາແລະນຳໃຊ້ຊັບ ພະຍາກອນທຳມະຊາດແລະສິ່ງແວດລ້ອມຢ່າງມີປະສິດທິຜົນແລະຢືນຍົງ, ເປັນບ້ານທີ່ມີລາຍໄດ້ທີ່ໝັ້ນຄົງ, ເປັນບ້ານທີ່ມີພົນລະເມືອງໃນຈຳນວນທີ່ແນ່ນອນ.
ພ້ອມກັນນີ້ທ່ານ ສົມພາບ ດາລາຈັກ ເຈົ້າເມືອງໆບຸນເໜືອ ໄດ້ຜ່ານບົດລາຍງານການສ້າງ ເມືອງບຸນເໜືອ ເປັນຕົວແບບເມືອງພົ້ນທຸກ ເຊິ່ງເມືອງບຸນເໜຶອ ໄດ້ຮັບການເອົາໃຈໃສ່ພັດທະນາເປັນເທດສະບານຂອງແຂວງຜົ້ງສາລີ ຕາມແຜນພັດທະນາເສດຖະກິດ-ສັງຄົມ 5 ປີ ຄັ້ງທີ III ຂອງເມືອງ ແລະ ຕາມທິດນຳຂອງການນຳແຂວງໃນແຕ່ລະໄລຍະ ຂອບເຂດຂອງເມືອງ: ທິດເໜຶອ ຕິດກັບ ເມືອງຍອດອູມີຄວາມຍາວ 32 ກິໂລແມັດ, ທິດໃຕ້ ຕິດກັບເມືອງບຸນໃຕ້ມີຄວາມຍາວ 32 ກິໂລແມັດ, ທິດຕາເວັນອອກ ຕິດກັບເມືອງຜົ້ງສາລີ ມີຄວາມຍາວ 62 ກິໂລແມັດ ແລະ ຕິດຕາເວັນຕົກຕິດກັບ ເມືອງຫຼ້າ ສປຈີນ ມີຄວາມຍາວ 83 ກິໂລແມັດ, ມີເນຶ້ອທີ່ການປົກຄອງທັງໝົດ 111.216,79 ເຮັກຕາ ຫຼຶ ເທົ່າກັບ 1.112,16 ກິໂລຕາແມັດ ປະກອບມີ 1 ເທດສະບານ, 5 ກຸ່ມ, 65 ບ້ານ, ພົນລະເມືອງທັງໝົດ 27.919 ຄົນ ຍິງ 13.424 ຄົນ, ມີ 5.327 ຫຼັງຄາ, 6.860 ຄອບຄົວ, ມີ 15 ຊົນເຜົ່າ, ການປະເມີນວຽກງານແກ້ໄຂຄວາມທຸກຍາກ ຕາມດຳລັດ 348/ລບ ຂອງເມືອງບຸນເໜືອ ນັບແຕ່ປີ 2020 - 2024 ເວົ້າລວມ, ເວົ້າສະເພາະ ຮອດປີ 2024 ທົ່ວເມືອງມີ 2 ຈຸດສຸມພັດທະນາ, 4 ເຂດການຜະລິດ, ມີຈໍານວນ 65 ບ້ານ, ພົນລະເມືອງທັງໝົດ 27.569 ຄົນ, ຍີງ 13.514 ຄົນ, 5.512 ຄອບຄົວ, ມີຄອບຄົວພົ້ນທຸກ 4.707 ຄອບຄົວກວມ 85,40%, ຄອບຄົວບໍ່ພົ້ນທຸກ 805 ຄອບຄົວ, ກວມ 14,60%, ຄອບຄົວພັດທະນາ 1.758 ຄອບຄົວ, ກວມ 31,89%, ຄອບຄົວບໍ່ພັດທະນາ 3.755 ຄອບຄົວ ກວມ 68,11%, ມີບ້ານພົ້ນທຸກ 53 ບ້ານ, ກວມ 80,30%, ມີບ້ານບໍ່ພົ້ນທຸກ 13 ບ້ານ, ກວມ 19,69%, ມີບ້ານພັດທະນາ 14 ບ້ານ, ກວມ 21,21% ແລະ ບ້ານຍັງບໍ່ທັນພັດທະນາ 52 ບ້ານ, ກວມ 78,79%; ການປະເມີນມາດຕະຖານພົ້ນທຸກ ແລະ ມາດຕະຖານພັດທະນາຕາມດໍາລັດ348/ລບ ໂດຍສະເພາະ 9 ມາດຕະຖານຂອງເມືອງພົ້ນທຸກ ເຫັນວ່າ ເມືອງບຸນເໜືອ ແມ່ນໄດ້ບັນລຸພົ້ນທຸກແຕ່ປີ 2022.
ຈາກນັ້ນທ່ານ ອຸ່ຄຳ ຕຸລາພັນ ຫົວໜ້າຫ້ອງວ່າການແຂວງ ໄດ້ຜ່ານຂໍ້ຕົກລົງຂອງເຈົ້າແຂວງ ສະບັບເລກທີ 991/ຂຜລ ວ່າດ້ວຍການຮັບຮອງເອົາຈຸດສຸມບ້ານຢໍ້ ເປັນຕົວເມືອງໃນຊົນນະບົດ ແລະ ຜ່ານຂໍ້ຕົກລົງຂອງ ນາຍົກລັດຖະມົນຕີ ສະບັບເລກທີ 78/ນຍ ວ່າດ້ວຍການຮັບຮອງເອົາ ເມືອງບຸນເໜືອ ເປັນເມືອງພົ້ນທຸກ ຈາກນັ້ນທ່ານ ຄຳຜອຍວັນນະສານ ເຈົ້າແຂວງຜົ້ງສາລີ ໄດ້ມອບຂໍ້ຕົກລົງຂອງເຈົ້າແຂວງ ວ່າດ້ວຍການຮັບຮອງເອົາຈຸດສຸມບ້ານຢໍ້ ເປັນຕົວເມືອງໃນຊົນນະບົດ ແລະ ຜ່ານຂໍ້ຕົກລົງຂອງ ນາຍົກລັດຖະມົນຕີ ວ່າດ້ວຍການຮັບຮອງເອົາ ເມືອງບຸນເໜືອ ເປັນເມືອງພົ້ນທຸກ ແລະ ຂໍ້ຕົກລົງຂອງເຈົ້າແຂວງ ວ່າດ້ວຍການຮັບຮອງເອົາຈຸດສຸມບ້ານຢ້ ເປັນຕົົວເມືອງໃນຊົນນະບົດ. ຈາກນັ້ນຄະນະປະທານພິທີໄດ້ພ້ອມກັນຕັດແຖບຜ້າ, ພ້ອມທັງເປີດປ້າຍ ແລະ ທ່ານເຈົ້າແຂວງຜົ້ງາລີ ລັ່ນຄ້ອງ 9 ບາດ ເພື່ອປະກາດຈຸດ
ສູມບ້ານຢໍ້ ເມືອງບູນເໜືອ ເປັນຕົວເມືອງໃນຊົນນະບົດ ແລະບຸນເໜືອ ເປັນເມືອງພົ້ນທຸກ ຂອງແຂວງຢ່າງເປັນທາງການ.
