ໜ້າຫຼັກ / ການເຄື່ອນໄຫວ / ປະກາດຮັບຮອງເອົາບ້ານ ກົກງີ້ວ ແລະ ບ້ານ ຫ້ວຍອ່ອນ ເປັນຄອບຄົວ ແລະ ບ້ານວັດທະນະທໍາໃໝ່ ປະຈໍາປີ2024.
ພິທີດັ່ງກ່າວໄດ້ຈັດຂຶ້ນໃນຕອນເຊົ້າຂອງວັນທີ 7 ມັງກອນ 2025 ທີ່ຜ່ານມາທີ່ເດີ່ນບ້ານກົກງີ້ວ ກຸ່ມແສນຍາງ ເມືອງຂວາ ແຂວງຜົ້ງສາລີ ໂດຍການເປັນກຽດເຂົ້າຮ່ວມຂອງທ່ານ ສົມນຶກ ໄຊຍະຈິດ ກໍາມະການປະຈໍາພັກເມືອງ ຮອງເຈົ້າເມືອງ ຜູ້ຊີ້ນໍາຂົງເຂດວັດທະນະທໍາ-ສັງຄົມ, ມີທ່ານ ສົມດີ ສີສະຫວັດ ກຳມະການພັກເມືອງ ຫົວໜ້າຫ້ອງການຖະແຫຼງຂ່າວ,ວັດທະນະທໍາ ແລະ ທ່ອງທ່ຽວເມືອງ, ມີທ່ານ ພັນໂທ ຊຽງອ່ອນສີ ຈັນທະອິນ ຄະນະພັກຮາກຖານ ຮອງຫົວໜ້າການເມືອງ ກອງບັນຊາການທະຫານເມືອງຂວາ ມີເລຂາຄະນະພັກຮາກຖານກຸ່ມບ້ານແສນຍາງ ເລຂາພັກນາຍບ້ານທັງ2ບ້ານ ມີບັນດາຄະນະຮັບຜິດຊອບການກໍ່ສ້າງຄອບຄົວ ແລະ ບ້ານວັດທະນະທໍາຂັ້ນເມືອງ, ແຂກເຊີນຈາກຂະແໜງການອ້ອມຂ້າງ, ອົງການຈັດຕັ້ງຂັ້ນບ້ານຕະຫຼອດຮອດພໍ່ແມ່ປະຊາຊົນພາຍໃນບ້ານເຂົ້າຮ່ວມຢ່າງພ້ອມພຽງ.
ໃນພິທີທ່ານ ສົມເພັດ ອຸ່ນທິກຸນ ເລຂາພັກນາຍບ້ານ ບ້ານກົກງີ້ວໄດ້ຕາງໜ້າທັງ2ບ້ານໄດ້ຂຶ້ນຜ່ານບົດສະຫຼຸບກ່ຽວກັບການສ້າງບ້ານວັດທະນະທໍາໃໝ່ ເຊິ່ງໄດ້ໃຫ້ຮູ້ວ່າ: ທັງ2ບ້ານມີເນື້ອທີ່ຄຸ້ມຄອງທັງໝົດ 5.448 ກວ່າເຮັກຕາ, ເນື້ອທີ່ທໍາການຜະລິດ 1.842 ກ່ວາເຮັກຕາ, ດ້ານປະຊາກອນແມ່ນເຜົ່າກຶມມຸ 100%, ມີ105ຫຼັງຄາເຮືອນ,ມີ120ຄອບຄົວ,ມີພົນລະເມືອງ483ຄົນ,ຍິງ233ຄົນ,ມີແຮງງານຜະລິດ174ຄົນ,ຍິງ84ຄົນ, ໃນໜຶ່ງປີທີ່ຜ່ານມາທັງ2ບ້ານສາມາດສ້າງລາຍຮັບເຂົ້າໃນບ້ານໄດ້ 3 ຕື້ກວ່າກີບສະເລ່ຍໃສ່ຫົວຄົນແມ່ນ 6 ລ້ານກ່ວາກີບຕໍ່ຄົນຕໍ່ປີຜ່ານຈາກການປະເມີນຕາມ 3 ມາດຕະຖານ ຂອງການສ້າງຄອບຄົວ ແລະ 4 ມາດຕະຖານ ການສ້າງບ້ານວັດທະນະທໍາແລ້ວ ເຫັນວ່າຄົບຖ້ວນຕາມບັນດາມາດຖານເງື່ອນໄຂ ບ້ານ ກົກງີ້ວ ບັນລຸ 97% ແລະ ບ້ານ ຫ້ວຍອ່ອນ ບັນລຸໄດ້ 93%ດັ່ງນັ້ນຈຶ່ງສາມາດສະເໜີ ແລະ ປະກາດຮັບຮອງເປັນບ້ານວັດທະນະທໍາໄດ້. ຈາກນັ້ນ, ທ່ານ ບຸນມາ ແກ້ວອຸດົມ ຮອງຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 378/ມຂ ແລະ ສະບັບເລກທີ 379/ມຂ ລົງວັນທີ 25 ພະຈິກ 2024 ວ່າດ້ວຍການມອບໃບຢັ້ງ ຢືນໃຫ້ແກ່ຄອບຄົວວັດທະນະທຳບ້ານ ກົກງີ້ວ ຈໍານວນ 83 ຄອບຄົວ ແລະ ບ້ານ ຫ້ວຍອ່ອນ ຈໍານວນ 38 ຄອບ ຄົວ ແລະ ຜ່ານຂໍ້ຕົກລົງຂອງທ່ານເຈົ້າແຂວງ ສະບັບເລກທີ 1067/ຂຜລ, ແລະ ສະບັບເລກທີ 1071/ຂຜລ, ລົງວັນທີ 20 ທັນວາ 2024 ວ່າດ້ວຍການມອບໃບຢັ້ງຢືນ ຮັບຮອງເອົາ ບ້ານ ກົກງີ້ວ ແລະ ບ້ານ ຫ້ວຍອ່ອນ ເປັນບ້ານວັດທະນະທຳໃໝ່ຂອງເມືອງ. ພ້ອມທັງມອບ-ຮັບໃບຢັ້ງຢືນດັ່ງກ່າວ ເປັນກຽດຂຶ້ນມອບໃບຢັ້ງຢືນຄອບຄົວວັດທະນະທຳ ໂດຍທ່ານ ສົມດີ ສີສະຫວັດ ກຳມະການພັກເມືອງ ຫົວໜ້າຫ້ອງການຖະແຫຼງຂ່າວ,ວັດທະນະທໍາ ແລະ ທ່ອງທ່ຽວເມືອງ ຂຶ້ນຮັບໂດຍທ່ານຮອງເລຂາພັກນາຍບ້ານທັງ2ບ້ານ ແລະ ເປັນກຽດກ່າວມອບໃບຢັ້ງຢືນ ບ້ານວັດທະນະທໍາໂດຍ ທ່ານ ສົມນຶກ ໄຊຍະຈິດ ກໍາມະການປະຈໍາພັກເມືອງ ຮອງເຈົ້າເມືອງ ຜູ້ຊີ້ນໍາຂົງເຂດວັດທະນະທໍາ-ສັງຄົມ ຂຶ້ນຮັບໂດຍ ທ່ານ ເລຂາພັກບ້ານ-ນາຍບ້ານທັງ2ບ້ານຂຶ້ນຮັບຢ່າງສົມກຽດ. ພ້ອມດຽວກັນນັ້ນຍັງໄດ້ມີການປະກາດ ບ້ານ ຫ້ວຍອ່ອນ ເປັນບ້ານປ້ອງກັນຊາດເຂັ້ມແຂງ ຂຶ້ນມອບໃບຢັ້ງຢືນຄອບຄົວປ້ອງກັນຊາດເຂັ້ມແຂງໂດຍ ທ່ານ ພັນໂທ ຊຽງອ່ອນສີ ຈັນທະອິນ ຄະນະພັກຮາກຖານ ຮອງຫົວໜ້າການເມືອງ ກອງບັນຊາການທະຫານເມືອງຂວາ ເປັນກຽດຂຶ້ນຮັບໂດຍທ່ານຮອງເລຂາພັກນາຍບ້ານບ້ານຫ້ວຍອ່ອນ ແລະ ໃຫ້ກຽດຂຶ້ນມອບໃບຢັ້ງຢືນ ບ້ານ ຫ້ວຍອ່ອນ ເປັນບ້ານປ້ອງກັນຊາດເຂັ້ມແຂງໂດຍທ່ານ ສົມນຶກ ໄຊຍະຈິດ ກໍາມະການປະຈໍາພັກເມືອງ ຮອງເຈົ້າເມືອງ ຂຶ້ນຮັບໂດຍເລຂາພັກນາຍບ້ານ ບ້ານ ຫ້ວຍອ່ອນ ເປັນຜູ້ຂຶ້ນຮັບ.
