ໜ້າຫຼັກ / ການເຄື່ອນໄຫວ / ກອງປະຊຸມຄົບຄະນະ ເປີດກວ້າງ ຄັ້ງທີ 12 ຂອງຄະນະບໍລິຫານງານພັກເມືອງສະໄໝທີ XV
ກອງປະຊຸມຄົບຄະນະ ເປີດກວ້າງ ຄັ້ງທີ 12 ຂອງຄະນະບໍລິຫານງານພັກເມືອງ ສະໄໝທີ XV ໄດ້ຈັດຂຶ້ນໃນວັນທີ 22 ມັງກອນ 2025 ນີ້, ທີ່ສະໂມສອນຂອງເມືອງຂວາ ແຂວງຜົ້ງສາລີ, ໂດຍການເປັນປະທານຂອງສະຫາຍ ສອນສະໜຸກ ສີສຸລາດ ເລຂາຄະນະບໍລິຫານງານພັກເມືອງ ເຈົ້າເມືອງ, ມີບັນດາສະຫາຍຄະນະບໍລິຫານງານພັກເມືອງ, ຫົວໜ້າຫ້ອງການ, ເລຂາຄະນະພັກຮາກຖານ, ເລຂາຄະນະໜ່ວຍພັກອ້ອມຂ້າງເມືອງເຂົ້າຮ່ວມ.
ໂອກາດນີ້ ສະຫາຍ ສອນສະໜຸກ ສີສຸລາດ ກໍ່ໄດ້ກ່າວໄຂກອງປະຊຸມຢ່າງເປັນທາງການ ພ້ອມທັງໄດ້ນໍາພາດໍາເນີນກອງປະຊຸມໃຫ້ໄປຕາມວາລະສຳຄັນທີ່ວາງໄວ້ ໂດຍສະຫາຍໄດ້ມີການເຈາະຈີ້ມໃນຫຼາຍບັນຫາກ່ຽວກັບການນຳພາ-ຊີ້ນຳຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ໄດ້ຮຽກຮ້ອງໃຫ້ບັນດາສະຫາຍໃນຄະນະບໍລິຫານງານພັກເມືອງ ເປັນເຈົ້າການໃນການປະກອບຄຳຄິດເຫັນຢ່າງກົນໄປກົງມາ ແລະ ປຶກສາຫາລືຮ່ວມກັນໃນການແກ້ໄຂບັນຫາສຳຄັນຕ່າງໆ ທີ່ຍົກຂຶ້ນມາໃນກອງປະຊຸມຄັ້ງນີ້.
ກອງປະຊຸມ, ໄດ້ຮັບຟັງການຕີລາຄາການຈັດຕັ້ງປະຕິບັດມະຕິກອງປະຊຸມຄະນະບໍລິການງານພັກເມືອງຄັ້ງທີ 11 ປະຈຳ ຕົ້ນປີ 2024, ຕີລາຄາການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບຕິດພັນກັບການຈັດຕັ້ງປະຕິບັດວ່າລະແຫ່ງຊາດ ວ່າດ້ວຍການສະກັດກັ້ນ ແລະ ແກ້ໄຂບັນຫາຢາເສບຕິດ ປະຈໍາປີ 2024 ແລະ ທິດທາງແຜນການປີ 2025, ຮັບຟັງການຜ່ານຮ່າງບົດລາຍງານການເມືອງ ເພື່ອສະເໜີຕໍ່ກອງປະຊຸມໃຫຍ່ອົງຄະນະພັກເມືອງ ສະໄໝທີ XVI, ຜ່ານຮ່າງແຜນພັດທະນາເສດຖະກິດ-ສັງຄົມ 05 ປີ ຄັ້ງທີ IV (2025 – 2029). ຕະຫຼອດໄລຍະການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໄລຍະໜຶ່ງປີ ທີ່ຜ່ານມາ ແມ່ນປະສົບກັບ ສະພາບແວດລ້ອມທີ່ມີທັງກະລະໂອກາດ ແລະ ສິ່ງທາທາຍຫຼາຍດ້ານເປັນຕົ້ນ ລາຄານໍ້າມັນ; ວັດສະດຸ ແລະ ລາຄາສິນຄ້າ ສູງຂຶ້ນ; ການລະບາດຂອງສັດຕູຝືດ; ໄພພິບັດທາງທຳມະຊາດ ແລະ ພະຍາດຕ່າງໆ ທີ່ອາດຈະເກີດຂຶ້ນໃໝ່. ແຕ່ເຖິງ ຢາງໃດກໍ່ຕາມ, ດ້ວຍຄວາມພະຍາຍາມຂອງຄະນະພັກ, ອົງການປົກຄອງແຕ່ລະຂັ້ນໄດ້ເອົາໃຈໃສ່ນໍາພາ - ຊີ້ນໍາ ແລະ ປູກລະດົມທົ່ວປວງຊົນບັນດາເຜົ່າຂຸດຄົ້ນທຸກແຫຼ່ງທຶນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດສັງຄົມ. ເຮັດໃຫ້ເສດຖະກິດພາຍໃນໄດ້ສືບຕໍ່ຂະຫຍາຍຕົວຕາມທິດທີ່ໄດ້ກຳນົດໄວ້ ແລະ ບັນດາຕົວເລກຄາດໝາຍ ສູ້ຊົນດ້ານມະຫາພາກໄດ້ບັນລຸເປັນສ່ວນໃຫຍ່ເສດຖະກິດແມ່ນຢູ່ ໃນລະດັບ 5,72%, ໃນນັ້ນ. ຂົງເຂດກະສິກຳ - ປ່າໄມ້ຂະຫຍາຍຕົວ 5,09%, ອຸດສາຫະກຳ-ຫັດຖະກຳຂະຫຍາຍ ຕົວ 6,10% ແລະ ຂົງເຂດການບໍລິການຂະຫຍາຍຕົວ 7,25%, ລວມຍອດຜະລິດຕະພັນພາຍໃນປີ 2024 ບັນລຸໄດ້ 411,66 ຕື້ກີບ, ທຽບໃສ່ແຜນການປີປະຕິບັດໄດ້ 27,18%, ສະເລ່ຍໃສ່ຫົວຄົນໄດ້ 13.446,35 ລ້ານກີບ ຫຼື ເທົ່າກັບ 611,36 ໂດລາ. ພ້ອມກັນນັ້ນສຸມໃສ່ການປະກອບຄໍາຄິດ-ຄໍາເຫັນ ແລະ ປຶກສາ-ຫາລືຢ່າງກົງໄປກົງມາ, ລະອຽດຈະແຈ້ງເຖິງທິດທາງ ແລະ ມາດຕະການຕົວຈິງໃນການແກ້ໄຂບັນຫາຈຸດອ່ອນ, ຂໍ້ຄົງຄ້າງ, ບັນຫາຈໍາເປັນເລັ່ງດ່ວນທີ່ຈະຕ້ອງໄດ້ຈັດຕັ້ງຕໍ່ໜ້າ. ກອງປະຊຸມຈະດໍາເນີນເປັນເວລາ 2 ວັນ ຈິ່ງຈະສໍາເລັດ.