ໃນຕອນທ້າຍຂອງພິທີທີ່ມີຄວາມໝາຍຄວາມສໍາຄັນ ທ່ານ ສົມນຶກ ໄຊຍະຈິດ ກໍາມະການປະຈໍາພັກເມືອງ ຮອງເຈົ້າເມືອງ ຜູ້ຊີ້ນໍາວຽກງານຂົງເຂດວັດທະນະທໍາ- ສັງຄົມ ໄດ້ມີຄໍາເຫັນໂອ້ລົມຕໍ່ພິທີ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບການກໍ່ສ້າງຄອບຄົວ ແລະ ບ້ານວັດທະນະທຳ ຂັ້ນເມືອງ ແລະ ຂັ້ນບ້ານ ທີ່ໄດ້ເອົາໃຈໃສ່ໃນການຊຸກຍູ້ ແລະ ຈັດຕັ້ງປະຕິບັດບັນດາມາດຖານເງື່ອນໄຂ ຂອງການສ້າງບ້ານວັດທະນະທຳ ໄດ້ມີຜົນສຳເລັດ ຄະນະດຽວກັນນັ້ນ ທ່ານຍັງໄດ້ສະແດງຄວາມຍ້ອງຍໍຊົມເຊີຍມາຍັງບັນດາພໍ່ແມ່ປະຊາຊົນທັງ2ບ້ານ ທີ່ມີຄວາມສາມັກຄີ, ມີສະຕິຕື່ນຕົວເຂົ້າໃນການປະກອບສ່ວນການສ້າງສາພັດທະນາເສດຖະກິດ-ສັງຄົມ, ເອົາໃຈໃສ່ປະຕິບັດບັນດາມະຕິຄຳສັ່ງ, ກົດໝາຍຂອງລັດ ກໍຄືກົດລະບຽບຂອງບ້ານໄດ້ຢ່າງດີ ເຮັດໃຫ້ພາຍໃນບ້ານມີຄວາມສະຫງົບ, ເສດຖະກິດຄອບຄົວໄດ້ຮັບການພັັດທະນາ,ຊີວິດການເປັນຢູ່ໄດ້ຮັບການປັບປຸງ ແລະ ລູກຫຼານຂອງພໍ່ແມ່ປະຊາຊົນໄດ້ເຂົ້າຮຽນຕາມເກນອາຍຸຢ່າງທົ່ວເຖິງ ເຮັດໃຫ້ບ້ານກາຍເປັນບ້ານວັດທະນະທຳ ຕາມມາດຖານເງື່ອນໄຂທີ່ໄດ້ກຳນົດໄວ້ຢ່າງຄົບຖ້ວນ ຈົນສາມາດປະກາດຮັບຮອງເອົາທັງ2ບ້ານເປັນຄອບຄົວ ແລະ ບ້ານວັດທະນະທຳໃໝ່ ພ້ອມດຽວກັນນັ້ນ ທ່ານຍັງໄດ້ເນັ້ນໜັກມາຍັງພໍ່ແມ່ປະຊາຊົນພາຍໃນບ້ານຈົ່ງສືບຕໍ່ປົກປັກຮັກສາບັນດາຜົນງານທີ່ບ້ານສາມາດຍາດໄດ້ໃນໄລຍະຜ່ານມາ ແລະ ປັບປຸງໃນບາງດ້ານເປັນຕົ້ນແມ່ນ ການປັັບປຸງ, ຍົກສູງບົດບາດການນຳພາ-ຊີ້ນຳ ຂອງອົງການປົກຄອງບ້ານ, ຍົກສູງນໍ້າໃຈຄວາມສາມັກຄີພາຍໃນບ້ານໃຫ້ແໜ້ນແຝ້ນ, ພ້ອມກັນຕ້ານ ແລະ ສະກັດກັ້ນບັນດາປະກົດການຫຍໍ້ທໍ້ຕ່າງໆທີ່ເກີດຂຶ້ນ ທີ່ສ້າງຄວາມບໍ່ສະຫງົບພາຍໃນບ້ານຢ່າງເຂັ້ມງວດ, ແລະ ພ້ອມກັນສ້າງສາພັດທະນາເສດຖະກິດ-ສັງຄົມ ໃຫ້ມັ່ງຄັ່ງຮັ່ງມີເປັນເທື່ອລະກ້າວ. ພ້ອມທັງສືບຕໍ່ປົກປັກຮັກສາມູນເຊືື້ອ ຄອບຄົວ ແລະ ບ້ານວັດທະນະທໍາ ຄຽງຄູ່ກັບການພັດທະນາບ້ານໃຫ້ຈະເລີນກ້າວໜ້າຢ່າງບໍ່ຢຸດຢັ້ງ.
ຈາກນັ້ນປະທານພິທີ, ພ້ອມດ້ວຍບັນດາທ່ານແຂກ ໄດ້ພ້ອມກັນ ລັ່ນຄ້ອງ 9 ບາດ ແລະ ເປີດປ້າຍ ຮັບຮອງເອົາບ້ານ ກົກງີ້ວ ແລະ ບ້ານ ຫ້ວຍອ່ອນ ເປັນບ້ານວັດທະນະທຳຢ່າງເປັນທາງການ.
